1 Kuantnoꞌo tnoꞌo kaꞌan rin, vi seꞌe,

te tavaꞌa tnoꞌo ja tatnuni rin nuu ron.

2 Tavaꞌa tnoꞌo tatnuni rin, te koteku ron,

koto tnoꞌo kaxtnoꞌo rin nagua jito ron tinuu nuu ron.

3 Te kuꞌni na kindee xindaꞌa ron,

vi tee ini anu ron.

4 Te kuñaꞌa nuu tnoꞌo ndichi: “Kuaꞌa rin kuu maa ron”.

Te tnoꞌo ja jinkuiꞌnu inio xnani ron tnaꞌa kuikin ron,

5 nagua ja na skaku niꞌnu ña jin ron nuu ndaꞌa ñaꞌa skindee yii ña

vi nuu ndaꞌa inka ñasiꞌi ja kaꞌan ña tnoꞌo luu ndevaꞌa.

6 Te in jichi oo rin ndee veꞌe rin,

te ndiaꞌa rin nuu ventana rin.

7 Te ni ndiaꞌa rin neꞌu suchi vasa,

te neꞌu suchi kuechi yun ni jini rin in suchi kuechi

ja tu jinkuiꞌnu saꞌun ini nagua saꞌi.

8 Ni yaꞌi ichi yun, te ni kentai in skina,

te ni tuku ni kuaꞌin ichi nuu oo veꞌe ñasiꞌi ja skindee yii ña

9 nuu ja mañini saꞌun yun. Te nuu ni kunee,

te vi suaꞌa ni ka tuu tnui kuaꞌin neꞌu ñunee yun.

10 Te vi sanaa ni, te ni kenta ñasiꞌi yun, ni nutnaꞌa ña jin,

te niꞌnu ña saꞌun ka niꞌnu ñaꞌa ka xiko maa, te saꞌa jani ndevaꞌa ini ña.

11 Chi in ñaꞌa lati ndevaꞌa ja tu jini jakanoo kuu ña

te tu kuu ja koo titiꞌi ña veꞌe ña.

12 Te sava jichi oo ña nuu ichi, te sava ka jichi oo ña nuu yaꞌu,

te ndiꞌi ni skina oo ña, ndetu ña na ndee tee yaꞌa yun.

13 Te ni kakuiko ña suchi kuechi yun, te ni chitu ña nui,

te vi ni ja tu kukanoo ña, te jiñaꞌa ña nui:

14 “Ni kee yuꞌu rin ja soko rin nuu ia Dios ja ndumani rin jin ya,

te vitna kuu kiuu ni skunkuu rin ja ni kee yuꞌu rin.

Te yun guaa oo kuaꞌa ja vi kao veꞌe rin.

15 Yun guaa ni kee rin ja manditnaꞌa ña rin,

chi ni ndioo ndevaꞌa ini rin ja ndakuni ña rin jin ron,

te ni nukuꞌun ña rin.

16 Chi ja ni ndakin vaꞌa rin in saꞌun vii ndevaꞌa

ja kuu lino ja vaji ndee Egipto nuu jito rin.

17 Te ja ni joso rin tatna xiko nuu jito rin,

tatna ja kuu mirra vi áloes vi canela.

18 Neꞌe na vi saꞌa sii inio jin yiki kuñuo guaa ndee na vi ndenuu inio,

na vi kusii vi kuvatu inio guaa ndee na tuu inka kiuu.

19 Chi tu na yii rin oo veꞌe rin,

chi ni kee de kuaꞌan de inka ñuu jika.

20 Te ni kiꞌin de itni nuu ñuꞌu xuꞌun kuaꞌan jin de,

te guaa ndee kiuu ja ndachitu yoo andivi, saa ndajaa de”,

jiñaꞌa ña.

21 Te jin tnoꞌo luu ndevaꞌa ja ni kaꞌan ña

vi ja ni kuu yuchi yuꞌu ña,

te ni kundee ña ja ni jino ini.

22 Te vi nuu saa ni jata ndikin jin ña,

na kuinio in isndiki ja kuaꞌan ti nuu kuu ti,

axi na kuinio in isu ja kanakau ti nuu ndaꞌa tee ka jika yuku ti,

23 guaa ndee na kunjino in yutnu ndugua ndee anu ti,

axi na kuinio in tisala ja kanakau ti nuu ñunu,

te ni tu jini ti ja yun kuu ti.

24 Vitna te konini, vi seꞌe,

kuꞌun ini kuꞌun anu tnoꞌo kaꞌan rin.

25 Ma kaka ron nuu ichi jika ñaꞌa yun,

te ni ma ndoñuꞌu ron nuu ichi chindaa ja jika ña.

26 Chi ja kuu kuaꞌa tee ka tuji ja jaꞌa ña,

te ja ni kuu kuaꞌa ndevaꞌa tee ka jiꞌi ja jaꞌa ña.

27 Chi veꞌe ña kuu ichi ja jaka ña nuu yau ñaña,

ja kuaꞌan ndaa kuiti nuu ka oo ndiyi.