1 Te ni onevaꞌa Noemí in tnaꞌa ndi yii ña ni onani Booz, in tee kuika ndevaꞌa vi in tee kaꞌnu ja ni okuu de tnaꞌa kuikin Elimelec.

2 Te jiñaꞌa Rut, suchi ñuu Moab, nuu Noemí:

―Jikantaꞌu san nuu ni, vi nana, ja kuandetu ni na kiꞌin san nuu ka jitu ñayiu, kondioꞌni a tu na ñayiu kaꞌan ndaꞌu kaꞌan kee ña jin san, te kuandetui ja kondikin san jin ndaxtutu san yoko cebada ―jiñaꞌi.

Te jiñaꞌa ña:

―Kuaꞌan nuu saa, vi seꞌe.

3 Te ni jaꞌan Rut nuu ka jitu ñayiu, te ni ndaxtutui yoko cebada ja ka xndendoo tee ka jaꞌnde yun. Te nase guaꞌa taꞌui ja ñuꞌu nuu ka satniuu ñayiu yun kuu ñuꞌu Booz, tee kuu tnaꞌa kuikin ndi Elimelec. 4 Te nuu saa ni jino Booz ja ni kee de ndee Belén kuaꞌan de, te jiñaꞌa de nuu tee ka jaꞌnde cebada de:

―Jeovaa na koto na kuni ña jin in in ni.

―Jeovaa na chindee chituu ña jin maa ni ―ka jiñaꞌa de.

5 Yun te ni jikan tnoꞌo Booz tee tatnuni nuu tee ka jaꞌnde cebada de:

―¿Na in kuu suchi siꞌi yaꞌa? ―jiñaꞌa de.

6 Te jiñaꞌa tee tatnuni nuu tee ka jaꞌnde cebada yun:

―In suchi siꞌi Moab ja ni ka ndajiokuiin jin Noemí ndee ñuu Moab kui. 7 Te kachi: “Jikantaꞌu san ja kuandetu ni joo na ndaxtutu san yoko cebada ja ka xndendoo tee ka jaꞌnde yaꞌa vi neꞌu nuꞌni cebada yaꞌa”, kachi. Te ni kiui ndee nuneꞌe satniui, te vi ni tu jinkuiin ndee inka vitna ñuꞌni, saa ni kei ndatatu nunui ―jiñaꞌa de.

8 Yun te jiñaꞌa Booz nuu Rut:

―Konini na kaꞌan rin, vi xiku. Ma kiꞌin ron te ndaxtutu ron yoko cebada nuu ñundeꞌi inka ñayiu, ni ma kujioo ron yaꞌa, chi vi kondeka tnaꞌa jin suchi siꞌi ka satniuu nuu rin. 9 Te kondiaꞌa guaꞌa ndenu vi ndayaꞌi ja vi satniui, te kondikin. Chi ja ni tatnuni rin nuu musu rin ja ma vi koxnaꞌa ña de jin ron. Te nuu yichi ron te kuaꞌan nuu ka oo tindoꞌo ndute yun, te koꞌo ndute ja ka tau musu rin ―jiñaꞌa de.

10 Yun te ni chindei Rut nui ndee nuu ñuꞌu, te jiñaꞌi:

―¿Nagua guaꞌa ni saꞌa san, vi xtoo, ja kaꞌan ndaꞌu kaꞌan kee ña ni jin san? Te in suchi inka ñuu kuu san ―jiñaꞌi.

11 Te jiñaꞌa Booz:

―Saa, chi ja ni ka ndakani nuu rin, vi xiku, ndiꞌi naxa saꞌa ron ja jaꞌa nana xiso ron ndee nuu ni jiꞌi ndi yii ron vi ndee vitna. Te ni xndoo ron tata ron vi nana ron vi ñuu nuu ni kaku ron, te vaji ron ja koo ron nuu ka oo ruꞌun ja ka kuu rin ñayiu ja tu na ama jini ron. 12 Te maa Jeovaa na ndajioneꞌe ndajiotaa ya ndiꞌi ja saꞌa ron. Te Jeovaa Dios ñayiu Israel, ia nduku ron ja koto kuni ña ya jin ron, na ndatniuyaꞌu ña ya jin ja saꞌa ron ―jiñaꞌa de.

13 Te jiñaꞌi:

―Jitoꞌo san, ni kaꞌan ndaꞌu ni kaꞌan kee ña ni jin san, chi ni ndataa ni in tnoꞌo ndee ini, te ni kaꞌan luu ndevaꞌa ni jin san, visi ni masu in suchi satniuu nuu ni kuu san ―jiñaꞌi.

14 Te nuu ni jino ore ja vi kaxeꞌin de, te jiñaꞌa Booz:

―Neꞌe yaꞌa na vi kaxeꞌion, xiku, te kiꞌin xtaa yaꞌa te kachiꞌi ron nuu vinagre te kaa ron ―jiñaꞌa de.

Yun te ni jinkoo Rut xiin tee ka satniuu yun, te ni jiñaꞌa Booz ja ni skasun de. Te ni jai vi ndee ni ndutu chii, te vi ni ndoo ka. 15 Te nuu ni ndakoi kuaꞌin ja ndaxtutu kai yoko cebada, te ni tatnuni Booz nuu musu de, te jiñaꞌa de:

―Vi kuandetu ni na ndaxtutu mai yoko neꞌu nuꞌni cebada ja ni ka saꞌa ni yun, te ma vi kuñaꞌa ni jakanoo nui. 16 Te suni vi kuandetu ni ja junkuei maa ndesaa yoko nuu nuꞌni ka saꞌa ni nagua ja na ndaxtutui, te ma vi kuxeen ni nui ―jiñaꞌa de. 17 Saa te ni ndaxtutu Rut yoko cebada yun guaa ndee nuu makunee. Te nuu ni jaxin yoko ni ndaxtutui yun, te ni chitui in chika cebadai. 18 Te ni ndakuisoi cebadai, te kuanoꞌi maa ñuu, te nuu ni ndajinoi, te ni jini nana xisoi nasaa kuaꞌa ni niꞌi. Te suni ni ndataui ja ni ndoo nuu ni jaxeꞌin, te ni jiñaꞌi nuu nana xisoi.

19 Te ni jikan tnoꞌo ña nana xisoi:

―¿Ndenu ni satniuu ron vitna ja vi kuakuaꞌa yoko cebada yaꞌa ni ndaxtutu ron? Na taꞌu na ndetu tee yun ja siun ni chituu ña de jin ron ―jiñaꞌa ña.

Te ni ndakani Rut nuu nana xisoi na ndee tee ni ka satniuu jin, te jiñaꞌi:

―Tee xiin nuu ñundeꞌi ni satniuu san vitna nani Booz ―jiñaꞌi.

20 Te jiñaꞌa Noemí nuu janu ña:

―Jeovaa na koto na kuni ña jin de, chi tu xndendoo ya ja chindee chituu ya ñayiu ka teku nagua ni ochituu ya ñayiu ni ka jiꞌi.

Yun te jiñaꞌa ka Noemí:

―In tnaꞌa yatnio kuu tee yun, in tnaꞌa ja kuu skaku niꞌnu tatatnoꞌo kuu de ―jiñaꞌa ña.

21 Yun te jiñaꞌa ka Rut, suchi siꞌi ñuu Moab:

―Suni kachi tee yun ja na vi kosatniuu ni san jin suchi siꞌi ka satniuu nuu de guaa ndee na vi xndiꞌi de ja vi kaꞌnde de, kachi de ―jiñaꞌi.

22 Te jiñaꞌa Noemí nuu janu ña Rut:

―Vatuka kuu, vi seꞌe, ja vi kokaka ron jin suchi siꞌi ka satniuu nuu de, te ma kiꞌin ron nuu ñundeꞌi inka ñayiu nagua ja ma vi koxnaꞌa ña jin ron ―jiñaꞌa ña.

23 Te yun guaa ni ka ondeka tnaꞌa ni Rut jin suchi siꞌi ka satniuu nuu Booz, ja ni ondaxtutui guaa ndee nuu ni ndiꞌi ni teꞌnde cebada vi triu. Te ni ka oo ni jin nana xisoi.