1 Ndipo anyakupimisa mtsonkho na anyakuphonya adakochezana kuti adzamubve. 2 Na tenepo afalizeu na apfundzisi wa mtemo akhang'ung'udzika acimbati: “Munthu omweyu ambatambira anyakuphonya acidya nawo pabodzi.” 3 Tsono Jezu adawatsikira matereya aciti: 4 “Penu m'bodzi wa imwepo ana mabira yace dzana, ndipo m'bodzi n'kutaika, kodi angasiye lini mtsalamo yanango makumi mapfemba na mapfembayo aciyenda kukanyang'ana m'bodziyo mpaka kumuwona? 5 Ndipo iye akamuwona ambam'kupika paphewa aciyenda naye kumui adakondwa. 6 Ndipo iye akafika kumuiko an'kacemera axamwali na anyapafupi wace aciwawuza kuti: 'Abale wangu mbatikondwe thangwe bira wangu akhadataika ndamuwona.' 7 Ndiri kukuwuzani cadidi kuti n'psibodzi-bodzi kuti kudzulu kun'dzakondwedwa na thangwe ra kukhumbula kwa munthu m'bodzi wakuphonya, kuposa makumi mapfemba na apfemba wakulungama omwe an'funika lini kuti akhumbule.”

8 Ayai ni mkazinyi omwe ana kobiri khumi za ndzaya, ikataika ibodzi, iye angasaye kugasa m'bvuniko acipsaira m'mnyumbamo aciinyang'ana bwino-bwino mpaka kuiwona? 9 Ndipo iye akaiwona, ambacemera azixamwali na anyapafupi wace aciwawuza kuti: “Bwerani tikondwe, thangwe kobiri yangu ikhadataika ndaiwona.” 10 Na tenepo ndiri kukuwuzani kuti anjo wa Mulungu ambakondwa na thangwe ra munthu m'bodzi nyakuphonya akakhumbula.

11 Ndipo iye adalewa pomwe kuti: “Munthu m'bodzi akhana wanace awiri. 12 Na tenepo m'ng'onoyo adawuza babaceyo kuti: “Baba! Ndipaseni utaka bwangu.” Ndipo iye adawagawira utakabo. 13 Pomwe zidapita ntsiku zing'ono-ng'ono, mwana m'ng'ono ule adalongedza bzinthu bzacebzo aciyenda kudziko la kutali. Ndipo adakamala kumwaza utaka bwacebo bwentse makhalidwe yace yakhali yapezi-pezi. 14 Pomwe iye adamala kumwaza utaka bwacebo, kudziko limwero kudawoneka njala ikulu kwene-kwene. Na tenepo iye adayamba kubonera na thangwe ra kusaya cakudya . 15 Ndipo iye adayanya ubale kuna munthu m'bodzi wa mudziko limwerire. Na tenepo iye adamutuma kuti ayende kumunda kwace ambakamunyire nkhumba gaga. 16 Ndipo iye ankhafuna kumbadyambo gaga omwe zikhadya nkhumbazo. Tsono pakhalibe munthu omwe akhamupasa cinthu. 17 Na tenepo iye adakumbuka kuti: “Kodi babangu ana anyabasa angasi omwe ambadya acicita kusiya phoso. Tsono ine-pano ndiri kubonera na njala kuno! 18 Na tenepo ndin'dzayenda kuna babanguko ndicikamuwuza kuti: “Baba! Ine-pano ndaphonyera Mulungu wakudzulu na imwepombo. 19 Na tenepo ndiribe kuthemera kuti mundiceme pomwe mwananu tsapano. Ndipo ndiyeseni ninga anyabasa wanuwa.” 20 Ndipo iye adaphata njira aciyenda kuna babaceyo. Pomwe iye akhabwera, babaceyo adamuwona na kutali acimubvera ntsisi. Ndipo iye adathamanga acimukolombexa mkhosi, acimumpsompsona. 21 Pamwepo mwanayo adalewa kuti: “Baba! Ine-pano ndaphonyera Mulungu wakudzulu na imwepombo. Ndipo ndiribe kuthemera kuti mundicemere pomwe mwananu.” 22 Tsono babaceyo adawuza anyabasa wace kuti: “Bweresani bzakubvala bzabwino mumubvazike na kankulumize ! Mubvazikeni pomwe mphetecala kuboboku na xango kundzayoku. 23 Ndipo phatani kamkono kakunenepaka muphe tidye tikondwere. 24 Nakuti mwananguyu akhadafa, tsono iye wamuka pomwe. Ndipo akhadataika tsono iye wawoneka. Ndipo iwo adayamba kukondwera. 25 Tsono mwanace mkulu akhali kumunda. Pomwe iye akhabwera, adafika pafupi na pamuipo adabva nyimbo na wanthu acimbabzina. 26 Ndipo iye adacemera nyabasa m'bodzi acim'bvundza kuti cikhali ciani cimwecire. 27 Na tenepo iye adamutawira kuti: “Ni m'bale wako wabwerera! Ndipo babako wapha kamkono kakunenepa kale thangwe iye wabwera na moyo. 28 Ndipo iye adakalipa na tenepo adalamba kupita. Tsono babaceyo adabula acimupepesa. 29 Ndipo iye adam'tawira babaceyo aciti: “Ine-pano ndiri kutumikirani pano magole mazinji kwene-kwene. Ndipo ndikanati kukuphonyerani mitemo yanu. Tsono imwepo mukanati kundipherambo mbuzi ibodzi yokha kuti ndidyembo na axamwali wangu. 30 Tsono lero mwananuyu wabwera, omwe adamala kudzonga utaka bwanu bwentse na maputa, ndipo imwepo mwamuphera kamkono kakunenepa!” 31 Ndipo babaceyo adamutawira kuti: “Mwanangu. Iwepo na ine tiri pano pabodzi ntsiku zentse. Ndipo bzinthu bzangu bzentse n'psakombo. 32 Na tenepo ndawona kuti bzikhali bwino kuti ife-pano tikondwere.Thangwe m'bale wakoyu akhadafa wamuka pomwe, ndipo akhadataika wawoneka.