10
Noh ma Yafet tititi-nonosin
1 Basa faa inaꞌ a, boe ma Noh ana nara hapu tititi-nonosiꞌ. Siꞌ tititi-nonosiꞌ reme Sem, Yafet ma Ham.
2-5 Yafet tititi-nonosi nara, siꞌ: Gomer, Magog, Madai, Yawan, Tubal, Mesek ma Tiras. Esaꞌko noꞌ dedea nara, leo nara, ma oe-dae nara.
Gomer tititi-nonosi nara, siꞌ: Askenas, Rifat ma Togarma.
Yawan tititi-nonosi nara, siꞌ: Elisa, Tarsis, lahenda Kitim ara, ma Dodanim fo ara leo rai tasi suuꞌ.* Hapu dudui mauluꞌ ruma rae, ‘Rodanim’.
Ham tititi-nonosin
6 Ham tititi-nonosi nara, siꞌ: Kus, Misraim, Put, ma Kanaꞌan.† Kus, nana riꞌ ‘Etiopia’. Misraim, nana riꞌ ‘Masir’.
7 Kus tititi-nonosi nara, siꞌ: Seba, Hawila, Sabta, Raema ma Sabteka.
Raema tititi-nonosi nara, siꞌ: Syeba ma Dedan.
8 Kus ana tou na, riꞌ Nimrod. Ria nana malaka parani matati masososa kahereꞌ. 9 Ria kahere na nemeꞌ MANETUALAIN mai, losaꞌ ria boe dadi mansopu kahereꞌ naan seli. Huu ria na, lahenda biasa dedea rae, “Ela leoꞌ bea na, o dadi mansopu kahereꞌ, sama leoꞌ Nimrod fo hapu kahere na neme MANETUALAIN mai.” 10 Masososa na ria nusa-namon mulai nemeꞌ Babel, Erek Akad ma Kalne. Sira basa si rai Sinear.‡ Sinear, nana, Babel nade feke na. Besaꞌ ia mamanaꞌ ria nai Iran no Irak. 11 Neme naaꞌ mai, ana pareta Asyur boe. Basa boe ma ana nafoa kota Niniwe, Rehobot-Ir, Kala, 12 ma Resen, fo rai Niniwe no Kala talada. Basa sira nana bendar mesan.
13 Misraim tititi-nonosi nara, siꞌ lahenda Ludim, Anamim, Lehabim, Naftuhim, 14 Patrusim, Kasluhim, ma Kaftorim. Lahenda Kasluhim, nana lahenda Filistin nara bei-baꞌin.
15 Kanaꞌan ana ulu na, riꞌ Sidon. Kanaꞌan boe dadi bei-baꞌi neme lahenda Het ara, 16 Yebusi, Amori, Girgasi, 17 Hiwi, Arki, Sini, 18 Arwadi, Semari, ma Hamati.
Kanaꞌan tititi-nonosin nara kofela rai basa mamanaꞌ ara, 19 losaꞌ sira dae nara ratoo mulai neme Sidon, naroo leo Gerar, losa Gasa. Neme naaꞌ mai leo Sodom, Gomora, Adma ma Seboim, losa nai Lasa.
20 Sira basa nana Ham tititi-nonosin. Esaꞌko noꞌ dedea nara, leo nara, ma oe-dae nara.
Sem tititi-nonosin
21 Yafet aꞌan Sem, dadi neuꞌ lahenda Eber ara bei-bain.§ Lahenda malelaꞌ ruma rae Eber nana, riꞌ ‘Ibrani’.
22 Sem tititi-nonosin siꞌ: Elam, Asyur, Arpaksad, Lud ma Aram.
23 Aram tititi-nonosin siꞌ: lahenda Us, Hul, Geter ma Mas.* Mas nade feke na, riꞌ ‘Mesek’
24 Arpaksad ana na, riꞌ Sela. Sela ana na riꞌ, Eber.
25 Eber hapu ana touꞌ dua. Uluꞌ a foin nade, Pelek, (sosoa na nae, ‘esaꞌko matan’), huu fo tepoꞌ ria lahenda ra kofela nai dae-bafoꞌ a. Pelek fadi na, nade Yoktan.
26 Yoktan tititi-nonosin siꞌ: Almodad, Selef, Hasar-Mawet, Yera, 27 Hadoram, Usal, Dikla, 28 Obal, Abimael, Syeba, 29 Ofir, Hawila, ma Yobab. Basa sira nana Yoktan tititi-nonosi nara.
30 Sira mamana leleo nara mulai neme Mesa naroo losa Sefar, riꞌ nai pooꞌ dulu fo mamana lete malelepiꞌ ara.
31 Basa sira nana, Sem tititi-nonosin nara. Esaꞌko noꞌ dedea nara, leo nara, ma oe-dae nara.
32 Basa sira nana Noh tititi-nonosin nara, esaꞌko noꞌ leo nara. Basa faa inaꞌ a, sira siꞌ kofela rahenu dae-bafoꞌ a.