1 Kaꞌnu kuu Jitoꞌo, ia kuu kava ja jito jini ña ya,

chi maa ya saꞌa tuaꞌa ndaꞌa san vi yindaꞌa san ja ka jaxin tnaꞌa san.

2 Maa ya kuu ia kundaꞌu ini ña jin san, vi maa ya kuu in veꞌe sukun nuu koo guaꞌa san.

Maa ya taa ja ndakui san, vi maa ya skaku niꞌnu ña jin san.

Maa ya kuu kaa tikute ja ndesi niꞌnu ya nuu oo san, te kukanu ini san ya.

Te maa ya kuu ia saꞌa ja ka janyuꞌu ka jandetu ñayiu ñuu san nuu tatnuni san.

3 ¿Nagua ka kuu ñayiu ja kondakani ini ni ja jaꞌi?

Axi ¿nagua ka kuu seꞌe ñayiu ñuyiu ja kondiꞌni ni ja jaꞌi, vi Jitoꞌo san?

4 Te ñayiu, chi ñama ka nai na ni kuinio nuu jaka inio,

te ñama yaꞌa kiuu ja ka tekui na ni kuinio kuandaꞌu ja nunuu ni oo, te naa.

5 Ndakune ni andivi, te makuun ni ndee nuu ñuꞌu, vi Jitoꞌo.

Keꞌe ni xtuu yuku sukun, te na vi kana ñuaꞌa ja ka kai.

6 Tetniuu ni tajan ja na kuun, te katenuu ni ñayiu ka kaꞌan uꞌu ña jin ni.

Skunta ni yutnu ndugua ni, te skunu ni jin na kiꞌinkuei.

7 Skaa ni ndaꞌa ni ndee sukun jian, te ndatau ña ni nuu tnundoꞌo tnaꞌa san,

ja kuu na kuinio nuu jika niꞌi ndute.

Skaku niꞌnu ña ni nuu ndaꞌa ñayiu inka ñuu,

8 ja ka kaꞌin ninoꞌo tnoꞌo tnoꞌo,

te ka kaneꞌi ndaꞌa kuaꞌi ja ka kee yuꞌi ninoꞌo tnoꞌo xndaꞌu ña.

9 Te kata san in yaa jaa nuu ni, vi Dios,

te tee san xtnuu kaxin ja oo uxi tuchi ja kata san yaa nuu ni.

10 Chi maa ni saꞌa ja ka kundee tee ka kuu rey nuu ja jaxin tnaꞌa de.

Te maa ni skaku ña jin san ja kuu san David, tee jinokuechi nuu ni, nuu yuchi kani tee inu kueꞌe ndevaꞌa.

11 Skaku niꞌnu ña ni, vi ndatau ña ni nuu ndaꞌa ñayiu inka ñuu,

ja ka kaꞌin ninoꞌo tnoꞌo tnoꞌo,

te ka kaneꞌi ndaꞌa kuaꞌi ja ka kee yuꞌi ninoꞌo tnoꞌo xndaꞌu ña.

12 Saꞌa ni ja na vi kuaꞌnu seyii san nuu kuechi,

nagua ka jaꞌnu yutnu ndoko ja ka nukuiin tnu nuu ñuꞌu yiꞌi jaꞌan.

Te sesiꞌi san na vi kokui na kuinio in kava ja ni ka tuji vii, ja koo skina veꞌe ja ndukutu in veꞌe tniuu.

13 Te na vi kuꞌun chitu veꞌe san jin ndiꞌi nuu ja vi kokaa san.

Te saꞌa ni ja na vi ndakaya kuaꞌa kiti tata san,

te na vi koo kuaꞌa ndevaꞌa kiti tata san nuu ñundeꞌi san.

14 Te na vi koo ndakui isndiki san ja vi satniuu san jin ti.

Te ma kiukuei ñayiu ja vi suꞌu ñuu san,

te ni ma vi kuiso ña ja kiꞌinkuei san inka ñuu,

te ni ma vi koo ñayiu vi kondaꞌi ja ka tnaꞌi tnundoꞌo nuu ñuu san.

15 Na taꞌu na ndetu ñayiu ja ka oi jin javii javaꞌa yaꞌa,

vi na taꞌu na ndetu ñayiu ñuu ja maa ia Dios kuu Jitoꞌi.