1 Jesusa' txãa yakh u'jusa docesatx kxteeçxah pa'yaçxa' kĩh weete ãçã'satxwa nuykatxhiya' ãjãwa'ja's ũsku, eçx luuku vxit-satxwa nasa ũusu kutxi'khan. 2 Txã'wẽ yuuçxak kaah Dxus jxkaahwa'j ena's pta'sxna ãçã'satxwa nuykatxhikahn. 3 Sa' na'wẽk yu'kxpeh:

—Dxi'the kĩh yuhwa jxũmée me'jwe khãabu, ya'ja, vxyu, kaame txã'wẽsatx. Kmiisa yuhwa e'z yu' jxũçxa u'jnuwe. 4 Maa yatte paadejxa' pa'jyã'jçxa', kxteeçxáa paadehna ũsune'kwe txajũ ki' kasehna u'phkaçx. 5 Maa çxhabteya' i'kwe'sxtxi jxpa'gameete', i'kwe'sx çxidate kiwe tuhda's sakweekweçxa kasejene'kwe, kxah Dxus yuwe's makwe jxpa'gameeçxawa, yuuwesa yuutxna jĩnak yu'kxpeh.

6 Txajũ' txãawe'sxa' kasehçxa', çxhab le'çxsũ mtee mteewa jxuka Dxus yuwe's pta'sxna ãçã'satxwa nuykatxhinatx pekũh.

7 Txajũ' ne'jwe'sx Herodesa' Jesus kĩjkĩhwa ew yũuni's jiyuçxa', wala kuh yajkxku, txã'wẽ maaíi yu' Juan Bautistane' uuçxawa ki' ĩtxĩ yuu jĩ'tx txãa pa'ga. 8 Aça' vxite yu', Dxus yuwe's pta'sxsa Eliasne' ki' vxyaa jĩ'tx. Naapkaçxha' vxite we'weçxa': Dxus yuwe pta'sxsawe'sx jwee yaçgaywe'sxne' ki' ĩtxĩ yuu jĩ'tx. 9 Nawa Herodes yu' na'jĩ'k:

—Adxíith Juan Bautista txhikha's kaaspẽ'the'j txãana. Txãameeçxa' jwee yu' ¿kimçxah txakwe kĩjkĩhwa yũuya' ãjãkx? jĩ'k.

Txãasak Herodesa' txakwe uy wẽjẽ' Jesusa's.

10 Jesus kaahnisawe'sxa' ki' sxawedna pa'jçxa', txãawe'sx kĩhçxahne'ta yũu txã'sna pta'sxtxi Jesusa's. Txajũ' Jesusa' txãawe'sxçxáatx fxiite pe'jna u'kh Beçaida çxhab ja'dasu nasa u'pnimeesu. 11 Nawa nasa' jiyuçxa', txãawe'sxwa Jesus e'stey u'jtx. Aça' Jesusa' jxpa'gaçxa', Dxus ma'wẽ jxkaahwa'ja'swa pta'sxku sa' ãçã'satxwa nuykatxhik.

12 Txajũ' kusuçte', Jesus yakh u'jusawe'sx docesa' na'jĩtx Jesus tasxte utxaaçxa:

—Nasatxi' mkaah, çxhabsu paadee yat-su ũ' weyçxa ũ'kahn. Txã'wẽme' ayte' nasa yat utxameesũ ũstha'w jĩte', 13 Jesus pasçxa':

—I'kwe'sxíiwa mpuuçwe jĩk. Aça' txãawe'sx pasçxa':

—Tahç pan, e'z wedxçxáa ji'ptha'w. Kwe'sxa' çxhabna weyya' u'jmeete yu', ãhmeena naazkuẽesatx puuçwa'j jĩtx.

14 Nasa yu', piçthẽ'jçxáa cinko mil ãhtx yu'. Nawa Jesusa' txãa yakh u'jusawe'sxtxi' na'jĩk:

—Cinkwenta txuhdeçxa fxiifxii txaksu mkaaçxi'jwe jĩte', 15 txãawe'sxa' txã'wẽy nasatx jxukay kaykaçxhi'tx. 16 Txajũ' Jesusa' tahç pan e'z wedxtxi jxpa'gana'wa cielute pagayçxa, Dxusna weçxana orãyku. Sa' pe'ltedeçxa txãa yakh u'jusawe'sxtxi ũsku, nasa jxukaysatx ũsu'skahn. 17 Txajũ' jxukaysa ũ'çxa txikte', kijxasaatx doce kanastate utatx pkhakh.

18 Teeçx ente Jesusa' txãa yakh u'jusawe'sx yakhçxáa fxii txuteena u'jçxa Dxusna orãyna u'pçxa', txãawe'sxtxi pẽjxku:

—Nasa' adxa'sa' ¿kimna jĩ'ta? jĩte', 19 txãawe'sx pasçxa':

—Maaí': Juan Bautistana jĩ'tx. Vxite': Eliasna jĩ'tx. Aça' vxite yu': Dxus yuwe pta'sxsa txãniiteywe'sx uuniiçxawa ĩtxĩ yuusaana jĩ'tx jĩte', 20 Jesus pẽjxçxa':

—Txajũ' i'kwe'sxa' adxa'sa' ¿kimna sũjũ'kwe? jĩte', Pedro pasçxa':

—Idxa' Kristo, Dxus tasxu yuusag jĩk. 21 Txajũ' wala neewe'wek Jesusa' Dxus tasxu yuusa Kristo' jĩna maa yuhtxwa pta'sxkahmén.

22 Txajũ' na'wẽk pta'sx:

—Dxus Nçxi'k Nasa Yuusá' wala pkxuuni yuuwa'ja's jxpa'gawa'j pejka peejxyuja', txãa pa'ga judiu nthẽ'jsawe'sx vxite' sacerdote npiiçthẽ'jwe'sx vxite' Dxus leya's kaapiya'jsawe'sx ahçeçxa ikhetxna. Nawa uuçxawa tekh ente' ki' ĩtxĩ yuuna jĩnak pta'sx.

23 Txajũ' jxukaysatx na'jĩk:

—Maawa adx yakh yuu wẽeçxa', peekx kakwe jxthãasni's kĩhnawa jxuka nvxihtçxa yuuçxáa adx yakh yujxa' ãjãne'kwe, makwe pxthaa yuuwa'j seena'sa een isa ma'k pa'jnawa txã'sa' ũukhmée. 24 Maa nasawa naa kiwete ĩtxĩ fxi'zewa'jçxá's ya'nwe'wesa' Dxus yakh fxi'zewa'j yu'sa' ivxiituna. Nawa maa nasawa adx yakh fxi'zepa'gaçxáa naa kiwete ĩtxĩ fxi'zeni's yajkxmée ivxiitusa', Dxus yakh fxi'zewa'j yu'sa' ivxiitumeena. 25 Nasa' naa kiwetewe'sxçxá's jxuka knayçxa', txajx ũus yu's ivxiitute', ¿kĩhte selpiikx, peekx ũus yu's nwe'wemeete'? 26 Maa nasawa adxa's jxpa'gaya' wa'lna adx pta'sxnitxwa wa'lutxna aça' Dxus Nçxi'k Nasa Yuusaawa adx Tata eena' kweethniite Dxus angeleswe'sx yakh jxkaajxa' kĩhçxa', txã'wẽ yũusatxi' jxpa'gaya' wa'luna. 27 Isath we'we', ayte ũssa uuméy uyuune'kwe Dxus jxkaajxa' kĩini's jĩk.

28 Txã'wẽ we'weni teeçx ki'su skhẽwniite', Jesusa' thã'the orãyya' u'kh Pedro, Jakobo, Juan txãawe'sx yakh. 29 Jesusa' orãyna u'piyna, txajx dxi'pa' fxiyku zhiçxkwe yu'ptheh, aça' txajx athni ropawa txã'wẽytxi çxihme kwehnesa yuu. 30 Txajũ' txãa yakha' e'z piçthẽ'jtx puutx we'wena vxyaa, teeçxsa' Moises vxite' Elias txãawe'sxtxi yu'. 31 Jxuka zhiçxkwe eena' kweethni pxãhte Jesus ma'wẽ nxus pxthaa yuuçxa Jerusalente uuwa'ja'stxi we'we'. 32 Pedrowe'sxa' wala dee wẽeçxawa, dehmée u'pçxa' uytxi, Jesus eena' kweethni vxite e'zsa txãa yakh ũssatx. 33 Txajũ' txãa e'z piçthẽ'jwe'sxa' Jesusa's txuteena u'jweçte', Pedro' na'jĩk:

—Ayte' kwe'sx ũswa'j wala ewa', aça' tekh wa' txajaga, teeçxsa' iidx jĩi, vxite' Moises jĩi, vxite' Elias jĩi jĩk.

Nawa Pedro' ũus yuu yajkxméy we'wesaçxáak yu'. 34 Naapkaçxha' tãaph kĩhna'wa, jxuka aphku. Aça' wala ũukhtxi tãaph dxiite neeyũuçxa. 35 Txajũ' tãaph dxiiju na'wẽk we'we:

—Na' adx Nçxi'k wala wedxnisa', aça' txã'sa' nwẽesẽ'jna kxtey myuuwe jĩnik pthũuse.

36 Txã'wẽ we'wenijũ', Jesusçxáa yã'j ũstetx uy. Sa' txãawe'sxa' sxuuna'tx neeyũu, sa' txãn ensu' kim yuhtxwa pta'sxmeeta' txã'wẽ uyni's.

37 Sa' kuskuus enkhẽ', thã'ju kĩjaçte', nasa wala kuh Jesusa's pu'thegya' kasehtx. 38 Aça' teeçx piçthẽ'ja' nasaa ksxavxyte ũssa' sus we'weçxa':

—Adx nçxi'k teeçxçxáa ji'pthu txã'sa' meen theg. 39 Txã'sa' eçx luuku vxit-sa uweçxa kaywẽçxpa'ja'jna kweeyi'jna wala pkxu'k sa' txhwete wẽjẽ'çme'. Txã'wẽ yũute', yuwesu bu'çxçxáak sẽjẽ'. 40 Idx yakh u'jusawe'sxtxi' pxthaa we'weyã'th, txãa eçxa's adx nçxi'k ũusu kutxi'khan. Nawa txãawe'sxa' ãjãmeeta' jĩte', 41 Jesus pasçxa':

—Dxusa' pu'çxhina sũhwa'j yu'sa' ji'phmeesata' naa nasa'. ¿Bagaçxpkaçx i'kwe'sx yakh pu'çxna ũs ya'watka? ¿Bagaçxpkaçx ãjãmée fxi'ze ya'wakwe? Mneejxũh iidx nçxi'ka's jĩte', 42 txãa piçtakxa' Jesus tasxte utxaana kũjũçpkaçxha', txãa eçx luuku vxit-sa' kaywẽçxpa'ja'jçxa pẽtxku. Nawa Jesusa' juuna' we'weçxa eçx luuku vxit-sa's ũusu kutxi'the', txãa piçtakxa' ew katxhik aça' Jesusa' neya's dukhku.

43 Aça' Dxus txakwe wala ew yũute', jxukaysa wala kuh yajkxtxi.

Na'wẽ yũuni's nasa wala kuh yajkxna ũspkaçxha', Jesusa' txãa yakh u'jusawe'sxtxi' na'wẽk we'we:

44 —Na'sa' ew wẽsẽ'jçxa peçxkananuwe: Dxus Nçxi'k Nasa Yuusá's nasa ewmeesa kusete dukhni yuuwa'ja' jĩtewa, 45 txãa yakh u'jusawe'sx yu' jiyuya' ãjãmeeta', txãawe'sx jiyuwa'jmeene' yu' naa pa'ga. Sa' txã'wẽçxawa pẽjx yu' meeta' ũukhçxa.

46 Txajũ' Jesus yakh u'jusawe'sxa' txãawe'sx pwe'sx puutx paapẽyi'tx:

—Ayte' kwe'sx pwe'sx ¿maa wejx jxthaakwe walasakxtha'w? jĩna. 47 Nawa kĩh yajkxçxa txã'wẽ puutx we'weçtewa Jesusa' jiyuçxa', teeçx luuçxkuẽ's txajx pukate txahçxa' na'jĩk:

48 —Adxa's wedxsa' maawa naa luuçx na'wẽsatx ahçemée jxpa'gasa', adxa's jxpa'gasa yuutxna. Sa' adxa's jxpa'gasa', adxa's jxkaahsanawa jxpa'gasa yuutxna. I'kwe'sx pwe'sx maa txã'wẽ ãhmeekwesa na'wẽ yajkxna fxi'zena txãa yuuçxáa jxthaakwe walasa yuuna jĩk.

49 Txajũ' Juan we'weçxa':

—Kwe'sxtxi jxpe'jsa mwẽese'j. Teeçx piçthẽ'j iidx yase's kxsusçxa eçx luuku vxit-sa's nasaa ũusu kutxi'jiçte kwe'sxa' uyçxa', txã'wẽ yũunu jĩnatha'w we'we, kwe'sx yakh u'jusameek yu' naa pa'ga jĩte', 50 Jesus pasçxa':

—Maawa kwe'sxtxi açewe'wesamée yu' kwe'sxtxi pu'çxsa íiçxáatxna, aça' txãawe'sxtxi' kuçx txã'wẽ yuunuwe jĩk.

51 Txajũ' Jesus cielun u'jwa'j en utxaaçte', ũukhmée Jerusalen çxhabna u'jya' kasejk. 52 Sa' u'jweççxa', yaçte yuwe kaakh, aça' txãawe'sxa' Samaria kiwete teeçx çxhabtetx deewa'j yat pakweya' u'j. 53 Nawa txãa çxhabtewe'sxa' Jesus Jerusalenna u'jweçte uyçxa', jxpa'ga wẽemeeta'. 54 Txajũ' txã'wẽ yũute', Jakobo, Juanwe'sxa' Jesusa's na'jĩtx:

—Kwe'sxa' cieluju ipx kaakĩjĩ'jçxa txãa nasatxi' peba jxthãaswaça', kwe'sxa' kxtey yu'nja'w Dxus yuwe pta'sxsa Eliaswa ma'wẽga yũu txã'wẽy jĩte', 55 Jesusa' thegçxa' na'jĩnak yu'kxpeh:

—I'kwe'sxa' jiyu'çmeei'kwe ma'wẽ yũuwa'ja'swa. 56 Dxus Nçxi'k Nasa Yuuçxawa, adxa' nasatx pebaya' yuwe'çmeeth, naasáa nwe'weçxa ewte nvxiht-ya'çxáath kĩh jĩk.

Txajũ' vxite çxhabnatx u'j.

57 Txãawe'sx dxi'the u'jweçte', teeçx piçthẽ'j Jesusa's na'jĩk:

—Jxpe'jsa, idx yakh yuu wẽeth, idx mtee u'jweçtewa jĩte', 58 Jesus pasçxa':

—Yu'kh niimal yuhwa deewa'j kafx ji'phta', aça' vxiçxakuẽwa yat ji'phta'. Nawa Dxus Nçxi'k Nasa Yuusa' mtee yuhwa txajx dxiktheçxáa yuja'swa khikhwa'j ji'phme' jĩk.

59 Txajũ' Jesusa' vxite's pa'yak:

—Adx yakh myuh jĩna.

Aça' txãa pasçxa':

—Jxpe'jsa, mũythãs, adx tata khuẽ'yna pedaaya' u'jweçthu jĩte', 60 Jesus pasçxa':

—Uusaawe'sxa' peekx uusáa pwe'sx ya'pedaatxna. Aça' idxa' Dxus jxkaahwa'j ena'sçxáa pta'sxya' me'j jĩk.

61 Txajũ' vxite' na'jĩk:

—Jxpe'jsa, adxa' idx yakh yuu wẽeth, nawa adx yattewe'sx khuẽ'ytxi neewe'weya' u'jweçthu jĩte', 62 Jesus pasçxa':

—Maawa mjĩia's takhçxaçxáa e'su yu' thegsa' selpimeena Dxus ma'wẽ jxkaahwa'ja'swa pta'sxya' jĩk.