1 Ano badeh, jo anyolom Nadu Sipsip ta Kindrei tawi buk udu minen, tobwe ndratobo-ei mara-ei. Jo anyolom iy asoh tobwe ari udu bwele-en iu, ma jo anuhun boho lakou ari ma mulin udu bolo oro ma hahuw nane asehek sahou, ma nyaro bohon badeh, i buku kuruh atohou. Iy asehek i buku doh, “Ou ame!” 2 Jo anyolom ja, ma jo atou hos belen ari eme! Ma ndramak ari manyah udu bwele-en, tawi beteleu udu minen. Iri atehei barak ari ta kabin udu batun, tasah iy winiyan ili bolo bahun, arile iri winiyan badai iy bamak bwe. Iy ili anya kamekes bahun hawe iri lau mwan ma badih ado kon munyak. Iy ili badeh, anya kidi iri marakon kano ka-au.

3 Ano ja, jo anyolom Nadu Sipsip ta Kindrei asoh tobwe ari iu ja, eme ma jo anuhun boho lakou ari ma mulin badu bolo oro ma hahuw nane anya. “Ou ame!” 4 Ma jo anyolom hos ari ja, badan saraman asahan! Iri atehei boto-on i ta ndramak manyah udu bwele-en. Iy winiyan tolowei manyah mwasin tiri mwan ma badih badu kon munyak. Ma iy ale winiyan amekes bahun laba tinan asahan. Ma iy winiyan idi iri mwan ma badih amak ano au. Eme ma iri atehei laba samen gwak ari iri aloh bainat, i tan ta amekes gok doh.

5 Idoh ano, jo anyolom Nadu Sipsip ta Kindrei asoh tobwe ari ja nane tobo-ei buk doh iu, idoh ili asahan taloh ai. Eme ma, jo anuhun boho lakou ari ma mulin udu bolo oro ma hahuw nane anya, “Ou ame!” Ma jo anyolom hos ari ja badan bokodon eme asahan! Ma ndramak ari manyah udu bwele-en badeh, tawi sikel ari udu minen. 6 Ma jo anuhun lakou buku boho ari ndramak udu ndrokowa oro lakou ma mulin ma hahuw nane. Iy tiye i buku doh, “Ou ala leheya iri gok tam, ma iri lau kameh niri nyamon bwe. Eme ma ndramas nane iri lau akohok ta len ari, idoh kameh winiyan ta sihinei nadu kun wit ari o nadu kun bali ma taloh le kabwe. Arile, aha salobwai kei olip ma waen mara-ei sa-au, eme ma ndrelekei ta olip hawe waen kameh udu luluwen kahis.”

7 Ano, Nadu Sipsip ta Kindrei asoh tobwe ari ja nane tobo-ei buk iu, idoh ili asahan hahuw ai. Eme ma jo anuhun boho lakou ari ma mulin badu hawe oro ma hahuw nane, asehek i buku doh, “Ou ame!” 8 Jo anyolom ja, ma jo atou hos ari badan nyokowan. Ya ndramak ari manyah udu bwele-en, nyaran Imek. Ano hos ari udu mirihik tan eme ja, ma ndramak ari manyah udu bwele-en badeh, nyaran Jih, o, Ndrahune Iri Lau Ndrasu-u. Iri atehei boto-on i turu ta tukumwi iri mwan ma badih badu kon munyak ranah ma buruwen ala le se ta adai iri. Uru adai iri mwan ma badih ma lunoh limeh (25) badu bolo rinek (100) rakum rakum badu bolo kon munyak. Iri amekes doh badeh, na samen gwak raho, iri aloh bainat, ma son hawe iri sik solo-an ta adai lau amak, ma iri lakou bondriliu badu kon munyak ta adai lau solo-an ano au.

9 Ano ja badeh, jo anyolom Nadu Sipsip ta Kindrei asoh tobwe ari ja iu, idoh i buku limeh ai, nane tobo-ei buk. Eme ma jo atou malawi iri lau mwasin rayah ndramak bwena ndra-au badeh, are bahandra mada koto-ok ta Kindrei. Malawi iri mwan ma badih doh, iri mwena mene ateu sahou ta Kindrei boto-on labai, ma atiye sahou ta budon handru doh, eme ma iri lau adai iri amak. 10 Malawi iri lau mara-ei nane doh, aloh boto-on labai ma ndremenya tiri i buku doh,

11 Ano, Laban tiye, ma iri rayah atehei awin lawe-en belen ili tiri malawi iri lau nane ari, ari ma iri tiye tiri i buku doh, “Aha kamunyau, ma katondrok sese op. Iri kameh adai iri lau taha rayah ala mene amekes gok hawe aha, ma hawe iri nadu tine aha rayah ta Kindrei, i buku le iri mene adai aha amak. Kindrei badeh, ndrandromwei kane lau sabe handru kameh amak, ano badeh, iy baramekes lakou ta bundruwe ndraye aha ai.”

12 Idoh ano le badeh, jo anyolom Nadu Sipsip ta Kindrei asoh tobwe ari ja nane tobo-ei buk iu. Idoh ili asahan i buku onoh ai. Iy amekes i buku doh, ma jo atou ma atona ndroi tinan labai asahan kon munyak. Ma mada an ilik, ma asahan i bokodon mara-ei, i buku kolau bokodon, ma mada bun ale asaram, ma asahan i saraman i buku ndra. 13 Ma iri ndrau mara-ei badu kandrah badeh, taku eme andri kon munyak, i buku buwa kei pik mamakahis, jor laba tinan asahan eme rohoyani ili le bahan. 14 Kandrah ale badeh, amai laleyah, i buku ndrou boholahak iri lukumwiy. Ndroi asahan laba tinan, ma iri mandrei hawe busu mara-ei sosokok au ala rasi ja.

15 Ano ja, jo anyolom iri kabin badu kon munyak mara-ei, hawe iri lau nyara iri tinan, iri kabin ta bwena tiri lau ta bahun, iri nadu batun, iri lau boto-on, iri lau ta amekes gok ta lau rayah buku bonyo-ou, ma iri lau are laleyah. Iri lau mara-ei doh badeh, tone iri ala bolo ndraban, ma mada munu bek udu bolo mandrei.* Iri anoh labai, tasah iri ba-en hamon ta sahou mwasin ta Laban bwe. 16 Iri aloh ili tiri mandrei ma bek mara-ei i buku doh, “Aha katohou kame andri bwele-e ahi, ma katubuluhi ahi kamai ta mada Kindrei, iy manyah udu bada koyeu ta kabin, ma ta losen ta Nadu Sipsip! 17 Tasah, len laba tinan ma losen turu anya kamekes keme tataha ta bundruwe lakou taha amekes badeh, ndrasahan nane dah. Eme ma ari mwan o badih winiyan bales ta losen doh ja bwe!”