1 Saꞌa kaꞌnu ña san jin ni, vi Jitoꞌo, chi ni ndatau ña ni nuu tnundoꞌo,

te tu ni jandetu ni ja vi kuaku ndee ña ñayiu ka kaꞌan uꞌu ña jin san.

2 Ni jikan san ja chituu ña ni jin san, vi Jitoꞌo, ja kuu ni ia Dios maa san,

te ni ndasaꞌa ña ni.

3 Te ni ndatau ña ni jin san ñuu jiꞌi, vi Jitoꞌo san, te ni ndataa ni ja teku san,

nagua ja ma kiꞌin san ja jinkoyuꞌu san nuu yau ñaña.

4 Vi kata ndiꞌi maa ni ja ka kuu ni ñayiu ndaa in yaa nuu ia Dios,

te vi saꞌa kaꞌnu ni ya ja ka ndakaꞌan ni ya ja ia ii kuu ya.

5 Chi nunuu ni kiti ini ya, su nikuii nikani kaꞌan ndaꞌu kaꞌan kee ña ya,

chi tnoꞌo jakuaa ni ka ndaꞌio, te nuu tuu inka kiuu, te ka ndusii inio.

6 Chi nuu kukanu ini san ja oo guaꞌa san, te ni kachi san:

“Tu saꞌun na in kundee nuo ja skanakau ña”.

7 Chi ni chituu ña maa ni jin san, vi Jitoꞌo,

te ni saꞌa yutnu ña ni na kuinio in yuku ndakui,

su nuu ni xndendoo ña ni, te ni yuꞌu san vi ni jinonuu ini san.

8 Te ni kana san nuu maa ni, vi Jitoꞌo, vi ni jikantaꞌu san nuu ni.

9 Chi tu nagua niꞌi ni ja kuu san, te kiꞌin san ja jinkoyuꞌu san nuu yau ñaña,

chi ma kuu ndasaꞌa kaꞌnu ña ñuyaka jin ni,

te ma kuu ndakani ja ia ndaa kuu ni.

10 Konini ni tnoꞌo kaꞌan san, vi Jitoꞌo, te kundaꞌu ini ña ni jin san.

Chindee chituu ña ni jin san, vi Jitoꞌo san.

11 Ni ndasama ni tnoꞌo suchi ini ni tnaꞌa san, te jita jaꞌa san.

Ni xtajioo ni saꞌun ndayi ni oniꞌnu san ja kusuchi ini san, te ni ndusii ini san.

12 Te yun kuu ja kata san yaa ja saꞌa kaꞌnu ña san, te ma kasi yuꞌu san.

Te siun ni kosaꞌa kaꞌnu ña san jin ni, vi Jitoꞌo ja kuu ni ia Dios maa san.