1 Vi kata ni in yaa jaa nuu Jitoꞌo Dios.

Na vi kata ndiꞌi ñayiu ñuyiu nuu Jitoꞌo Dios.

2 Vi kata ni nuu Jitoꞌo Dios, te vi saꞌa kaꞌnu ni ya.

Vi kana ni in kiuu in kiuu ja skaku niꞌnu ña ya.

3 Vi ndakani ni nuu ñayiu ninii ñuu ja ia yeꞌe tajan kuu ya,

te vi kaxtnoꞌo ni tniuu vii tniuu vaꞌa ja saꞌa ya nuu ndiꞌi ñayiu.

4 Chi kaꞌnu kuu Jitoꞌo Dios, te guaꞌa kuu ja koo kuaꞌa jayiñuꞌu nuu ya.

Te na vi koyuꞌu niꞌnu ka ñayiu nuu ya saa nuu ndiꞌi chuꞌchi.

5 Chi ndiꞌi chuꞌchi sava ka ñuu, chi masu nagua ka kuu saꞌun,

su maa Jitoꞌo Dios kuu ia ni saꞌa andivi.

6 Chi vii ndevaꞌa yeꞌe tajan ndiaꞌa ya,

te oo jakaꞌnu ya vi luu ndevaꞌa kaa ini veꞌe ii ya.

7 Vi chiñuꞌu ndiꞌi ñayiu nii ñuu Jitoꞌo Dios.

Vi chiñuꞌu ni Jitoꞌo Dios, chi ia kaꞌnu ia yeꞌe tajan kuu ya.

8 Vi chiñuꞌu ni Jitoꞌo Dios, chi kanuu ja koo jayiñuꞌu nuu ya.

Kuaꞌankuei ni veñuꞌu ya, te vi soko ni nuu ya.

9 Vi chiñuꞌu ni Jitoꞌo Dios nuu luu ndevaꞌa kaa ini veꞌe ii ya.

Te ndiꞌi ñayiu ñuyiu na vi koyuꞌu niꞌnu ña jin ya.

10 Vi kuñaꞌa ni nuu ñayiu nii ñuyiu ja maa Jitoꞌo Dios kuu ia tatnuni,

te ni jani yutnu ya ñuyiu ja ma kanda saꞌun,

te saꞌa ndaa maa ya kuechi ñayiu ndiꞌi ñuu.

11 Te na koo jasii ini andivi, te na koo tnoꞌo sii ini ñuyiu.

Na kana ndute mar ja kusii ini vi ndiꞌi ja oo nuu de.

12 Na koo jasii ini nuu yuku vi ndiꞌi ja oo nuu.

Na vi kata yutnu ka oo nuu yuku ja ka kusii ini tnu.

13 Na vi kata ja ka kusii ini nuu maa Jitoꞌo Dios, ia vaji,

chi vaji ya ja sandaa ya kuechi ñayiu ñuyiu.

Vaji ya ja kaꞌnde ndaa ya kuechi ñayiu ñuyiu jin tnoꞌo ndaa ya.