3
Heti–heuk soaneu mana dadik malangga salanik
1 Hataholi lae, “Mete ma hataholi esa sangga dadik malangga salanik, na, ana hele nala ues esa, lolen ana seli.” Dedeꞌak ndia memak tetebes! 2 Malangga salanik sodan musti naden malalaok. Dalen katemak, no kada saon esak. Heti nalelak aon. Dale bangganaꞌuk. Hataholi la fee hadak neun. Nahiik soi lelesun fo simbok hataholi mana mai kala. Ma nabeꞌi nanoli hataholi feꞌe kala. 3 Boso mana mafuk. Ma boso lima laik. Mandaan ndia, hataholi mana dale malole, mana mahiik mole, ma ta mana naꞌa lena matak. 4 Ana musi heti uma-loon, no malole. Ana nala musi feen hadak ma lamanenen boe. 5 Mete ma hataholi ndia tana heti nala uma-loo hehelin, na neme bee mai, ana bisa heti nala Manetualain salani nala?
6 Malolenak hele mala hataholi fo ana tungga Lamatuak Yesus dook so. Boso soꞌu malangga salanik fo bei fo namahele Lamatuak Yesus, huu hataholi leondiak lofoanak ana koao. Boso losak Manetualain hukun sama leo Ana huku nitu la malanggan, huu ndia mana koao. 7 Ma, mete ma hele malangga salanik, na hele hataholi fo naden malole. No leondiak, na tana mae hata-hata. Ma nitu la malangga ta bisa natudan.✡ Titus 1:6-9
Hataholi mana tulu-fali malangga salanik
8 Leondiak boe, hataholi mana tulu-fali malangga salanik. Sila musi hataholi nade nala malole, maa nala ta kafalek, ta mana mafu kala, ma boso hataholi mana mahiik nanalak lena–lenak. 9 Dale nala musi malalaok, ma ala musi toꞌu lahele Manetualain nanonolin fo Ana natudun neu ita hataholi kamahele kala. 10 Palisak neulalau sila sodan, ma sila ue-ledin. Mete ma hataholi ta hambu sila sala nala, na bei fo soꞌu sala fo ala tulu–fali malangga salani kala.
11 Leondiak boe, sila sao ina nala.* Dedeꞌa deꞌek Yunani nai ia γυναῖκας (gunaikas) bisa hambu nakandadaak telu fo nae, 1) “sila sao nala”, do bisa boe, nae, 2) “basa ina kala”. Hambu hataholi luma, lae, dedeꞌa deꞌek ndia ndandaan nai ia boe bisa nae, 3) inak mana tulu-fali malangga salani kala. Tehuu, ndandaan katelun ia, dedeꞌa Yunani lateme pake dedeꞌa deꞌek feꞌek (mete nai Roma susulan 16:1) Sila ndia, musi inak fo laena nade malole. Boso mana tao laboo hataholi feꞌek naden. Ala musi lanea lalelak ao nala, ma hataholi la boe oo lamahele sala.
12 Mana tulu–fali malangga salani kala boe, musi touk dalen katemak, neu kada sao inak esak. Sila boe oo, musi heti lalelak sila uma-loo nala no malole, ma heti lalelak ana nala boe. 13 Mete ma ala ono-lau salani kala no malole, na neu ko hataholi la boe fee hadak neu sala. Ma sila boe oo lambalani, de tala bii kokolak laꞌeneu sila namahehelen neu Yesus Karistus.
Ita namahehelen huun
14-15 Tius ei! Au amahena ta dook so bali, te au bisa mai tilo o. Leo au hambu nakaleꞌok, fo dook bei fo au mai, na susulak ia losa nakahuluk, neu o limam. Au sulak susulak ia, fo au afada o, ae Manetualain bobonggi nala musi lasoda leobeek. Boso lilii henin, mae, Manetualain masodak losa dodoon neu. Ndia hataholi nala, sama leo uma fo naꞌena netes ma dii inak matea fo toba nahele Manetualain nanonoli teteben.
16 Manetualain buka namanininok fo ana seli laꞌeneu ita namahehelen mai.
Ndia huun leoiak:
Karistus mai nai daebafok ia so.
Ana pake hataholi mata-aon sama leo ita.
Manetualain Dula Dalen boe natudu nae,
Yesus, Hataholi dale ndoos.
Ma Manetualain ata nusa-soda nala, lita Ndia boe.
Manetualain soꞌu Ndia neni nusa-sodak neu,
basa de soꞌu dema-demak Ndia.
Ndia tutuin, nakambela losa basa nusa kala, nai daebafok katematuan.
Nai sudi bee, hataholi la lamahele Ndia so.
Ita tamahele leondiak boe!
*3:11 Dedeꞌa deꞌek Yunani nai ia γυναῖκας (gunaikas) bisa hambu nakandadaak telu fo nae, 1) “sila sao nala”, do bisa boe, nae, 2) “basa ina kala”. Hambu hataholi luma, lae, dedeꞌa deꞌek ndia ndandaan nai ia boe bisa nae, 3) inak mana tulu-fali malangga salani kala. Tehuu, ndandaan katelun ia, dedeꞌa Yunani lateme pake dedeꞌa deꞌek feꞌek (mete nai Roma susulan 16:1)