11
1 Ngʼaŋo bapa olusaala olupima, nga bandoma baati, “Tiina oje opime Yekaalu lya Hatonda, ŋalala nʼehituuti hyamwo ohene obale nʼabaatu abali hulomberamo. 2 Aye olunya nirwo lulehe otalupima, olwohuba nirwo baluŋa Abatali Bayudaaya abatafugiirira. Abaatu abo balyetaaya mu Yerusaalemu ehibuga ehyabufu, ohuhena emyesi amahumi ane nʼebiri.
3 “Mu hiseera njʼehyene ehyo ndyangala naahena naatuma abahwenda babiri ohulomera abaatu ehibono hyange ehituufu ohuhena endaalo lukumi mu bibiri mu nkaaga. Abahwenda bange abo balyeboŋa ebigwaali ohulaga ti sibasangaafu olwʼebibi ebi baatu bahola.” 4 Abahwenda abo ababiri bali mu hifaananyi hyʼemisaala emizayiti* 11:4 Bano njʼabanaabbi aba Zakaliya galomaho mu Zak 4:3; 13-14. ebiri nʼebihondo byʼetaala ebibiri ebiri mu moni ja Musengwa omuŋugi wʼehyalo. 5 Singa ŋabaŋo agesyaho ohubaholaho ahabi, omuliro guuja huŋwanga mu minwa jaawe, gwasihiirisa abasigu baawe abo. 6 Abaatu abo baaja huba nʼobuŋangi obwʼohusidiha efula ndiyigwa ehiseera hyosihyosi ehi baliba ni balomera abaatu ehibono hya Hatonda. Era nʼobuŋangi obwʼohulagira amaaji gacuuha gafaana hyʼamafugi. Era baaja huba nʼobuŋangi obwʼohudanya hu baatu abamenya hu hyalo endwaye ejibuya abaatu eja hiisi ngeri. Hino ni bahihola hiisi olu baba ni bendire.
7 Ni baliba ni bahenire ohulomera abaatu ehibono hya Hatonda, ogunyaŋa guliŋwera mwiroŋo nago ereeŋi eritahoma, gwasoola ni nabo nga gubaŋangula gubeeta. 8 Emirambo jaawe nga jisigala ni bajigandaahiise mu lulala hu ngira jomu hibuga ehibbala mu ndoma yʼohubbumbirya ehi balanga baati Sodoma ni Misiri olwohuba abaatu baamo bahosi bʼebibi. Mu hibuga ehyene ehyo pomu abaatu bahomereramo Musengwa ya baatu abo ababiri hu musalabba. 9 Abaatu aba hiisi sibo ohuŋwa mu hiisi hiha, hiisi lulimi, era ohuŋwa mu hiisi gwanga hu hyalo balihena endaalo edatu ni baheja huheja hu mirambo jʼabaatu abo ni bataganya bajisiihe. 10 Abaatu abatafugiirira Hatonda balisaŋalya balya nʼebyawe olwʼohufa hwʼabaatu abo bombi. Baliŋeresania ebirabo ni besusania olwohuba mbo abahwenda ba Hatonda abo ababiri abagudyanga ehyalo bafuuye. 11 Aye endaalo edatu nʼehitundu ni jihenire ohubitaŋo, Hatonda alifuuŋa mu baatu abo ababiri omuuya ogwʼobulamu benyoha baba balamu. Hino hiriŋambya abalihyebonera olusisimo. 12 Era baliba bahiiri aŋo nga baŋulira ejanjaasi eryʼamaani ni liŋwera mwigulu ni liranga abaatu abo ababiri liiti, “Muuje eno ŋamugulu!” Era ngʼehireri hibadunda hibaŋira mwigulu, nʼabasigu baawe ni babataayeho emoni.
13 Mu hiseera ehyene ehyo, ŋalibaŋo ohuteetema hwʼehyalo ohwʼamaani. Ehitundu hirala ehyʼehumi ehyʼamayumba gomu hibuga ehyo galitepuluha gaŋwera hwiroba. Abaatu kasanvu nga hasihirihira mu huteetema hwʼehyalo ohwo. Ehyo ni hihenire ohubaŋo, abaatu abasigayeŋo obuti bulibaŋamba, nga batagiha ohujumirya Hatonda ali mwigulu.
14 Ngʼaŋo ehiguudyo ehyohubiri hyosi hiŋwa. Cooka ehyʼahabi ni hiri ti ehyohudatu hyosi hyali hija hulondaho mu hiseera ehitali hya ŋale!
Ohufuuŋa hwʼegwala eryomusanvu
15 Ngʼaŋo malayika owomusanvu afuuŋa egwala lirye. Ni galifuuŋa nga ŋabaŋo amajanjaasi agʼamaani agaŋulirihana ni gaŋwera mwigulu ni ŋaliŋo abaloma baati,
“Hatonda Musengwa nʼOmunoŋosi oyu omwene geeyangalira bangaaye olunya!
Ohuŋwa ŋaahani gaaja huŋuga abaatu bosibosi mu hyalo emirembe nʼemirembe.”
16 Ngʼabasaaja bahulu bala amahumi abiri nʼabane ababa mu moni ja Hatonda, ni behaaye hu tebe jaawe ejʼobuŋugi, nga bahubba amafuha, bajumirya Hatonda, 17 ni baloma baati,
“Huhweyaasa Hatonda Musengwa Omwene buŋangi,
owaaliŋo ohuŋwa ahale nahale era aja hubaŋo emirembe nʼemirembe,
olwohuba wegoboheseeye obuŋangi era otandihire ohuŋuga ehyalo hyosihyosi.”
18 “Abaatu abatahutya bahuluŋira bugali;
nga weesi ehiruŋi hihuŋamba.
Ngʼosalaŋo oti hino njʼehiseera ehyʼohusalira abafu omusango,
nʼohusasula abaŋeeresa babo omuli abanaabbi
nʼabaatu babo bosibosi abahuŋa eŋono,
abahulu nʼabaŋere aŋaŋuma hwabulira omuhemba gwawe.
Era wasalaŋo oti hino njʼehiseera ehyʼohusihiirisa
abo ababaaye ni boononire ehyalo.”
19 Ngʼaŋo begula Yekaalu ya Hatonda mwigulu. Ni bayiigula nga mbonamo esanduuku eyirimo endagaano eyi Hatonda gahola nʼabaatu babe. Nga ŋabaŋo nʼohumesya nʼohwoluuma hyʼohwefula, nʼohubbwabbwanuha hyʼohweraadu, nʼohuteteema hwʼehyalo, nʼamabaale gʼefula ameene amangi gamagaliha hu hyalo.