11
Yéesu aassa teeraa Yéerúsaleem na ndam wiyaak
(Mëccëe 21: 1-11; Lúkkaa 19: 28-40; Saŋ 12: 12-19)
1 Waa Yéesu na tëelíbéecaagari deeyussa Yéerúsaleem, ɓa enee ga yahaa dëkaa Betfasee na waa Bétaníi, en ga ɓak tëgëlaa Ólíwíyéecaaɗa, Yéesu wossa ɓoꞌ ɓanak ga tëelíbéecaagari, 2 woꞌꞌaɓa an:
- Karat dëkum en ga fíkíirúuɗa. Ɗú aasi danaa, ɗú hoti cúmbúꞌ-baamaa ɓoꞌ lappii duum, pokuunun daama. Pëkísatti, ɗú haydohhi dii. 3 Ee binaa ɓoꞌ meekissúu an: «Iñum ɗú tum yuma ya?», Taasatti an: «*Haꞌmudii yërí laak sooli ga. Ee ya hayyi kiwosoh dii diima-diima.»
4 Tëelíbéecaa karussa, ɓa laakka cúmbúꞌ-baam ga mbedaa, pokuunun ga fooh ga yahaa hal-kaan daama. Ɓa pëkíssari. 5 Ɓiɓoꞌ ga ɓuwaa ensee daamaɗa woꞌussa tëelíbéecaa an:
- Ɗú tum ya yuma? Iñii tah ya ɗú pëkís cúmbúrii?
6 Ɓa taassa ɓuwaa fodaa daa Yéesu nakeeɓaɗa. Ɓuwaa íisussaɓa, ɓa ɓaa hay. 7 Ɓa haydohiꞌta Yéesu cúmbúraa, ɓa tíkka paltucaagaɓa ga ɗookgaa, Yéesu lappa✡ 11: 7 Mëdírohat na Sakarí 9: 9.. 8 Ɓiɓoꞌ ɓiyewin ɓewussa paltucaagaɓa, larussaca ga ɗook waasaa. Ɓíinoo, ɓaa gúꞌ toy ga tediktaa ga yooncaaɗa, ɓa ɓaa ɓool tuuꞌtaa, ɓaa laꞌta ga waasaa* 11: 8 Man na fodii ga 2 Buuꞌ 9: 13. Iñaama en kilariꞌ ɓoꞌ úuf, doo ya leꞌoo kakay.. 9 Ɓuwaa hanohsee Yéesu fíkíi na ɓuwaa taamsee ga fenoociɗa, ɓéeɓɓa ɓaa woꞌ didóolíꞌ an:
- Óosaanaa! Kooh barkeelat yii hay ga teekii Haꞌmudiiɗa! 10 Kooh barkeelat Nguurii en na kihayɗa, Nguurii caasammbíi Dëwít! Óosaanaa ✡ 11: 9,10 Óosaanaa Malkat Mëccëe 21: 9. aaw ga ɗookaa-ɗook✡ 11: 10 Mëdírohat na Kañcaa 118: 25-26.!
11 Yéesu leꞌꞌa Yéerúsaleem, ya aassa Kaanfaa Kooh. Ga waa ya malakka bi jof, tóoh iñaa laak daamaɗa, ya yaa ƴah Bétaníi na tëelíbéecaagari ɓidaaŋkaah na ɓanakɓaa, lak Kooh yaa hooɓ.
Yéesu coñnja kedikkaa
(Mëccëe 21: 18-19)
12 Ga kooh-wíisfaa, Yéesu na tëelíbéecaa meyohussa Bétaníi, laak Yéesu yaawin. 13 Ya séennda diꞌúsaayíꞌ eenaa kífin. Ya kaꞌta kimalak ati ya hay kihot towu ga. Wayee waa ya deeƴca kedikkaa, ya hottii dara ga, enndii tuuꞌtaanaa. Waama lak ñiidaa een laaki towuɗa leꞌꞌii.
14 Waa ennda ɗa, Yéesu woꞌꞌa kedikkaa an:
- Ken ñamsisoo kowukaa meyoh garaa, bi taaꞌ!
Tëelíbéecaa kelohussa ga iñaama.
Yéesu kaalla toonohcaa ga ɗuuƴ Kaanfaa Kooh
(Mëccëe 21: 12-17; Lúkkaa 19: 45-48; Saŋ 2: 13-22)
15 Yéesu na tëelíbéecaagari leꞌussa Yéerúsaleem. Daa Yéesu aasee Kaanfaa Kooh, ya yaa kaal ɓuwaa ensee na kitoon na ɓuwaa ensee na kilom daamaɗa. Ya yaa ɓúuk taabulcaa weciꞌoh-kopaꞌcaa, na yugaahcaa toonoh-hoꞌcaa† 11: 15 Weciꞌoh-kopaꞌcaa waama, yaawúuꞌcaa meyoh ín haysee Yéerúsaleemɗa weciꞌsee kopaꞌcaagaɓa ga ɓuwaama doonaa ɓa mín kilom júuꞌ kitum sarah ga Kaanfaa Kooh na kifay lempaa Kaanfaa Kooh. Malkat Mëccëe 21: 12.. 16 Ee ya íiséeríi ken kiɓay yen na kikooroh nawa ga ɗuuƴ Kaanfaa Kooh. 17 Lëehíꞌta ya yaa jëgíꞌɓa fodii dii:
- Bíduunun ga Këyítfaa Kooh an: «Kaanndoo teeksan kaanfaa heetcii tóoh kíimohohsan Kooh»? Wayee ɗú, ɗú tumwa ɗaakkaaꞌ lok!✡ 11: 17 Mëdírohat na Ísayíi 56: 7; Yérémíi 7: 11.
18 Daa sarahohcaa ɓiyaakɓaa na jëgíroh-waascaa yéeŋsee iñaa laakee yaama, ɓa niikkari ndaga lak ɓuwaa tóoh waaruꞌuunun ga jëgírohaagari. Fodaama, ɓa ɓaa heel daa ɓa tuman bi ɓa apluk Yéesu.
19 Ga waa nohaa soossa, Yéesu na tëelíbéecaagari meyohussa teeraa.
Kedikkaa coñseeɗa súɓpa
(Mëccëe 21: 20-22; Saak 2: 16-18; 1 Saŋ 5: 14-15)
20 Ga daa Yéesu na tëelíbéecaagari koorohsee ga kímaa cuutɗa, ɓa hotta eenaa Yéesu cojeeɗa súwin kaw bi ga níilcaa. 21 Peeꞌ níindísukka iñaa laakeeɗa, ya woꞌꞌa Yéesu an:
- Jëgírohii, malka, eenii fu cojeeɗa súwin.
22 Yéesu woꞌꞌaɓa an:
- Gëmat ga Kooh. 23 Mi woꞌꞌúuka ee kayoh; Binaa ɓoꞌ woꞌ jaŋjagii wii an: «Kolkohaa dii, fu jafuk ga ɗuuƴ giiƴ», ya hay kitookɗu iñaama, binaa ya laakkii hel kanak ga, ee ya gëm an iñaa ya woꞌɗa hay kilaakaa. 24 Kërí tah mi woꞌꞌúu man: Ɗú en ga kikíim Kooh ya onndúu yenaa, gëmat an ɗú laasin ga, en ɗanaa ɗú hay kitookɗu iñaa ɗú kíimɗa. 25 Ee bëríinaa ɗú tuuk kikíim Kooh ɓéeɓ, en lak ɗú abin mooroommbúu aylukaa, bayalatti, doonaa Paammbúu yii ga ɗookɗa bayallúu ɓan tooñciigarúu. [ 26 ]‡ 11: 26 Woꞌeencii ciima hotukkii ga këyít ciyewin ga këyítcaa ɗeɓ kibíduɗa. Malkat Mëccëe 6: 15.
Yéesu meekisohussa ɓa onndi doolaa ya ɓayɗa
(Mëccëe 21: 23-27; Lúkkaa 20: 1-8)
27 Yéesu na tëelíbéecaa soofussa Yéerúsaleem. Ee ga daa Yéesu enee na kitíidisuk ga Kaanfaa Koohɗa, sarahohcaa ɓiyaakɓaa, jëgíroh-waascaa na yaakcaa hayussa gari. 28 Ɓa meekissari an:
- Iñcii fu tumɗa, fu aƴca ga ɓa? Ɓii onndaa dooli kimínca kitum ɓa?
29 Yéesu taassaɓa an:
- Mi hayyúu kimeekisoh enaama yíinoo ɓan. Ɗú taassoo ganaa, mi woꞌꞌúu iñcii mi tumɗa ati mi aƴca ga ɓa? 30 Ɓii yiida wosee Saŋ kibëtísiꞌ ɓuwaa✡ 11: 30 Malkat 1: 4-5. ? Kooh wala ɓoꞌ-súusúus? Taasattoo?
31 Wayee ɓa ennda ga kiwoꞌ ga díkaantiɓa an:
- Binaa ɗu taas an Kooh yërí woseerinaa, ya hay kiwoꞌ an «Iñii tah ya ɗú gëmmbii ga Saŋ?» 32 Ee binaa ɗu woꞌ an ɓuwii ɓërí woseerinaa…
Ɓa niikeera mbooloomaa ndaga ɓéeɓɓa tíksee Saŋ sëldíigaa Kooh.
33 Waa ennda ɗa, ɓa taassa Yéesu an:
- Ɗí ínohoo.
Yéesu woꞌꞌaɓa an:
- Haa, mi ɓan, mi woꞌoorúu iñcii mi tumiɗa ati mi aƴca ga ɓa?
✡11:7 11: 7 Mëdírohat na Sakarí 9: 9.
*11:8 11: 8 Man na fodii ga 2 Buuꞌ 9: 13. Iñaama en kilariꞌ ɓoꞌ úuf, doo ya leꞌoo kakay.
✡11:10 11: 9,10 Óosaanaa Malkat Mëccëe 21: 9.
✡11:10 11: 10 Mëdírohat na Kañcaa 118: 25-26.
†11:15 11: 15 Weciꞌoh-kopaꞌcaa waama, yaawúuꞌcaa meyoh ín haysee Yéerúsaleemɗa weciꞌsee kopaꞌcaagaɓa ga ɓuwaama doonaa ɓa mín kilom júuꞌ kitum sarah ga Kaanfaa Kooh na kifay lempaa Kaanfaa Kooh. Malkat Mëccëe 21: 12.
✡11:17 11: 17 Mëdírohat na Ísayíi 56: 7; Yérémíi 7: 11.
‡11:26 11: 26 Woꞌeencii ciima hotukkii ga këyít ciyewin ga këyítcaa ɗeɓ kibíduɗa. Malkat Mëccëe 6: 15.
✡11:30 11: 30 Malkat 1: 4-5.