Wati Wangkatjarangku Malakailu Walkatjunkunytja
Malachi
Nyangatja Ngaṉmanytju Nyakula Wangkanytjaku
Nyangatja Godaku tjukurpa wati wangkatjarangku ini Malakailu walkatjunkunytja. Panya wati nyara palulawanungku Godalu wangkangu aṉangu panya palumpa walytja tjuṯangka, panya palumpa tjanampa tjamu munu mama tjuṯangku ngaṉmanytju timpula panya piḻukatinytja palyaṟa wiyaṉu, ka nyara palula maḻangka kuḻi 80 ngaṟala wiyaringu.
Palu paluṟu tjanaya kuliningi tjinguṟu wati panya wangkatjara ngaṉmanyitja tjuṯangku wangkanytja tjukurpa ngunti nguwanpa, munuya palulanguṟu kuliṟa tjituṟu-tjituṟuringi munuya kuliningi, “Yaalaṟa nyangatja palyaringkuku kala pukuḻpa mulapa nyinaku?” Ka panya tjanampa tjukurtjara tjuṯangku Godaku tjukurta kulilwiyangku wantingi munuya palunya tjukaṟurungku waḻkulwiyangku kuḻu wantingi. Kaya aṉangu tjuṯangku kuka wiṟu munu mai wiṟu kuḻu Godanya ungkunytjikitjangku katiwiyangku wantira kurakura tjuṯa kutju katingi.
Palu Malakailu tjananya wangkara mukumukuningi Godalakutu aṟuringkula palumpa tjukurpa wangaṉarangku kulintjaku, kaya palulanguṟu paluṟu tjana nyakuku Godalu tjananya mulapa aṯunytju kanyinnyangka munu wiṟu tjuṯa tjanampa palyannyangka.
Uwa, nyangatja Malakailu tjukurpa walkatjunkunytja maṉkurpa kutju ngarinyi, panya nganaṉa kuwaripangkuṯu palyaṉi, palu uwankarala walkatjuṟa wiyantja wiyaṯu.
Tjukurpa nyanganpa ngarinyi:
1:6—2:16 Tjukurtjara tjuṯangku ngunti palyantja
3:1-2 Godalu wati tjakulpa kuranyu iyantjikitjangku kalkuntja
3:5-7 Godalu aṉangu kura tjuṯa ngurkantaṟa tjarantjikitjangku kalkuntja
3:8-18 Godanya tjukaṟurungku ungkunytjaku
4:1-4 Tjiṉṯu maḻatja
1
Tjukurtjara Tjuṯangku Ngunti Palyantja
1 Tjukurpa nyangatja Mayatja Godalu wati ini Malakaila wangkangu Israelkunu tjuṯangka tjakultjunkunytjaku.
6 Nyanga alatji paluṟu wangkangu wati tjukurtjara tjuṯangka, “Ngayuluṉa Mayatja witulya puḻkangku nyurala wangkanyi, kaya kulinma! Panya tjitji tjuṯangku mamangka wangaṉarangku kulilpai, ka wati waṟkaripai tjuṯangku kuḻu mayatjangka wangaṉarangkuṯu kulilpai. Ka panya ngayulu nyurampa Mama munu Mayatja nyinanyi. Ka nyura nyaaku ngayula wangaṉarangku kulintja wiyangku wantinyi? Panya nyura ngayunya ananingi, munu nyura ngayunya kuliṟa wantingi. Palu nyura ngayula tjapilpai alatji, ‘Nyaala wanyu wangkara nyuntunya ananingi?’
7-8 “Wiya, nyura kuka tjiipi munu puluka pikatjara tjuṯa katira pungkula ngayunya ungkupai, kuṟu pati tjuṯa, nyumpu tjuṯa kuḻu. Palu nyanga puṟunykuṉa ngayulu pukuḻaripai wiya. Panya nyura nyanga alatji ngunti palyalpai. Ka ngayulu tjituṟu-tjituṟurinyi nyura ngunti palyannyangka. Uti nyura ngayunya kuka wiṟu mulapa katira ungama. Palu nyura kuka kurakura tjuṯa kutju katipai, ka nyara palulanguṟu ngayulu nyurampa ngaḻṯuringkunytja wiyangku wantinyi. Tjinguṟu nyura mayatja mantatja kuka nyanga puṟunypa pikatjara katira ungkunyangka wanyu paluṟu nyurampa nyakula pukuḻariku? Wiya, paluṟu wantiku. Ka nyura nyaaku ngayunya mayatja ilkaṟitja ngunti kuraṉi? Uti nyura kuka palya kutju katima pungkula ngayunya ungkunytjikitjangku, panya ngayuluṉa mayatja puḻka mulapa manta winkitjaku. Ka nyura uti ngayunya tjukaṟurungku pukuḻmanama.” Alatji Godalu wangkangu. 9 Ka nyura tjukurtjara tjuṯangku Godala puḻkaṟa tjapila nganampa ngaḻṯuringkunytjaku. Palu paluṟu nyura tjapinnyangka kuliṟa wantiku, panya nyura kuka kurakura tjuṯa ngunti katira ungkunyangka.