1 Jakueꞌe oo ini anu ñayiu kueꞌe kaꞌan nuu anui, te jiñaꞌa:

“Tu yuꞌu niꞌnu ron ia Dios”.

2 Te ndakani ini ja oo jayiñuꞌu nui,

su tu skexikoi jakueꞌe saꞌi.

3 Te ninoꞌo ni tnoꞌo kueꞌe vi tnoꞌo xndaꞌu ña kaꞌin,

te ni xndoi ja ñayiu niꞌnu ini kui, vi ja saꞌa guaꞌi.

4 Te vi ndee nuu katui nuu jitoi, ndakani ini ja saꞌi jakueꞌe,

te vini ja tu kuini ja kujioi nuu ichi kueꞌe, te ni ja xndendoi jakueꞌe saꞌi.

5 Te ja kundaꞌu ini ni ñayiu, vi Jitoꞌo, kenta ndee andivi,

te tnoꞌo ndaa ni, kenta ndee nuu viko.

6 Te tniuu ndaa ja saꞌa ni kuu na kuinio yuku sukun,

te tnundoꞌo ja tetniuu ni nuu sandaa ni kuechi kuu na kuinio in mar ja kaꞌnu vi kunu.

Te maa ni, vi Jitoꞌo, guaa jito jini ni ñayiu vi kiti.

7 Te nase vivii kundaꞌu ini ña ni, vi Dios.

Yun guaa ndiꞌi ñayiu ka nduku kati chii ndijin ni ja kisaꞌu ni jin.

8 Te vi ndenuu ini jin kuaꞌa jaguaꞌa oo veꞌe ni,

te kuñaꞌa ni ndute in yute vii ndevaꞌa ja vi koꞌi.

9 Chi nuu maa ni vaji ja ka teku san,

te vi kuni san jayeꞌe, chi maa ni sieꞌe nuu san.

10 Te kokundaꞌu ini ni ñayiu ka jini ña jin ni,

te saꞌa ndaa ni ja jaꞌa ñayiu ndaa.

11 Te ma kuandetu ni ja vi kuain niꞌnu ña ñayiu inu teyii jin san,

te ni ma vi xtajioo ña ñayiu ka saꞌa jakueꞌe jin san nuu ichi ni.

12 Vi kondiaꞌa ni ja ni ka kanakau ñayiu ka saꞌa jakueꞌe.

Te ni ka ndondisoi, te ma kuu ka ja vi ndakoi.