5
Sekesek tinan handru
(Luk 6:20-23)
1 Na len iy atou iri lau mari doh iy ili loken bwele-e mandrei, ma iy manyah udu aliy. Eme ya oro lau badu hamon tan ame hawen. 2 Eme ma iy leheya oro, ma iy asehek sahou i toro i buku doh,* Tarou ta Metiu kalan 5-7 taha ndranyolom sahou solo-an labai Jises asehek ta leheya iri mwan ma badih ta nyala iri kandriyen ta tondrok ta Kindrei. Ma hamon, ta tarou ta Metiu kalan 8-9 badeh, taha anyolom iri kundruh ta Jises, iy amekes iri mwan ma badih, sik udu tiri amwenen ja. Udu bolo tarou ta Metiu badeh, Jises asehek sahou ma limeh doh lawe-en labai. Sahou lawe-en doh badeh, udu bolo kalan 5-7, idoh ma mwena handru toro sahou lawe-en ma limeh nane. Jises asehek oro sahou doh badeh, udu bwele-e mandrei ari.
3 “Sekesek handru i toro lau ala ado ndra-in ta budon ma hawe manyah toro,
idah kameh Kindrei atondrok oro
ma oro kameh akohok iri lakou mwasin tan.
4 “Sekesek handru i toro lau ala ado ndra-in ta tikisiy ma ndrelen,
idah kameh Kindrei bahabah oro
ma oro ado ta sekesek handru.
5 “Sekesek handru i toro lau ala batudun oro ma nyara oro le bwe.
Oro kameh akohok iri lakou mwasin badu munyak
i buku le Kindrei ndratandrakan.
6 “Sekesek handru i toro lau ala abadok ta asilah budon mwasin
ma hawe manyah mwasin ta Kindrei i buku oro ameson ta nyamon
ma i buku bale oro amar ta gwa ta a-un,
ya idah kameh oro adih handru.
7 “Sekesek handru i toro lau ala abadok ta amekes kandriyen ta tikisi lau,
ya idah kameh tikisiy ta Kindrei tinan ili bwele-e oro.
8 “Sekesek handru i toro lau ala budon ma kandriyen toro udu mwasin,
ya idah kameh oro atou Kindrei.
9 “Sekesek handru i toro lau ala abadok ta amekes kandriyen mwasin ta mondrei,
ya idah kameh iri aloh oro nadu Kindrei.
10 “Sekesek handru i toro lau ala iri lau adai oro
ma iri tawi oro ma andrei oro ala bolo kou, tasah oro badeh amekes kandriyen mwasin,
ya idah kameh Kindrei kameh atondrok oro
ma oro kameh akohok iri lakou mwasin tan.
11 “Sekesek handru ewek tado tasah, iri lau asehek sahou ta bobose ado ma iri adai ado ma iri asehek sahou ndra-in handru ta wasai ewek tado, tasah ado a-en hamon tek. 12 Ya, ado kasekesek, tasah ndramas mwasin udu kandrah kodo-oh abe-en ado. Idoh i le buku san iri lau ndradai iri propet mene ndrame bwena tado.”
Ndras hawe lomadan
(Mak 9:50; Luk 14:34-35)
13 Jises asehek ili le i buku doh, “Ado kaseben iri lau i buku ndras aseben nyamon ta munyak dah. Arile, i buku nyiminye ndras aliy bwe, ki buku sah handru kameh nyiminye ndras doh kasahan ja? Ndras doh bala mwasin ta i bolo ari nyamon bwai. Mwasin handru ta kakahei
ndras doh ki-iu ma lau katisih na kati iri.
14 “Ado kasahan buku lomadan ta lomada iri lau ado bwele-e munyak. Ya, i buku kon tinan ari udu bwele-e mandrei, iy winiyan baton bwe. Iri lau ado len winiyan atou lomadan. 15 Eme ya iri lau telemei sun, iri batehei bado bahandra bwekei bwe. Iri atehei udu ndrahunen loken, tasah lomadan kameh lomatani lau mari ado bolo asiu. 16 I le buku san dah lomada ado kanya kili bwena ta lau. Ya idah kameh iri lau atou lahou tado ma kandriyen mwasin tado, eme ya iri lau kameh sekesek ma atudun tama ado Kindrei udu kandrah.”
Leheya ta batanau malen
17 Jises asehek ili le i buku doh, “Ya ado sabudon sala buku doh, anya jo eme dah ta akeh batanau malen,† Batanau malen - Jises asehek ta nyala batanau malen ta Moses iy atorou udu bolo buk ndrabun. ma iri propet au, bwe; jo eme dah ta atikah oro au bwe, jo eme dah ta amekes batanau malen abadok ma amekes sahou tiri propet ta Kindrei kabadok ma i handru.
18 “Jo tiye tado handru i buku doh: Idah kameh munyak ma kandrah kameh amai iu. Arile sese kono-o tarou ta batanau malen winiyan bamai ba-au bwe, winiya le lakou mari Kindrei anya kamekes, kasahan i handru.
19 “Ya are lau winiyan banuhun randra sahou nadu bwisik ta batanau malen bwe, ma iy leheya lau ta iri ka-en hamon ta kandriyen tan doh, iy winiyan basahan bala tinan bado ta tondrok ta Kindrei, bwe. Arile, are lau none ma leheya lau ta iri kanuhun ma kamekes batanau malen, iy kameh, aloh nyaran i tinan handru udu bolo tondrok ta Kindrei.
20 “Ya jo katiye tado, ado winiyan ala bolo tondrok ta Kindrei, arile i buku none budon tado handru, ma kandriyen mwasin tado winiyan basakalawi budon ma kandriyen mwasin tiri Parasi ma hawe iri lau ta leheya kandriyen ta Moses bwe, ado winiyan bala bolo tondrok ta Kindrei bwe.”
Adai lau amak
(Luk 12:57-59)
21 Jises asehek ili le i buku doh, “Ado ndranuhun sahou ndrabatanau ndrala tiri lau rebesem bwena,
‘Ou sadai ndramak samak.’ Eksodus 20:13
I buku none are lau idi ari ndramak imek, iy lau doh kameh ales ili ta mada sahou tinan handru. 22 Arile jo katiye handru, i buku none are lau andra-i i hawe nadu tinen, iy kameh ales ili ta mada sahou tinan, ya are lau tiye ili ta nadu tinen i buku doh: ‘Ou badeh, mwasin ta laleyah le,’ ya idah kameh ou ala ales a ta mada sahou tinan ta kansol tiri Isra-el. Ya are lau tiye ili ta nadu tinen i buku doh, ‘Ou lolo-ou,’ ya idah kameh mirihik ou ales ala bolo jih.
23 “Eme ma, i buku none ou anya ala atiye salom tam kili ndrahune salom, ou abudon bwena op, buku nadu tinem badeh iy tan sahou udu tam, 24 ya, ou ruwani salom tam kudu andri bwena ta mada koto-ok op. Ou ala hawe nadu tinem, ou asehek sahou mwasin kili ta nadu tinem, ta leheya ndrine sen tam hawe nadu tinem ndrano ai. Ano ya ou ame barala baradeu salom tam barala bwele-e mada koto-ok ta salom. 25 Buku ari ndramak tan losen udu tam ya iy atehei ou ala ta mada sahou, ou asehek sahou mwasin kili tan suwi na len ah ma la-uh adek san kahis le, bwe kameh iy atehei ou ala mine ndramak ta anuhun sahou, eme ya ndramak ta anuhun sahou atehei ou ala mine iri lulik, ya iri lulik atehei ou ala bolo asiu lulik. 26 Jo katiye tam handru, ou winiyan bame len bwe, winiya le ou sihinei labai na luk in hamon ta maha-an tam.”
Madam salikis
27 Jises asehek ili le i buku doh, “Ya ado ndranuhun sahou mene iri ndrasehek,
‘Ou samekes karei hawe badih tasou.’ Eksodus 20:14
28 Arile, jo katiye kewek tam, ki buku none ari ndramak kanyolom boto-on kili bada ari badih ta amekes budon ndra-in ta karei kili tan, iy ndramak doh ndramesekei karei hawe iy badih doh ndrado ndrinen kabwe. 29 Ya i buku none madam salin suni ou ala bolo kandriyen ndra-in ta karei, ou holowani madam salin keme len, ya ou akahei ki-iu. Mwasin ta ou holowani madam salin ki-iu, ndra-in ta sakahei ou ma buruwen sala bolo jih ta udu le buku doh. 30 Ya, i buku none minem salin suni ou ta amekes kandriyen ndra-in ta karei, mwasin ta ou saniy ki-iu ya ou akahei ki-iu. Mwasin ta ou sani minem salin ki-iu, ndra-in ta sakahei ou ma buruwen sala bolo jih ta udu le buku doh.”
Asan tasou
(Metiu 19:9; Mak 10:11-12; Luk 16:18)
31 Jises asehek ili le i buku doh, “Sahou ndrasehek kabwe,
‘Ya, i buku none ari lau kisan tasou tan ma katikah udun ki-iu, iy katehei ramen la-ukei ma sahou boto-on in aliy ta asan tasou, ya iy katehei ki minen ta asan tasou.’ Dutoronomi 24:1
32 Arile jo katiye ki buku doh, i buku none are lau kisan tasou tan ma katikah udun ki-iu, ya iy badih tan badeh, bamadin hawe ari ndramak ja bwe, iy badeh, amekes udun i buku badih ta madasan. Iy mwan ale andrei badih ari bwena, udun ndratikahei iy, iy ale amekes kandriyen ta karei.”
Sahou tandrakan
33 Jises asehek ili le i buku doh, “Ya idah ado ndranuhun sahou ale ndrasehek ndrala ta lau rebesem bwena ndra-au, ‘Buku ou tandrakan i ta nyara Laban ta amekes sahou tam i handru, ou a-en hamon le ta sahou nane ou amekes ili ta Laban le ari.’ 34 Arile jo katiye tam, ou satandrakan ta amekes iri sahou tam i handru, ndri-iy; ya ou satandrakan kandrah, tasah kandrah badeh kon ndrahu koyeu ta Kindrei manyah udu aliy. 35 Ya ou satandrakan sala ta munyak ale, tasah munyak badeh ta ndrahu kati Kindrei udu aliy. Ya ou satandrakan sala ta Jerusalem, tasah Jerusalem badeh kon ta kabin tinan. 36 Ya ou satandrakan sala ta batum, ndri-iy, tasah ou winiyan bamesekei ramen lami batum asahan belen deh asahan bokodon bwe. 37 Ya buku ou asehek sahou, ‘Ehe,’ ‘Ehe’ le kai-iy ai. I buku ou asehek sahou, ‘Bwe,’ ‘Bwe’ le kai-iy ai. Ya, i buku none iri sahou boto-on labai asahan ja, badeh, asahan ta balik.”
Ou sadeu saluwe kandriyen ndra-in
(Luk 6:29-30)
38 Jises asehek ili le i buku doh, “Ya ado ndranuhun sahou dah ndrasehek i buku doh,
‘I buku none are lau sudi madam eme len, ya ou ala sudi madan keme len ale. Ya i buku none are lau tubwani lihim, ya ou ala tubwani lihin ale.’ Eksodus 21:24; Lebitikus 24:20; Dutoronomi 19:21
39 Arile jo katiye tam, ou sadeu saluwe kandriyen ndra-in ta ndramak are edeu kandriyen ndra-in ewek tam, ndri-iy. Ya i buku none are lau ubwi lim ili kapam salin, mwasin, ou tubuni kapam kamweu kili ja, ya iy kubwi lim ki aliy ale. 40 Ya are lau anya katehei ou ala ta mada sahou ta iy anya kakohok awin tam kili tan, mwasin, ou atehei awin tam lawe-en kili ale. 41 Ya, ki buku none ari lau ta bahun kandrek ou, ma iy anya ou bwese lakou tan a hawen ta ah kadek san winiya kilomita ari, mwasin, ou ala, ah kadek san winiya kilomita la-uh ja. 42 Ya ki buku none ari lau kandremenya ou ta ari lakou tam kili tan, mwasin, ou atehei kili tan. Ya are lau aseken ta akohok lakou tam bwena, ano iy anya katehei kewek hamon ja, mwasin, ou atehei lakou kili tan, ya ou satehei konam sala tan.”
Ou aseken iri lau nane amekes ndra-in ewek tam ale
(Luk 6:27-28; 6:32-36)
43 Jises asehek ili le i buku doh, “Ado ndranuhun sahou dah ndrasehek i buku doh,
‘Ou aseken iri lau badu mirihik tam le amwenen. Ya ou bwalem iri lau amekes ndra-in ewek tam.’ Lebitikus 19:18
44 Arile jo katiye tam, ou aseken iri lau amekes budon ndra-in ewek tam. Ma ou amekes salom ki ta Kindrei ta iy kaseben iri lau amekes ndra-in ewek tam ta adai ou. 45 Ya idah kameh ou asahan nadu Kindrei handru badu loken. Iy edeu an tan anya i bwele-e lau ndra-in ma i bwele-e lau mwasin ale. Ma iy edeu ur tan i bwele-e lau ta kandriyen ma lomondra mwasin, ma i bwele-e lau ta kandriyen ma lomondra ndra-in ale. 46 Ya, i buku ou aseken iri lau le nane aso-ok ou, ya bundruwe lakou tam doh, eme hamon kameh i buku sah bah? Ya iri lau ta kolowa luk ta takis amekes i le buku aliy. 47 Eme ya, i buku none ou asehek sahou mwasin i le ta nadu tinem le amwenen, ya ou asahan mwasin ja tiri lau rayah ja na sasah bah? Ya iri lau badu leheleh amekes ale i le buku aliy. 48 Ou ado le mwasin handru i le buku tamam udu kandrah udu le mwasin handru.”
*5:2: Tarou ta Metiu kalan 5-7 taha ndranyolom sahou solo-an labai Jises asehek ta leheya iri mwan ma badih ta nyala iri kandriyen ta tondrok ta Kindrei. Ma hamon, ta tarou ta Metiu kalan 8-9 badeh, taha anyolom iri kundruh ta Jises, iy amekes iri mwan ma badih, sik udu tiri amwenen ja. Udu bolo tarou ta Metiu badeh, Jises asehek sahou ma limeh doh lawe-en labai. Sahou lawe-en doh badeh, udu bolo kalan 5-7, idoh ma mwena handru toro sahou lawe-en ma limeh nane. Jises asehek oro sahou doh badeh, udu bwele-e mandrei ari.
†5:17: Batanau malen - Jises asehek ta nyala batanau malen ta Moses iy atorou udu bolo buk ndrabun.