1 Maa ni ja ka kuu ni ñayiu ñuu san, vi tanuu ni tnoꞌo ja kaxtnoꞌo san nuu ni,

te vi konini guaꞌa ni tnoꞌo kaꞌan san.

2 Chi ndakani san tnoꞌo jaꞌvi,

te kaꞌan san tnoꞌo ja ni yiyuꞌu ndee jananaꞌa yun.

3 Su ja ka jinio tnoꞌo yun,

chi ja ni ka oninio ni ka ndakani ndi tata jaꞌnuo.

4 Te ma vi tayuꞌu tnoꞌo nuu seꞌo, chi na vi kondakanio nuu ndikin tatao ja vajikuei nuu kuee ka,

te siun ni vi kosaꞌa kaꞌnuo Jitoꞌo, te na vi kondakanio jakaꞌnu ya vi tniuu naꞌnu ja ni saꞌa ya.

5 Ni tatnuni Jitoꞌo nuu Jacob vi nuu ndikin tata de ja ka kui ñayiu Israel

naxa vi koo naxa vi kakai, vi ni jiñaꞌa ya ley ya nui.

Te ni tatnuni ya nuu ndi nijaꞌnuo ja na vi kaxtnoꞌo de nuu ndikin tata de,

6 nagua ja na vi kuni ñayiu kikuei nuu kuee ka,

vi na vi kuni seꞌi ja inka vi kakui, te ñayiu yun na vi ndakani nuu seꞌi,

7 nagua ja vi kukanu ini ia Dios, te ma vi ndunaa ini tniuu naꞌnu ni saꞌa ya,

te na vi kuantnoꞌi tnoꞌo ja tatnuni ya,

8 te ma vi kosaꞌi nagua ni ka osaꞌa ndi nijaꞌnui,

ja ni ka okuu ñayiu tu ka jini nagua ka saꞌa, vi ni ka ondakoo siki ia Dios,

vi ni ka okuu ñayiu ja yaꞌa yun ni ja ni ka ondakani ini,

te tu ni ka okuu ñayiu ndaa nuu ia Dios.

9 Te tee ka kuu tatatnoꞌo Efraín, chi visi ka nee de kuji de vi yutnu ndugua de,

su ni ka jino yuꞌu de kiuu ja ni ka jaxin tnaꞌa de.

10 Te tu ni ka skunkuu de tratu ni ka saꞌa de jin ia Dios,

ni tu ni ka kuini de ja vi kondikin de tnoꞌo ni kaxtnoꞌo ya nuu de.

11 Chi ni ka ndunaa ini de tniuu naꞌnu ni saꞌa ya

vi tniuu vii tniuu vaꞌa ja ni xneꞌe ya nuu de.

12 Chi ni saꞌa ia Dios javii javaꞌa jin nuu ndi nijaꞌnu de

nuu ñundeꞌi Zoán ja oo ñuu Egipto.

13 Ni jaꞌnde sagua ya ndute mar, te ni ka yaꞌa ndi nijaꞌnu de,

te ni oyituu guaꞌa ya ndute yun na kuinio in muro.

14 Te tnoꞌo nduu ni ondeka ya ñayiu yun jin in viko,

te niñu niñu tnoꞌo jakuaa ni oyeꞌe niꞌnu in ñuꞌu.

15 Te ni ndata sagua ya kava nuu ñuꞌu teꞌa,

te ni kee in nuu kaꞌnu ndute ja ni jiñaꞌa ya ja ni ka jiꞌi ñayiu Israel.

16 Chi ni saꞌa ya ja ni jinonta in nuu ndute yika kava,

te ni jika de na kuinio yute.

17 Su visi ni saa, te ni ka saꞌa ni de yika kuechi nuu ia Dios,

chi ni ka ndakoo de siki ia oo ndee sukun nuu ñuꞌu teꞌa yun.

18 Chi ni ka kii ini de ja ni ka jito tnuni de ia Dios,

te ni ka jikan de ja vi kaa de vi nagua ka junkuaan ini maa de.

19 Te ni ka kaꞌan kuechi de siki ia Dios, te ni ka kachi de:

“¿A kuu taa ia Dios ndei nuu ñuꞌu teꞌa yaꞌa, te vi junkoo ja vi kao?

20 Chi jandaa ja ni ndata ya kava yun, te ni jinonta ndute ja ni jika de na kuinio in yute,

te ni junkuꞌun de nuu ñuꞌu teꞌa yun. Te vitna, ¿a kuu taa ya xtaa ja vi kao?

¿Vi a kuu taa ya kuñu ja vi kao?”, ka kachi de.

21 Te nuu ni onini Jitoꞌo tnoꞌo yaꞌa, te ni kiti ini ya,

te ni kiti ini ndevaꞌa ya na kuinio in ñuꞌu ja ni jaꞌnu jaꞌnu siki ñayiu Israel ja ka kui tatatnoꞌo Jacob.

22 Chi tu ni ka kukanu ini de ia Dios,

te ni tu ni ka kandija de ja skaku niꞌnu ña ya jin de.

23 Su visi ni saa, te ndee sukun yun ni tatnuni ia Dios nuu viko,

te ni june ya yeꞌe andivi.

24 Te ni saꞌa ya ja ni kuun na kuinio xtaa triu nani maná ja oo ndee andivi yun,

ja ni ka jaa ñayiu ñuu ya.

25 Te ni ka jaa ñayiu xtaa ja ka jaa ia ka jinokuechi nuu Dios,

te ni tetniuu ya ja ni ka jai vi ndee ni ka ndutu chii.

26 Te ni saꞌa ia Dios ja ni jinkiꞌi in tachi ichi andivi ja vaji nuu jinonta nikandii,

te jin jakaꞌnu ya ni saꞌa ya ja ni kii in tachi ichi sur.

27 Te ni saꞌa ya ja ni junkuei kuñu na kuinio sau nuu ka oo ñayiu ñuu ya,

chi ni junkuei kiti ndagua na kuinio ñuti ja nduei yuꞌu ndute mar.

28 Chi ni saꞌa ya ja ni junkuei ti maꞌñu nuu ka ndaa veꞌe ka oi

vi nii xiin veꞌe saꞌun nuu ka oi.

29 Te ni ka jai vi ndee ni ka ndenuu ini,

chi saa te ni skunkuu ia Dios nagua ni ka ondioo ini.

30 Te vi kuini ka ja vi ndutu chii,

chi vi ka jaa ii kai

31 nuu ni kiti ini ia Dios jin ñayiu yun, te ni saꞌa ya ja ni ka jiꞌi ñayiu inu ndakui ka

vi ni ka naa ñayiu guaꞌa ka neꞌu ñayiu Israel.

32 Su visi ndiꞌi yun ni saꞌa ya, su ni ka saꞌa ni ñayiu yun yika kuechi,

te tu ni ka kandijai tniuu naꞌnu ja ni saꞌa ya.

33 Yun kuu ja ni saꞌa ya ja joo ni kiuu ni ka oteku ñayiu yun,

chi ni okuu na ni kuinio nuu jaka inio,

te kuia ja ni ka otekui ni okuu ninoꞌo ni tnundoꞌo.

34 Su nuu ni osaꞌa ia Dios ja ni ka ojiꞌi sava ñayiu yun, te ni ka ondanduku sava kai ia Dios,

saa ndia te vi ni ini ni anui ni ka ondandukui ya.

35 Chi saa te ni ka ondakaꞌin ja Dios kuu ia tavaꞌa ña,

te suu maa ia Dios oo ndee sukun yun kuu ia ni ndatau ña jin.

36 Su masu inu ndijai ja ni ka okaꞌan lui nuu ia Dios,

chi chia inu tnoꞌi.

37 Chi masu ñayiu ndaa ni ka okui nuu ia Dios,

te tu ni ka oskunkui tratu ni saꞌa ya jion.

38 Su visi ni saa, te ni okundaꞌu ini ña ia Dios jin ñayiu yun,

te ni ojakaꞌnu ini ya jakueꞌe ni ka osaꞌi, te tu ni xnaa ña ya jin,

te kuaꞌa jichi ni jaꞌnu niꞌnu ya ja kiti ini ya, te tu ni tetniuu ya tnundoꞌo siki ñayiu yun.

39 Chi ni ndakaꞌan ya ja in ñayiu ñuyiu suaꞌa ni ka kui,

na kuinio nuu junkiꞌi tachi, te yaꞌa kuaꞌan, te tu ndajiokuiin ka.

40 Chi kuakuaꞌa jichi ni ka ondakoi siki ia Dios nuu ñuꞌu teꞌa yun,

te ni ka ojiñaꞌi tnoꞌo suchi ini nuu ya nuu tu na ñayiu ka oo.

41 Te ni ka ondajiokuiin kuaꞌa jichi ni ka ojito tnuni ia Dios,

te ni ka osaꞌi ja ni okiti ini ia Dios ñayiu Israel.

42 Chi ni ka ndunaa ini jakaꞌnu ia Dios

vi naxa ni saꞌa ya ja ni ndatau ña ya nuu ndaꞌa ñayiu ni ka okaꞌan uꞌu ña jin,

43 na ni saꞌa ya tniuu naꞌnu ñuu Egipto

vi ni saꞌa ya javii javaꞌa nuu ñundeꞌi Zoán,

44 vi ni saꞌa ya ja ndute yute Egipto ni nduu niñi,

te tu ni kuu ka vi koꞌo ñayiu ndute yun.

45 Vi ni tetniuu ya kuaꞌa ndevaꞌa chiukun ja ni ka jaa ña ti jin ñayiu Egipto yun,

vi likuara ja ni ka saꞌa ti kuaꞌa jakueꞌe.

46 Vi ni tetniuu ya tika langosta ja ni ka jaa ti ja kee nuu ñundeꞌi

vi ni ka xnaa ti taka ja ka jitu ñayiu.

47 Vi ni saꞌa ia Dios ja ni kuun ñiñi naꞌnu ndevaꞌa ja ni xnaa ña jin tnu uva

vi yuaꞌa xeen ndevaꞌa ja ni teñuꞌu ña jin tnu tichi iuu.

48 Te ni jaꞌni ña ñiñi yun jin ndikachi,

te ni kuun ña tajan jin isndiki, te ni ka jiꞌi ti.

49 Te ni saꞌa ya ja ni ka tnaꞌa ndevaꞌa ñayiu Egipto tnundoꞌo,

chi ni tetniuu ya ja kiti ini ya vi tnoꞌo xeen vi tnoꞌo suchi ini,

ndiꞌi ka kuu na kuinio in yukun kaꞌnu ia ka jinokuechi nuu ya ja vi xnaa ña.

50 Chi ni xneꞌe ia Dios ja kiti ini ya siki ñayiu yun, te tu ni skaku ña ya ja vi kui,

chi ni jandetu ya ja ni ka jiꞌi ñayiu yun ndiꞌi ni nuu kueꞌe.

51 Chi ni saꞌa ya ja ni ka jiꞌi ndiꞌi seyii xtnañuꞌu ñayiu Egipto,

ja ka kui tatatnoꞌo Cam.

52 Yun te ni ndeneꞌe ya ñayiu ñuu ya na kuinio jin in taju ndikachi,

te kuaꞌan ya jin, ichi nuu ñuꞌu teꞌa.

53 Te ni ondeka guaꞌa ña ya jin, nagua ja ma vi koyuꞌi.

Su ñayiu Egipto ja ni ka okaꞌan uꞌu ña, chi ni saꞌa ya ja ni ka saꞌui nuu ndute mar.

54 Yun te ni jino ya jin ñayiu ñuu ya nuu ñuꞌu ii ya,

nuu oo yuku ja ni kindee ya jin jandakui ya nuu ñayiu ni ka oo ñuu yun.

55 Te vi jin nuu ñayiu ñuu ya, te ni skunu ya ñayiu ni ka oo ñuu yun,

te ni jaꞌnde ya ñuꞌu yun ja vi saꞌa jajin ñayiu Israel,

te ni jiñaꞌa ya veꞌe ja ni ka xndendoo ñayiu yun ja vi koi.

56 Su ni ka jito tnuni ñayiu Israel ia Dios, te ni kiti ini ia oo ndee sukun,

chi tu ni ka skunkui tnoꞌo ni tatnuni ya.

57 Chi saa suaꞌa ni ka ndajiokuiin, te ni ka ndakoi siki ia Dios,

nagua ni ka osaꞌa ndi nijaꞌnui, chi inu tnoꞌo ndevaꞌi, nagua saꞌa in kuji ja tu tiuu ndaa.

58 Chi ni ka saꞌi ja ni kiti ini ya nuu ka chiñuꞌi chuꞌchi,

vi ni kuu kuiñu ya nuu ni ka saꞌi chuꞌchi jin yutnu.

59 Te nuu ni jini ia Dios ja siun ka saꞌi, te ni kiti ini ndevaꞌa ya,

te in jichi ni ni skexiko ya ñayiu Israel.

60 Te ni xndendoo ya veꞌe ii ya ja oo ñuu Silo,

ja ni okuu veꞌe saꞌun nuu ni oo ya neꞌu ñayiu Israel.

61 Te ni jandetu ya ja ni ka jiso ñayiu ka kaꞌan uꞌu ña jin ya,

jatnu ii nuu xneꞌe ja ni oo jakaꞌnu ya vi ja yeꞌe tajan ya.

62 Te ni kiti ini ndevaꞌa ya nuu ñayiu ñuu ya,

te ni jandetu ya ja kuaꞌi ni ka jaꞌni ña jin yuchi kani.

63 Te ni ka kai suchi yii kuechi,

te tu na in ni jita ka yaa ja vi tnandaꞌa suchi siꞌi ndutu.

64 Te jin yuchi kani ni ka jaꞌni ña jin sutu,

te tu ni kuu ja vi ndaꞌi ndee ña ñasiꞌi de ja ni ka ndondaꞌu ña.

65 Yun te ni ndakoo Jitoꞌo na kuinio in ñayiu ja ni ndoto nuu kixin,

axi kuu ya na kuinio in tee jaxin tnaꞌa ja ni jini de jin texeen,

te kana kuaꞌan kana vaa de.

66 Te ni kundee ya nuu ñayiu ka kaꞌan uꞌu ña jin ya, te ni ka ndakaka yatai,

te ni ka kendoo kanoi nikuii nikani.

67 Te ni skexiko ya ñayiu ka kuu ndikin tata José,

te tu ni kaji ya ñayiu ka kuu tatatnoꞌo Efraín.

68 Su ni kaji ya tatatnoꞌo Judá,

vi yuku Sión ja kutoo ndevaꞌa ya.

69 Te nuu yuku sukun yun ni saꞌa ya veꞌe ii ya ja sukun na kuinio andivi,

te ni jani yutnu ya ja siun ni na koo nagua oo ñuyiu.

70 Te ni kaji ya David, tee jinokuechi nuu ya,

ja ni okuu de tee ni ojito ndikachi.

71 Te ni xtajioo ña ya ja ma kotaa ka de ndikachi,

nagua ja kokoto de ñayiu ñuu ya ja ka kui ndikin tata Jacob,

ja suni ka kui ñayiu Israel, ja ni saꞌa jajin maa ia Dios.

72 Te ni ojito guaꞌa ña David jin ñayiu ñuu ia Dios

vi ni ondeka ndaa kuiti ña de vi ni ojini de naxa koto ña de.