54
Vi ndakuatuo nuu ia Dios ja na chindee chituu ña ya
Yaa ni tee David nuu ni ka xtuu ña ñayiu ñuu Zif jin de
1 Skaku niꞌnu ña ni jin san, vi Dios, chi ia guaꞌa kuu ni.
Kuiin niꞌnu kuiin sagua ni ja jaꞌa san jin jakaꞌnu ni.
2 Konini ni tnoꞌo kaꞌan san nuu ndakuatu san nuu ni, vi Dios.
Konini ni joo tnoꞌo kaꞌan san jin yuꞌu san.
3 Chi ni ka ndakoo tee inka ñuu siki san,
te ka nduku tee inu yachi ndevaꞌa ini ja vi kaꞌni ña de jin san,
te tu ka ndiꞌni de ja oo ni, vi Dios.
4 Su maa Dios kuu ia chindee chituu ña jin san,
chi maa Jitoꞌo saꞌa ja teku ka san.
5 Te maa ya saꞌa ja nanakau jakueꞌe ka saꞌa ña tee ka kaꞌan uꞌu ña jin san siki maa de.
Xnaa ni de, vi Jitoꞌo san, chi ia ndaa kuu ni.
6 Te soko maa san kiti nuu ni, te saꞌa kaꞌnu ña san jin ni, vi Jitoꞌo san,
chi ia guaꞌa kuu ni.
7 Chi ni skaku niꞌnu ña ni nuu ndiꞌi tnoꞌo suchi ini ja tnaꞌa san,
te ni jini san jin nuu san ja ni xnaa ni tee ni ka okaꞌan uꞌu ña jin san, vi Dios.