1 Ni ondetu kaꞌnu san Jitoꞌo, te ni onini ya tnoꞌo ni jikantaꞌu san nuu ya.

2 Te ni ndatau ña ya nuu yau ja vi ja oo san ja kuu san,

vi ni ndatau ña ya ja ma tnii san nuu ndeꞌi nuu ndoꞌyo,

te ni jani ña ya siki in kava, ja na kaka san nuu ñuꞌu kaji.

3 Te ni tnaa ya in yaa jaa yuꞌu san, in yaa ja saꞌa kaꞌnu san ia Dios mao,

te nuu vi kuni kuaꞌa ñayiu ja saꞌa ya, te vi yuꞌu niꞌnui ya, te vi kukanu ini Jitoꞌo.

4 Na taꞌu na ndetu ñayiu kukanu ini Jitoꞌo,

te tu ndukui ja vi chituu ña ñayiu ka saꞌa teyii mai,

ni ñayiu ka chiñuꞌu chuꞌchi ja masu Dios kuu.

5 Kuaꞌa tniuu vii tniuu vaꞌa saꞌa ni, vi Jitoꞌo ja kuu ni ia Dios maa san,

te vii ndevaꞌa ndakani ini ni ja saꞌa ni jin san,

te tu saꞌun na in kitnaꞌa inuu jin ni.

Te nuu ja na ndakani san, te kaꞌan san ndi in ndi in tniuu saꞌa ni,

te ni ma kenta san ja ndakani san.

6 Chi tu junkuaan ini ni kiti ja ka soko ñayiu ni ndatniuu ja ka soko nuu ni,

te ni tu jikan ni ja vi teñuꞌu ñayiu kiti, ni ja vi sokoi nuu ni, ja konekaꞌnu ini ni yika kuechi.

Su ni june ni soꞌo san ja konini san tnoꞌo kaꞌan ni.

7 Yun te kachi san: “Yaꞌa vaji san, nagua yoso nuu tutu ii ja jaꞌa san,

8 chi junkuaan ini san ja saꞌa san nagua kuini maa ni, vi Dios,

te ini anu san ndiso san tnoꞌo tatnuni ni.

9 ’Te ni ndakani san tniuu ndaa ja saꞌa ni nuu ka ndututu kuaꞌa ñayiu,

te ja jini maa ni, vi Jitoꞌo, ja kaꞌan san, te tu ni jasi yuꞌu san.

10 Te tu ni tayuꞌu san tniuu ndaa saꞌa ni,

chi ni ndakani san ja siun ni skunkuu ndaa ni,

te skaku niꞌnu ni ñayiu.

Te tu ni tayuꞌu tnoꞌo san ja ia ndaꞌu ini vi ia ndaa kuu ni

nuu ka ndututu kuaꞌa ñayiu.

11 ’Ma kuxii ni ja kundaꞌu ini ña ni jin san, vi Jitoꞌo,

te siun ni koto kuni ña ni jin ja kundaꞌu ini ña ni vi tnoꞌo ndaa ni.

12 Chi ni kenta kuaꞌa jakueꞌe siki san ja vini ma kundee san ja kaꞌu san,

ja ni kenta jakueꞌe saꞌa san siki san, te ña kuu ka ja kondiaꞌa san.

Te kuaꞌa ka jakueꞌe yun ni saꞌa san saa ixi xini san,

te kuaꞌan makuita anu san, jini san.

13 ’Tanundaꞌa ni neꞌe ni, ndatau ña ni nuu tnundoꞌo, vi Jitoꞌo.

Neꞌe ñama ni, te chituu ña ni, vi Jitoꞌo san.

14 Saꞌa ni ja na vi kendoo kanoo maa ñayiu ka nduku ja vi kaꞌni ña jin san,

vi na vi kunu nuu ini mai,

te na vi ndajiokuiin kanoo mai, chi ka ndukui ja vi saꞌa ñai jakueꞌe jin san.

15 Te na vi ndakaka yata maa ñayiu ka jaku ndee ña jin san,

ja ka nduu kanoi.

16 Su ndiꞌi ñayiu ka ndanduku ña jin ni, na vi kokusii ndevaꞌa ini nuu ni,

te ñayiu ka kutoo ja skaku niꞌnu ni jin, siun ni na vi kokaꞌin:

Kaꞌnu kuu Jitoꞌo.

17 ’Su sein, visi kundaꞌu san vi kusuchi ini san,

su ma ndunaa ini ña ni jin san, vi Jitoꞌo.

Maa ni kuu ia chituu ña vi ia ndatau ña nuu tnundoꞌo.

Neꞌe ni, te ma kokuu kuee ni, vi Dios.”