1 Nuu maa ni kana ndaꞌu san, vi Jitoꞌo san.

2 Kukanu ini ña san jin maa ni, vi Dios,

te ma kuandetu ni ja kendoo san ja kanoo,

te ma vi kuaku ndee ña tee ka kaꞌan uꞌu ña jin san.

3 Chi jandaa ja ni in ñayiu ka ndetu kaꞌnu ña jin ni, ma vi kendoo kanoo saꞌuin,

su na vi kendoo kanoo ñayiu ka ndakoo siki ni, visi masu nagua kuu.

4 Xneꞌe ni ichi ni nuu san, vi Jitoꞌo san,

te kaxtnoꞌo ni ichi kuiñi ni ja na kaka san.

5 Kondeka ña ni ja na kaka san ichi ndaa ni, te kaxtnoꞌo ni nuu san,

chi maa ni kuu ia Dios san ja skaku niꞌnu ña ni,

te ndetu kaꞌnu ña san jin ni ndiꞌi ni kiuu.

6 Konaꞌa ni, vi Jitoꞌo, ja ia vaꞌa ini kuu ni,

chi siun ni kundaꞌu ini ña ni jin san.

7 Te ma kondakaꞌan ni yika kuechi san vi jakueꞌe ja ni saꞌa san nuu lule san,

su konaꞌa ña ni jin san nagua ndaꞌu ini ni, chi ia guaꞌa kuu ni, vi Jitoꞌo san.

8 Ia ndaa vi ia guaꞌa kuu Jitoꞌo,

te yun kuu ja kaxtnoꞌo ya ichi ndaa ya nuu ñayiu ka saꞌa yika kuechi.

9 Te ndeka ña ya jin ñayiu ka saꞌa ndaꞌu mai ja na vi saꞌa ndai,

vi kaxtnoꞌo ya ichi ya nui.

10 Te ndiꞌi ichi kuiñi Jitoꞌo kuu ichi ndaa,

te kundaꞌu ini ya ñayiu ka tavaꞌa tnoꞌo ni kee yuꞌu ya vi tnoꞌo tatnuni ya.

11 Saꞌa ni ja na koo jayiñuꞌu nuu ni, vi Jitoꞌo san,

te konekaꞌnu ini ni yika kuechi san,

chi kuaꞌa ja yaꞌa ja tuku san.

12 Ñayiu ja yuꞌu niꞌnu Jitoꞌo,

chi kaxtnoꞌo maa ya ja kaji na ichi kakai.

13 Te koo vii koo vaꞌi, te kuñaꞌi ñundeꞌi ja vi saꞌa jajin ndikin tatai.

14 Te kaꞌan vii kaꞌan vaꞌa ña Jitoꞌo jin ñayiu ka yuꞌu niꞌnu ña jin ya,

te kaxtnoꞌo ya nui naxa oo tratu ni saꞌa ya.

15 Te siun ni yinuu san nuu Jitoꞌo,

chi maintnoꞌo maa ya, guaa skaku niꞌnu ña ya ja ma kanakau san nuu tnundoꞌo.

16 Kondiaꞌa ni, vi Dios, te kundaꞌu ini ña ni jin san,

chi maintnoꞌo ni maa san oo, te kusuchi ini san.

17 Chi kuaꞌan makaya ja kusuchi ndevaꞌa ini san,

te skaku niꞌnu ña ni nuu tnoꞌo suchi ini yaꞌa.

18 Kondiaꞌa ni tnoꞌo suchi ini vi tnundoꞌo ja tnaꞌa san,

te kuakaꞌnu ini ni ndiꞌi yika kuechi san.

19 Kondiaꞌa ni ja ni ka kaya kuaꞌa ñayiu ka kaꞌan uꞌu ña jin san,

te ka saꞌa xeen ndevaꞌi ja ka skexiko ñai jin san.

20 Koto ña ni, te skaku niꞌnu ña ni,

te ma kuandetu ni ja kendoo san ja kanoo,

chi kukanu ini ña san jin maa ni.

21 Te tniuu ndaa ja saꞌa san vi ja tu na kuechi san,

na koto ña jin san, chi ndetu kaꞌnu ña san jin ni.

22 Skaku niꞌnu ni ñayiu Israel nuu ndiꞌi tnoꞌo suchi ini ja ka tnaꞌi, vi Dios.