19
Iri mwan ma badih sekesek ta Babilon atohou ma andrakak
1 Udu hamon ta lakou nane doh ano, jo anuhun nyaro lakou doh, i buku iri lau solo-an labai asehek sahou boto-on udu bolo kandrah. Boho iri i tinan labai ma iri aloh i buku doh,
Tasah, Laban Kindrei tataha iy le ari mene andrei taha ame hamon.
Nyaran badeh, laba tinan ma iy boto-on labai.
2 Ta mada sahou, Kindrei badeh, aleben ma anuhun iri mwan ma badih ta kandriyen tiri handru ma amwenen mara-ei.
Iy badih tinan ta karei doh mene, bokoro-ei iri mwan ma badih badu kon munyak, ta kandriyen ta mani Kindrei handru, ma ala atudun iri kindrei ta wasai.
Eme ma Kindrei edeu bundruwe iri kandriyen ili hamon i tan.
Iy badih doh mene idi iri lohowan ta Kindrei, eme ma Kindrei edeu bundruwe iri lakou doh ili hamon i tan ja.”
3 Ano ja, boho iri i tinan labai ma iri aloh i buku doh,
“Haleluyah!
Tasah, kasu-er ta jih nane sulumwi kon tinan Babilon,
idoh ili loken i kandrah,
ma ta udu le buku don ai!”
4 Ya, oro batun ma lunoh hahuw (24) hawe oro lakou ma mulin ma hahuw badeh, atehei bwili ndru-u oro i andri ma oro atudun Kindrei, iy manyah udu
bada koyeu ta kabin. Iri marakon asehek i le rasan i buku doh,
“Handru labai! Haleluyah!
Taha badeh, katudun Kindrei le ari!”
Molak ta Nadu Sipsip ta Kindrei ma nyamon tinan asahan
5 Ano, nyaro boho ndramak ari udu loboho bada koyeu ta Kindrei asehek i buku doh,
“Aha lohowan ta Kindrei, aha katudun iy,
aha hawe iri mwan ma badih nyara iri tinan,
ma aha lau nyara aha bwe,
ma aha anoh iy.
Aha mari badeh, katudun nyara Kindrei le ari!”
6 Ano ja, jo anuhun nyaro boho iri lau solo-an labai asehek sahou, i buku nyaro goi laba tinan ma kuruh atohou. Jo anuhun iri asehek sahou i buku doh,
“Haleluyah!
Iy Laban Kindrei tataha,
boto-on marakon udu tan!
Nadah iy udu kabin ta atondrok taha handru!
7 Nadah badeh, ndrine taha kudu mwasin
ma taha kasekesek, ma katudun nyaran!
Tasah, len ta tasou ta Nadu Sipsip badeh, ndrasahan.
Ya, badih tan badeh, ndranyosowani iy.
8 Kindrei atehei awin belen ra-ei i tan,
awin doh mwasin handru en, nyikadin labai,
ma ha-un mara-ei, iy asiniy ili badan.”
Awin belen mwasin doh, i buku kandriyen mwasin, iri lau ta Kindrei amekes.
9 Ano angelo eme asehek tek i buku doh, “Ou torowenei ki buku doh: Are lau, iri aloh iri ta ala ta nyamon tinan ta tasou ta Nadu Sipsip, nyosowa Kindrei udu la-u iri ma iri mara-ei badeh, kasekesek!” Angelo eme asehek ja, “Iri sahou dah badeh, sahou handru ta Kindrei.” 10 Eme ma jo atehei bwili ndru-uk i andri udu mirihik ta kati angelo, ta anya katudun iy, arile angelo anya, “Ndri-iy, ou samekes! Jo badeh, ta amekes gok ta Kindrei hawem, ma jo ale badu hawe nadu tinem oro, oro ala atehei budon toro ki-in ta sahou handru ta Jises asehek. Ou atehei bwili ndru-um ki andri ma ou atudun Kindrei le ari kabwai. Ya taha tanan sahou mara-ei iy asehek, idoh le badeh, suri ndrine iri lau mara-ei ta asehek iri sahou propet.”
Jon anyolom ndramak ari manyah udu bwele-e hos belen
11 Ano ja badeh, jo anyolom kandrah asak, ma hos belen udu aliy. Ya, nyara ndramak manyah udu bwele-e hos doh badeh, i buku, “Ndramak atondrok gok tan mara-ei udu mwasin” ma “Ndramak amekes kandriyen mara-ei badeh, ndra handru ma mwasin le ai.” Na len iy aleben ma anuhun sahou tiri mwan ma badih, ma iy ale alokou ta amekes bahun, iy badeh, in hamon le tiri kandriyen mwasin iy amekes. 12 Madan badeh, anya i buku jih, ma barak tiri kabin solo-an labai badeh, udu batun. Bwilin badeh, iri torowenei nyara lakou ari udu aliy. Iri mwan ma badih badeh, bala tana iri ta moso nyara lakou doh bwe. Iy le ari amwenen badeh, tanan ai. 13 Iy asini awin ari doh, iri lomwaniy na le ndra. Ma iri aloh nyaran badeh, “Sahou ta Kindrei.” 14 Iri lau ta bahun mara-ei badu kandrah badeh, manyah ado bwele-e hos belen, ma sakaliye a-en hamon tan. Iri mara-ei badeh, asini awin ndra belen le, se ndraka-an aliy bwe. 15 Samen gwak raho doh lawe-en, ma madan labai, iri aloh bainat, badeh, udu boho ndramak nane atas eme len. Samen gwak le doh kameh amondroh bale iri mwan ma badih badu kon munyak tinan mara-ei.
“Iy kameh tawi balekei hayen ari udu minen ta atondrok iri mwan ma badih boto-on handru.” Wari 2:9
Ma iy kameh atisih waen na katin udu bolo kun laba tinan. Idoh leheya losen ndra-in labai ta Kindrei, iy boto-on labai. 16 Udu bada awin tan lawe-en, ma bada ndrubulon badeh, iri torowenei nyara lakou ari udu aliy i buku doh,
“Kabin tiri Kabin ma Laban tiri Laban.”
17 Ano ja badeh, jo anyolom angelo ari ales udu bwele-e an. Iy aloh boto-on labai ili tiri sirih mara-ei atah ado bolo asi kandrah, i buku doh, “Aha katukumwi aha mara-ei ka le se, ta nyamon laba tinan ta Kindrei! 18 Aha kameh aimon oda iri kabin mene ndramak, oda iri lau batun ta bahun, oda iri lau boto-on labai ta bahun, oda iri hos, ma oda iri lau nane manyah ado bwele-e iri hos. Aha kameh aimon oda iri lau mara-ei; oda iri lau bonyo-ou, ma oda iri lau ado laleyah, ma oda iri lau nadu batun ma hawe iri lau nyara iri bwe.”
19 Ano ja, jo anyolom nyabwe munyak hawe iri kabin badu kon munyak, ma iri lau tiri mara-ei ta bahun atukum ala le se ta amekes bahun hawe i ndramak nane sakaliye hos hawe iri lau tan ta bahun. 20 Arile, iy ndramak doh tawi nyabwe munyak doh, ma atehei iy udu bolo asiu lulik hawe propet ta wendreya. Iy propet ta wendreya doh mene, amekes iri kalem solo-an ma lahou tinan labai udu mada nyabwe munyak, ma hawe malawin. Ma, na iri kalem solo-an ma lahou tinan doh, iy wendreyani iri lau mene ndrandrei kalem ta nyabwe munyak, hawe atudun malawin. Nyabwe munyak ma hawe propet ta wendreya doh badeh, iri akahei uru ma mulin au ala andri bolo lek ta jih anya na bek solpa, asun uru. 21 Iy ndramak nane manyah udu bwele-e hos tan badeh, mwetehei iri lau ta bahun turu mara-ei ano na samen madan labai, iri aloh bainat nane udu bohon eme len. Ma iri sirih mara-ei ame ani oda iri lau nane doh ano mara-ei, ma ndrine iri irek.
*19:1: Sahou Haleluyah doh badeh, boho iri Hiburu. Moson ta aliy badeh, Taha katudun nyara Kindrei le ari!