YƐNŊƐLƐ LI YAA KA SƆNGƆRƆ IZIRAYƐLI WOOLO PE NI WA PE TARA
30
30–33
Yɛnŋɛlɛ li yaa kali woolo pe shɔ
li juguye pe kɛɛ
1 Sɛnrɛ nda to Yawe Yɛnŋɛlɛ làa yo Zheremi wi kan; làa yo fɔ: 2 «Yawe Yɛnŋɛlɛ, Izirayɛli woolo Yɛnŋɛlɛ, pa lì yo yɛɛn fɔ: ‹Sɛnrɛ nda fuun mì yo ma kan, ti yɔnlɔgɔ sɛwɛ wa na. 3 Yawe Yɛnŋɛlɛ lo lì yo ma fɔ: Piliye ya yɛn wa na paan, na woolo, Izirayɛli woolo naa Zhuda tara woolo wele, mi yaa ka sɔngɔrɔ pe ni mbe yiri wa kulowo pi ni. Yawe Yɛnŋɛlɛ lo lì yo ma fɔ: Mi yaa sɔngɔrɔ pe ni wa tara nda mìla kan pe tɛlɛye pe yeri ti ni, peri lɛ ti pye pe woro.› »
4 Sɛnrɛ nda Yawe Yɛnŋɛlɛ làa yo Izirayɛli tara naa Zhuda tara ti wogo na tori nda. 5 Pa Yawe Yɛnŋɛlɛ lì yo yɛɛn fɔ:
«We yɛn na sunndo kɔngɔ magala nuru; fyɛrɛ kala li, yɛyinŋge kala ma.
6 Ye yewe jɛŋgɛ yege jɛn,
na kaa pye naŋa ma kugbɔ lɛ ma pyɔ se!
Yiŋgi na mi nɛɛ nambala pe ni fuun pe yaan pe pe sɛnŋgɛlɛ ke tɔgɔtɔgɔ
paa yɛgɛ ŋga na jɛlɛ selara ma kaa yiri wi ni we?
Yiŋgi na pe ni fuun pe si yɛgɛ san?
7 Jɔlɔgɔ ko kala li! Katugu ki pilige ki yɛn pilipege!
Ki pilige ki yɔngɔ woro wa.
Ki yɛn jɔlɔgɔ wagati Zhakɔbu setirige piile pe yeri.
Ɛɛn fɔ pe yaa ka shɔ mbe wɔ wa ki ni.»
8 Yawe Yɛnŋɛlɛ na yawa pi ni fuun fɔ lo lì yo ma fɔ: «Ko pilige ko ni, mi yaa nɛrɛ tunŋgo pyetige ŋga ki yɛn wa pe yɔlɔgɔ ki na ki kaari mbege wɔ wa, mbe pe pɔmanda ti kɔɔnlɔ; nambanmbala se ka pe pye kulolo naa. 9 Pe yaa kaa tunŋgo piin mi Yawe Yɛnŋɛlɛ, pe Yɛnŋɛlɛ na kan konaa pe wunlunaŋa Davidi wi setirige pyɔ ŋa mi yaa ka tɛgɛ pe go na wi kan.»
10 «Yoro Zhakɔbu setirige piile, yoro mbele na tunmbyeele, yaga ka fyɛ!
Yawe Yɛnŋɛlɛ lo lì yo ma.
Yoro Izirayɛli woolo, ye sunndo wiga ka kɔn ye na;
katugu mi yaa ka ye shɔ mbe ye wɔ wa taleere ti ni,
mbe ye setirige piile pe shɔ, mbe pe wɔ wa tara nda pàa pe yigi kasopiile ma kari wa pe ni ti ni.
Zhakɔbu setirige piile ye yaa ka sɔngɔrɔ mbe pan,
ye yaa kaa yɔgɔri wogosaga naa yɛyinŋge ŋga ye yaa ta ki kala na,
lere kpɛ se ka pan mbaa ye jɔlɔ naa.
11 Katugu mi yɛn ye ni, mbe ye shɔ.
Yawe Yɛnŋɛlɛ lo lì yo ma.
Mìla ye jaraga ma kari ye ni cɛngɛlɛ ŋgele fuun sɔgɔwɔ,
mi yaa ka ke ni fuun ke tɔngɔ pew;
ɛɛn fɔ yoro wo na, mi se ka ye tɔngɔ pew.
Mi yaa ka ye jɔlɔ mbe yala kaselege ki ni,
mi se ka ye yaga jɛrɛgisaga fu.»
Yɛnŋɛlɛ li yaa kali woolo
pe sagala
12 Pa Yawe Yɛnŋɛlɛ lì yo yɛɛn fɔ: «Ye yama pi yɛn ma tijanga,
ye jɔlɔgɔ ki kayaŋga kì gbɔgɔ.
13 Lere kpɛ se ta mbe yere ye kala li ni, mbe ye sagbanra ti fɔ;
wɛrɛ tanra woro wa mbe ye yama pi kɔ.
14 Yàa pye ma mbele fuun ndanla, pè fɛgɛ ye na.
Pe woro na sɔnri ye wogo na naa;
katugu mì ye gbɔn paa yɛgɛ ŋga na lere ma kaa wi jugu gbɔn we;
mì ye jɔlɔ ŋgbanga ye kajɔgɔrɔ nda ti se jɛn mbe kɔ ti kala na,
ye kapere lɛgɛrɛ ti kala na.
15 Yiŋgi na ye nɛɛ gbele ye yama pi kala na?
Ye kayaŋga ki woro kɔwogo.
Ye kajɔgɔrɔ nda ti se jɛn mbe kɔ to naa ye kapere lɛgɛrɛ to kala na,
mìgi jɔlɔgɔ ŋga ki wa ye na.
16 Ɛɛn fɔ konaa ki ni fuun, mbele fuun pe yɛn na ye tɔnri, mi yaa ka pe tɔngɔ;
mbele fuun pe yɛn na ye jɔlɔ, pe yaa ka pe yigi kasopiile mbe kari pe ni.
Mbele pe yɛn na ye kɛɛ yaara ti shoo ye yeri, pe yaa ka poro fun pe kɛɛ yaara ti shɔ pe yeri;
mbele fuun pe yɛn na ye kɛɛ yaara ti koli, mi yaa ka ti pe pe kɛɛ yaara ti koli fun.
17 Katugu mi yaa ka ye sagala,
mbe ye yama pi kɔ.
Yawe Yɛnŋɛlɛ lo lì yo ma;
katugu leele pe yɛn na ye yinri na yuun fɔ: ‹Leele mbele pè purɔ,
Siyɔn ca woolo, poro mbele lere kpɛ woro na pe lagajaa.› »
 
18 Yawe Yɛnŋɛlɛ pa lì yo yɛɛn fɔ:
«Ye wele, Zhakɔbu setirige piile mbele pàa yigi kasopiile ma kari pe ni, mi yaa ka sɔngɔrɔ mbe pan pe ni,
mi yaa ka pe yinrɛ ti yinriwɛ ta naa.
Cara ti yaa ka sɔngɔrɔ mbe kan naa wa ti katara ti ni.
Wunluwɔ go ki yaa sɔngɔrɔ mbe kan naa wa ki yɔnlɔ lɛlɛ li ni.
19 Yɛnŋɛlɛ li sɔnmɔ yuuro naa yɔgɔrimɔ tinmɛ yaa kaa yinrigi wa pe sɔgɔwɔ.
Mi yaa ka ti pe lɛgɛ, ka se ka kɔn pe lɛgɛwɛ pi na;
mi yaa ka gbɔgɔwɔ kan pe yeri,
mi se ka pe tifaga.
20 Pe piile pe yaa ka sɔngɔrɔ mbe pye paa yɛgɛ ŋga na pàa pye faa we,
pe gbogolomɔ woolo pe yaa ka yeresaga ta na yɛgɛ sɔgɔwɔ.
Mi yaa ka yiri mbele fuun pe yɛn na pe jɔlɔ pe kɔrɔgɔ.
21 Pe yɛkelewe wi yaa ka yiri wa poro yɛrɛ jate pe ni,
pe kundigi wi yaa ka yiri wa poro yɛrɛ jate pe sɔgɔwɔ.
Mi yaa kaa fulo na yɛɛ tanla,
wo fun wi yaa pan na kɔrɔgɔ.
Nakoma ambɔ wi yaa soro mbe yo wi yaa fulo na tanla wi yɛɛ fanŋga?
Yawe Yɛnŋɛlɛ lo lì yo ma.
22 Ye yaa ka pye na woolo,
mi fun mi yaa ka pye ye Yɛnŋɛlɛ.»
Yawe Yɛnŋɛlɛ li tifɛliŋgbɔgɔ ye
 
23 Ye wele, Yawe Yɛnŋɛlɛ li tifɛliŋgbɔgɔ kila paan,
li naŋgbanwa po pì yiri;
pi yɛn paa tisaga tifɛliŋgbɔgɔ yɛn na gbɔɔn na sunrugu,
ki yɛn na funlu wa lepeele pe go na.
24 Yawe Yɛnŋɛlɛ li naŋgbanwa gbɔɔ pi se sogo li na,
fɔ li ka sa ŋga lì kɔn ma tɛgɛ wa li nawa ki pye mbege yɔn fili.
Wagati ŋa wila paan wa puŋgo na wi ni, ye yaa ka ki kagala ke kɔrɔ jɛn.

© 2014 WBT