21
Ama Sauaikki I Qi Kuarl Temiis
Mak 12.41-44
1 De ma Iesus dai qurli qa ve ma Lautu-vem-ki de qem ngim sagel lura i buup ne araa qelaing i ra tu araa vartabar mer ama akiski i ai de ra tu ama lautu ara qelaing met ki. 2 Dap ka lu iaiq ama sauaikki i qiat den i quasiq araa qerang. Be qia mu ama qelaing-iiram ama quiirem-iiram mer ama akiski. De ma Iesus ka ruqun ma’,
3 “Maikka ngul sil ba ngen ne gua revan. I luqi iara ama sauaikki, i quasiq araa qerang, dai qia quarl te ama qelaing i buup na nget. Be qia uirl se lura mai i re kuarl te ama qelaing. 4 I lura mai ama qaqet dai buup ne araa qelaing dap naqatikka rerl kuarl te ama garli iirang ama langas ip ten ban ama Ngemumaqa. Dap luqia ama nanki dai maikka quasiq ara qerang, dap kia quarl te ara qelaing mai, be maikka quasiq ara qeng ip kin ban per ara asmes.”
Ama Lautu-Vem-Ki Ama Slurlki I Diip Lenges Na Qi
Matiu 24.1-2; Mak 13.1-2
5 De iari ama qaqet ta taqen savet luqia ama Lautu-vem-ki ama Slurlki ma’, “Ngi lu, maiqatti ra mu re ama vetki ne ama dul ama atlunget, de ngen ama tekmeriirang ama atliirang dama Vetki ara rlan, i liirang aa i murl ama qaqet ta quarl tem iirang.”
6 De ma Iesus ka ruqun ma’, “Liirang aa ama tekmeriirang i iara ngenet liirang, dai maikka ngul sil ba ngen ne ama revan. I liirang aa mai ama tekmeriirang dai as diip lenges niirang. Be diip kuasik mager ip kurl a qeni maget. I maikka diip bungmet na nget be verik se nget per ama aivet.”
Ma Iesus Kel Sil Sever Ama Merlen-Iirang
Matiu 24.3-14; Mak 13.3-13
7 De ra snanpet na qa ma’, “Kesnada de lenges ne luqia ama Lautu-vem-ki? Ngu lu laiv ama Ngemumaqa qa tuvem na uut nanaa sever ama nirlaqa ip te lenges ne luqia ama vetki?”
8 De ma Iesus ka ruqun ma’, “Maikka ngenet lu, i ariq a ret te qaak tem ngen. I diip nasat de buup ne iari rat den i ra tis nas ne gua rlenki. De re tuqun ma’, ‘Kasa ama niirl dai iara qatkat na nget.’
Dap maikka quasik mager ip ngen diit naser a ra. 9 De nasat de ama asmesna ver ama luquv i buup. Dav as kuasiq ai luqa ama nirlaqa qa men. Be quasik mager ip ngeterl a ngen navet liirang aa. I luqa ama nirlaqa ip perlverleset ama aivetki dai as kuasik, dav as nasat.”
10 De qa rluses ne aa lengi sagel ama qaqet ma’, “Diiv iaq ama liinka ne ama qaqet ka taarlviit sev iaq ama liinka aa qames i saqikka ne iari ama qaqet ip ta tesna. De saqikka diiv iaq ama King ke ne aa liinka i ama buurlem na ra, ka taarl sev iaq aa qames ama King ke ne aa liinka ama buurlem na ra, be diip ta tesna maden. 11 De diip per iang ama niirl dai diiv ama niingki be quasiq ama qaqet araa a nge ama asmes per iang ama qerleng de ngen ama arlem ama slurlnget per ama qaqet. De diip per iang ama qerleng dai diiv ama qenken ama slurlnget ngerep kuiv ama aiverem. De diip per ama uusepka dai ngene lu ama tekmeriirang muqas muqas i ama slurl iirang, i iirang ngere siquat ip diip ngeneng ning malai.”
12 “Dav as diip nauirl, as pe liirang aa arlkames i as kuasik iirang nge men, dai sa diiv ama qaqet te rurut per a ngen de re lenges na ngen. De diiv ama qaqet ta taarl na ngen pe araa Lautu-vem-nget de ra tu ngen pe ama karabus De diip te tal ngen sev ama Gaman aa vet ngen ama Komitiqena araa vet ip te kot se ngen. I diip te tekmet taqurla i raquarli re narliip te lenges ne gua rlenki. 13 Be diip taqurla dai ama aiska ama atluqa bareq a ngen ip mager ip ngel sil ne ama lengi ama atlu nget sever a ngua. 14 Taqurla dai quasik mager ip ngen dru a ngen a qevep maberl aip ngu lu diip ngen deraqen nanaa. 15 I qatikka ngua dai diip ngu qurl a ngen te ama tuaqevep ama atlunget. De diip ngua ru ama lengi met ngen ip ngen deraqen. Be a ngen a qumes-ta mai dai diip kuasik mager ip te iing ama lengi dap kua re vin me nget manep i lungera i ngua qurl a ngen tem nget. 16 “De a ngen a lavu de a ngen a nenggeni-qena de lura i ra naver a ngen de a ngen a rluavik, dai diip te quarl tem ngen semer a ngen a qumespiq araa ngerik. De diip te peleng iari naver a ngen. 17 De ama qaqet mai dai maikka diip kuasiq ai re narliip se ngen. I liirang aa dai diiv iirang nge ren taqurla saver a ngen i raquarli ngen dru a ngen a qevep sever a ngua. Dap maikka diip ngu taqa uas tem ngen. 18-19 Be aip ngen deraarl malkuil ve liirang aa dai diip ngene raneng a ngen a iames masmas. De diip kuasik lenges ne aa ngen bak.
Diiv Ama Merlen-Iirang Ama Slurliirang Nge Ren Pet Ma Jarusalem
Matiu 24.15-21; Mak 13.14-19
20 Dav ariq aip ngen lu a ngen a qumes-ta i ra iingmirlek ne ma Jarusalem, dai mager ip ngen drlem, ai se ama niirl ip lenges lenges ne luqia ama qerlingki ama barlki dai se ama qares. 21 De lu ngen aa i qurli ngen per ama qerlingki ma Judia dai mager ip ngene uaik saver ama dam. De lu ngen aa i qurli ngen per ama qerlingki ma Jarusalem dai maikka mager ip ngen diit se vuuqas. De lu ngen aa i qurli ngen darliik ne ama qerlingki ama slurlki dai quasik mager ip ngen dran saver a qi. 22 I lunger iara ama niirl dai iv ama Ngemumaqa qe piirlit bareq ama viirang, ip mager iv ama lengi ve ama Ngemumaqa aa Langinka dai ngere ral ama asmes. 23 Dav ama nankina ama rut pem ta de lura i araa uis tat diim, dai diiv ama alkuil ba ra vet lungera ama niirl. I maikka ama merlenka ama slurlka dai diip ka ren per ama aivetki. Be diiv ama Ngemumaqa aa serlinki dai diip kia ren gel lura i ama quatta ngen ama nankina. 24 De diiv iari re ngip nagel ama sinki. De diip te aar iari iv ama karabuskena na ra de ra iit se ra saver ama qerleng mai i re karabus na ra. De ama qerlingki ma Jarusalem dai lura i quasiq ai ama Judaqena na ra dai diip te lenges na qi de qurli ra ver a qi se ama ages i buup. De diip per iang ama niirl de diiv ama Ngemumaqa qe nem lura i quasiq ai ama Judaqena na ra navet ma Jarusalem.”
Nasat De Ama Qaqet Araa Rarlimka Qa Ren
Matiu 24.29-31; Mak 13.24-27
25 “Be diiv ama qaqet te lu ama qasiquarl-iirang per ama nirlaqa de ama iaqunki de ngen ama ualdang. De diip per ama aivetki dai diip mavik mavik pe ama qaqet de diip teng ning i re narli drlindrlin pe ama valeng i bungbung-met na nget per ama kaska. 26 De diip buup ne ama qaqet dai ra tu araa qevep maberl sever ama tekmeriirang i diiv iirang nget den per ama aivetki. De maikka diip de araa rlan dai reng ning maden. I raquarli ama tekmeriirang mai ver ama uusepka dai diiv iirang ngere iaurl. 27 De diip pet lungera ama niirl de diiv ama qaqet te lu ama qaqet araa Rarlimka i qerl guirl nev uusep. I diip kat den pe ama aavulki ve aa dlek i aa ansinki qia iing mirlek na qa. 28 Baip liirang aa nge re rarlma i iirang nget den, de mager ip pe liina dai mager ip ngen daarlviit de ngenem ngim piit. I ama nirlaqa iv ama Ngemumaqa qe iames na ngen dai sa qatkat na qa.”
Ama Mengka I Qe Siquat Ne Ama Niirl
Matiu 24.32-35; Mak 13.28-31
29 De qa van a ra re iaq ama qasiquatka. I qa ruqun ma’, “Ngene ngim sagel ama mengka i qa ip taquarl ama ruqusaqa de ngene iang ama meng. 30 I aip ngenet lu baingbaing se ama ngeriquaing ama qelaq uaing met nget, dai ngen drlem, ai diiv ama niirl ama atlunget, nget den aa. 31 Dai qerlka raqurla, i ariq aip ngenet lu liirang aa nget den, dai diip ngen drlem, ai ama Ngemumaqa aa giqi ip ke uas dai sa qi gelna.
32 De maikka ngul sil ba ngen ne ama revan. I lura i qurli ra vet lungera ama niirl dai diip liirang aa nge ren gel ta i as kuasiq ai ra ngip. 33 De ama uusepka qe ne ama aivetki dai diip prleset na iam dap gua lengi dai diip kuasik prleset na nget.
Ama Risura Dai Maikka Mager Iv Aitaap Ta
34 Dap maikka mager iv aitaap ngen. De quasik mager ip katikka ngene srluup ip ngene kabaing. De quasik mager ip ngen dru a ngen a qevep maberl sever ama tekmeriirang naver ama aivetki. Ariq aip ngene tekmet taqurla dai quasik mager ip ngene taqa mu a ngen a qevep ma seserl. I arik ma, ama verlverleser iini se ama aivetki nge men dap kuasik ngen muvem nanas. 35 I luqa ama nirlaqa dai diip ka ren gel ama qaqet mai ver ama qerleng iirang mai ver ama aivetki. 36 De qatikka mager ip masmas de aitaap ngen. De maikka mager ip masmas de ngene raring sagel ama Ngemumaqa ip kerl kurl a ngen te ama a dlek. Taqurla ip diip ngen iing tik liirang aa mai i diiv iirang nge ren. De diip ngen daarl ver ama qaqet araa Rarlimka aa saqang i ngen deraarl malkuil i quasiq ai ngeneng ning.”
37 De qatikka ver ama niirl mai dai de ma Iesus ke su ama qaqet pe ama Lautu-vem-ki ama Slurlki. Dap per ama arlen dai ai de qa tit ke brlaing per ama damki i ra tis ki ma Ulip. 38 De ama qaqet mai dai maikka ai de ra taarl nepbang, de ra den sev ama Lautu-vem-ki ama Slurlki ip te narli aa lengi.