1 Txã'wẽ Jesus tasxte nasa wejx wala utxaate', Jesusa' Juante jxthaakwe bautisãyni's fxariseowe'sxa' jiyutx. 2 Isa yu' Jesusa' bautisaĩ'çme', naasáa txãa yakh u'jusawe'sxçxáatx bautisaĩ'. 3 Nawa txã'wẽ fxariseowe'sx jiyuni's Jesus wẽse'jçxa', Judeajũ kasehna u'kh, Galilea kiwen. 4 Nawa Galilea kiwen u'jweççxa', Samaria kiwegak khẽwna u'jwa'j ji'phu'. 5 Sa' Samaria kiwesu' teeçx çxhab Sikar yaasesa ũsa' txãa çxhab peeku'thek pa'j txãa yakh u'jusawe'sx yã'jçxa. Txãa Sikar çxhaba' Jakob kiwe ũsku txajx nçxi'k Jose's txãa utxatek neeyũ'. 6 Txãa kiwete' Jakoba' txãniitey yu' kutxi'jni kafx nvxihtna ũsu'ne', aça' Jesusa' ẽepxãh wahtxna u'jweççxa', kxteek jxkaaseya' kaçx. 7 Naapkaçxha' teeçx u'y Samariasuwe'sxa' yu' pa'kxya' pa'the', Jesusa' na'jĩk:

—Yu' mpeeswe tudxwa'j.

8 Txãapkaçxha' txãa yakh u'jusawe'sxa' çxhabna ũ' weyya' u'jnitx yu'. 9 Aça' txãa u'ya' na'jĩnak pas:

—Idxa' judiu nasag, sa' ¿ma'wẽtega ũ'kwe's yu' thãasu'? ũ'kwe' Samariasuwe'sxthu açyuja' jĩk. (Judiuwe'sxa' Samariasuwe'sxtxi ahçeçxa we'we'ççxáa yuhwa meeta'.)

10 Txajũ' Jesusa' pta'sxku:

—Dxusa' kĩh ũsya'watewa jiyuçxa txã'wẽy yu' thãassa' kimtewa jiyuwaça', adxa's yu' thãasune'kwe, aça' adxa' yu' pçuwa'jmeesa's peesu'nja jĩte', 11 txãa u'ya' na'wẽk pas:

—Naa kafxa' wala dxiia', aça' idxa' yu' pa'kxwa'j ji'phmeeg. Sa' ¿ma'wẽga ũ'kwe's yu' pçuwa'jmeesa's peesu'nja jĩ'? 12 Kwe'sx yaçgawe'sx Jakobku naa kafxa's phaade yu' pa'kxwa'j, aça' txajx nçxi'kwe'sxwa kxteetx pa'ki' tajkxtxi yuswa'j vxite' txãawe'sx tudxwa'j yã'jçxa. Aça' idxa' ¿kwe'sx yaçgawe'sx Jakobte jxthaakwe wáa walasane'ga? jĩte', 13 Jesus pasçxa':

—Jxukay maawa ayte yu'a's tudxsa' yũ'wẽena nes yuutxna. 14 Nawa adx peesni yu'a's tudxçxa', bagaçxte yuhwa yũ'wẽemeetxna. Txãa pa'gatey adx peesni yu'a' txãawe'sx ũuste yu'ĩçh na'wẽ nes yuuna, pçuwa'jmée ĩtxi fxi'zewa'ja's ji'phukahn.

15 Txã'jĩte' txãa u'ya' na'jĩnak pas:

—Txã'wẽte', txãa yu'a's mpees, kxah yũ'wẽewame'nja, sa' peena yu' naa kafxte pa'kxya' pa'jme'nja.

16 Aça' Jesus we'weçxa':

—I'kwe nmi'a's me'jwe pa'yaya', sa' txãa yakh yuweene'kwe ayte' jĩte', 17 txãa u'ya':

—Nmi' ji'phmeeth jĩnak pas.

Txajũ' Jesusa' na'jĩk:

—Nmi' ji'phmeeth jĩçxa' isa yuh we'we'i'kwe. 18 Txã'wẽ nyafxíi yu' tahç nmi'i'kwe ji'phu', nawa ãçxwe'sxa' nmi' me', aça' isa yuh we'wei'kwe.

19 Txã'wẽ wẽse'jçxa', txãa u'ya' na'jĩnak pas:

—Idxa' Dxus yuwe pta'sxsaíi ne'ga sũju'th. 20 Kwe'sx yaçgathẽ'jwe'sxa' naa vxiçtetx Dxusa's neewe'weya' pkhaakhe'. Nawa judiuwe'sx yu', Jerusalenteçxáa Dxusa's neewe'weya' pkhaakhewa'ja' jĩ'i'kwe jĩte', 21 Jesus pasçxa':

—Ew mjiyuwe: naa vxiçte meeçxawa Jerusalenteçxáa Dxusa's neewe'wewa'jme'. Dxusa's mteewa neewe'wewa'j en ãjana. 22 Samariatewe'sxa' Dxusa's ma'wẽ neewe'wewa'ja'swa jiimeei'kwe. Nawa judiuwe'sxa' jiiçxatha'w Dxusa's neewe'we', nwe'wesa' judiu nwe'sxa' naa pa'ga. 23 Dxusa's neewe'wewa'j en ãjana jĩ'th txãa ena' ãjxã'kh. Aça' maawa ĩsxiimée ũusuh jxuka yajkxçxa Dxusa's ũusteçxáa neewe'wesa' ew yuutxna, kwe'sx Tata' txã'wẽ yũuni'sku jxthãasu' naa pa'ga. 24 Dxusa' kwe'sx na'wẽy kakwe ji'phme' na' mtee mteewa ũsa', aça' txã'sna neewe'wesa' ũusuh jxuka yajkxçxa neewe'wewa'ja' jĩte', 25 txãa u'ya' na'wẽk pas:

—Ũ'kwe' jiith Kristo Dxus tasxu yuhna, aça' txãa pa'jçxa jxuka ew pta'sxina jĩte', 26 Jesus pasçxa':

—I'kwe yakh puutx we'wena u'psa adxíi Dxus tasxu yuusath jĩk.

27 Naapkaçxha' txãa yakh u'jusawe'sxa' sxawedna pa'jtx. Sa' Jesusa' txã'wẽ txãa u'y yakh puutx we'wena ũste uyçxa', kuh yajkxnatx neeyũu. Nawa ¿kĩjxa'ga txãa u'y yakh puutx we'we'? jĩna maa yuhwa paapẽyi'çmeeta'. 28 Txajũ' txãa u'ya' mitxha's kxtee txahna' u'kh çxhabsu nasatx pta'sxya':

29 —Naa kiwete ma'wẽ fxi'zeni'swa teeçx piçthẽ'j jiyuk txã'sa' myuhwe thegya'. Txã' Kristo íina jĩna pta'sxte', 30 çxhabtewe'sxa' thegya' u'jtx Jesus ũsnite pa'j. 31 Naapkaçxha' txãa yakh u'jusawe'sxa' Jesusa's na'jĩnatx we'we:

—Idxa', ¿wẽemeegá'? Pan mẽ' jĩna.

32 Nawa Jesusa' na'wẽk pas:

—I'kwe'sxa' jiimeei'kwe adx kĩh ũ'wa'j ji'phtewa.

33 Txã'jĩte', puutx paapẽyi'tx txãawe'sx pwe'sx:

—Meeçxa' ¿maa nasa puuçya' kũhwá'ntakx? jĩna.

34 Aça' Jesusa' na'wẽk pta'sx:

—Adx Tata jxthãasçxa mjĩiya' kaahni's kxtey yuuniçxáa, adx ũ'ni na'wẽsa'. 35 Ũ' thẽ'jwa'j pahz a'tey peejxa' jĩ'i'kwe i'kwe'sxa'. Nawa txã'wẽme'. Mjĩinisu mthegwe wakx, jxuka thẽ'jniyã'j ũsa', aça' pkhakhwa'jçxáa yã'j peejxa'. 36 Pkhakhna mjĩisa' deweni's jxpa'gawa'j ji'pha', aça' txãa pkhakhnisa' pçuwa'jmée ĩtxi fxi'zewa'jsata', kxah uuhsa' pkhakhsa yakh ja'daçxah weçxweçxa yajkxna neeyũutxna e'zíi. 37 Teeçxsa' uja'k, naapkaçxha' vxite' pkhakhe'k jĩni' isa yuja'. 38 I'kwe'sxa' uuhsameei'kwe, nawa adxa' pkhakhya' kaath vxite nasa uuhnisu jĩk.

39 Txã'wẽ txãa u'y ũ'kwe ma'wẽ fxi'zeni'swa jxuka jiyuk jĩna pta'sxpa'ga, txãa çxhabte nasa kuhsa' Jesusa's ũuste jxpa'gatx. 40 Sa' Jesus ũsnite thegya' pa'jçxa', Jesusa's wala neevxisxatx txãawe'sx yakh kxtee pta'sxna neeyũukahn. Aça' e'z enku kxtee fxi'ze, Dxus yuwe's pta'sxna. 41 Aça' txã's wẽse'jçxa', Jesusa's ũuste jxpa'gasa' jweeíiçxáatx pehna. 42 Sa' txãa u'ya's na'wẽtx we'we:

—I'kwe pta'sxniçxá's jiyumée, kwe'sx yuutha'w txajx we'weni's wẽse'jçxa jiyu Dxus tasxu yuusa Kristotewa, maatxwa jxuka nwe'wesa.

43 Txajũ' e'z en skhẽwniijũ', Jesusa' Samariajũ kasehna u'kh Galilea kiweníi. 44 Jesusíi we'weçxawa: Dxus yuwe pta'sxsa' maa yuhwa peekx kiwetey yu' wedxni fxi'ze'çmeeta' jĩk txãasak Galilean u'j. 45 Aça' Galileate pa'the', kxteewe'sx yu' wala weçxana jxpa'gatx, Jerusalen fxiestan u'jsa' uyne'ta Jesusa' ma'wẽ yũutewa txãasatx txã'wẽ yũu.

46 Jesusa' Galilea kiwete pa'kh Kaná çxhabte, yu'a's vxino vxitku nyafxíi kxtee. Aça' kxtey teeçx piçthẽ'j ũsu'k ne'jwe'sxa's jxkaah pu'çxsa. Txã' teeçx nçxi'k wala ãça'sa ji'phu'k Kapernaum çxhabte. 47 Sa' Galileatey Jesus sxawedna pa'jni's jiyuçxa', txãa piçthẽ'ja' puutx uyna kũhçxa', na'jĩnak pxthaa we'we:

—Adx yatna mejka, adx nçxi'ka's nuykatxhiya'. Txã'wẽme', uuçyã'ja' jĩte', 48 Jesus pasçxa':

—I'kwe'sxa' adx ãjani's kaavxya'ja'jmeete yu', adxa's jiyumeene'kwe kimtewa.

49 Txã'jĩte', txãa piçthẽ'j yu' na'jĩk:

—Dud myuh, adx nçxi'k uumeyna.

50 Txajũ' Jesusa' na'jĩk:

—Yatna sxawedna me'j. Iidx nçxi'ka' katxhiyã'jçxa ũsa'.

Txã'jĩte', txãa piçthẽ'ja' Jesusa' isa yuh we'wene' sũhna yatna sxawedna u'kh. 51 Sa' yatte pa'jaçte', txã'sna selpisaawe'sx pu'thegya' kasehçxa' na'wẽtx pta'sx:

—Iidx nçxi'ka' katxhiyã'kh jĩna pta'sxte', 52 txãa piçthẽ'ja' pẽjxku:

—Adx nçxi'k ãçã'sa' ¿ma'wẽga wẽtkuẽ' yajkx? jĩte':

—Jũ'na la unatek kakwesek ũçxha jĩnatx pta'sx. 53 Aça' neya' yajkxku txãa oratey Jesusa': Iidx nçxi'ka' katxhiyã'jçxa ũsa' jĩni's. Txajũ' txãa piçthẽ'ja' Jesus kimtewa jiyuçxa' txajx ũuste jxpa'gak, yattewe'sxwa txã'wẽy. 54 Txã'wẽ Judeajũ sxawedna Galileate pa'jçxa ãça'sa's nuykatxhini yakha' e'z usyã'ja' Jesus ãjani's kaavxya'ja'jni'.