1 अले जिं सियोन पर्वतय्‌ भ्‍याःचा दनाच्‍वंगु खना। वय्‌कः व वय्‌कःया बाःयागु नां कपालय्‌ च्‍वया तःपिं छगू लाख व पीप्‍यद्वः मनूत वय्‌कः नाप दु।* १४:१ इज ९:४; प्रका ७:३ 2 अले यक्‍व लःयागु सः व तसकं न न्‍याःगु सः थें च्‍वंक स्‍वर्गं धया हःगु छगू तःधंगु सः जिं ताल। थ्‍व सः यक्‍व वीणा थाःगु सः थें नं च्‍वं।

3 सिंहासन, प्‍यम्‍ह जीवात्‍मा, व थकालिपिनिगु न्‍ह्यःने च्‍वनाः इमिसं छपु न्‍हूगु म्‍ये हालाच्‍वन। पृथ्‍वीं मू पुलाः लिफ्‍याना हःपिं छगू लाख व पीप्‍यद्वः मनूतय्‌सं जक व म्‍ये हाले सः, मेपिन्‍सं मसः। 4 थुपिं मिस्त नापं लसपस मजूनिपिं च्वखपिं खः। थुपिं भ्‍याःचायागु जक ल्‍यू ल्‍यू जुइपिं खः। परमेश्वर व भ्‍याःचायागु लागि संसारं लिफ्‍याना हःपिं दकलय्‌ न्‍हापायापिं मनूत, थुपिं हे खः। 5 इमिगु म्‍हुतुइ मखुगु खँ धयागु मदु, इमिगु नुगः यचुसे च्‍वं।* १४:५ सप ३:१३

6 अले छम्‍ह स्‍वर्गदूत आकाशं आकाशं ब्‍वया जूगु जिं खना। वं पृथ्‍वीइ च्‍वंपिं फुक्‍क जातियापिं मनूतय्‌त, कुलयापिं मनूतय्‌त, थी थी भासं नवाइपिं मनूतय्‌त, व देश देशयापिं मनूतय्‌त न्यंकेत न्‍ह्याबलें दयाच्‍वनिगु भिंगु खँ ज्‍वनावया च्‍वंगु दु। 7 वं ततसलं थथे धाल -- “परमेश्वर खनाः ग्‍या। वय्‌कःयात तःधंकि। वय्‌कलं मनूतय्‌त न्‍याय याइगु ई वये धुंकल। स्‍वर्ग, पृथ्‍वी, समुद्र व लःयागु बुंगाः सृष्‍टि यानादीम्‍हय्‌सित आराधना या।”

8 वयागु ल्‍यू ल्‍यू वःम्‍ह मेम्‍ह स्‍वर्गदूतं थथे धाल -- “नाश जुल, तःधंगु शहर बेबिलोन नाश जुल। थःम्‍हं याःगु बांमलाःगु ज्‍या मेमेगु देशयापिं मनूतय्‌त नं याके ब्‍यूम्‍ह थ्‍व हे शहर खः।”* १४:८ यशै २१:९; यर ५१:८; प्रका १८:२

9 हानं वया ल्‍यू ल्‍यू वःम्‍ह स्‍वम्‍हम्‍ह स्‍वर्गदूतं ततसलं थथे धाल -- “सुनानं पशुयात व वयागु मूर्तियात पुजा याःसा, वयागु कपालय्‌, अथबाः ल्‍हातय्‌ चिं तयेका च्‍वंसा, 10 अज्‍याःपिन्‍सं परमेश्वरयागु तःधंगु तं छुनं ल्‍वाकछ्याना मतःगु ख्‍वल्‍चां त्‍वने माली। अज्‍याःपिन्‍सं मि व गन्‍धक दुथाय्‌ पवित्रपिं स्‍वर्गदूततय्‌गु व भ्‍याःचायागु न्‍ह्यःने च्‍वनाः सास्‍ति नया च्‍वने माली।* १४:१० यशै ५१:१७; उत १९:२४; इज ३८:२२ 11 इमिसं सास्‍ति नया च्‍वंथासं वःगु कुँ न्‍ह्याबलें च्‍वय्‌ थहां वनाच्‍वनी। इमिसं चच्‍छि न्‍हिच्‍छि दुःख सिया च्‍वने माली। व पशुयात व वयागु मूर्तियात पुजा याक्‍वसित, अले हानं वयागु नांयागु चिं काक्‍वसित नं अथे हे याइ।”* १४:११ यशै ३४:१०

12 परमेश्वरयागु आज्ञा मानय्‌ याइपिं व येशू ख्रीष्टयात विश्वास याना मत्‍वःतूपिं विश्वासीतय्‌सं सह याः कि मयाः धकाः थुकिं हे सी दइ।

13 अले हानं जिं स्‍वर्गं थथे धयाहःगु सः ताल -- “थ्‍व खँ च्‍व, आवंनिसें प्रभुयात विश्वास यानाः सीपिं मनूत धात्‍थें हे धन्‍यपिं खः।” आत्‍मां नं धयादिल -- “धात्‍थें खः, आः इमिसं थःगु ज्‍यां झासु लने खनी, छाय्‌धाःसा इमिगु ज्‍यायागु फल इमिगु ल्‍यू ल्‍यू वयाच्‍वनी।”

14 अले हानं जिं तुयुगु सुपाँय्‌ खना। छेनय्‌ लुँयागु श्रीपेच दुम्‍ह, ल्‍हातिइ ज्‍वःगु ईंचा ज्‍वनातःम्‍ह मनूया काय्‌ थें च्‍वंम्‍ह छम्‍हय्‌सित सुपाँचय्‌ खना।* १४:१४ दान ७:१३

15 सुपाँचय्‌ च्‍वंम्‍हय्‌सित देगलं पिहां वःम्‍ह छम्‍ह स्‍वर्गदूतं थथे धकाः ततसलं धाल -- “पृथ्‍वीइ च्‍वंगु बालि बांलाक पाकय्‌ जुइ धुंकल, बालि लयेगु ई जुइ धुंकूगुलिं ईंचां बालि लयादिसँ।”* १४:१५ योए ३:१३ 16 अले सुपाँचय्‌ च्‍वंम्‍हय्‌सिनं पृथ्‍वीइ ईंचा संकल, अले पृथ्‍वीइ बालि लये सिधल।

17 हानं मेम्‍ह हे छम्‍ह स्‍वर्गदूत स्‍वर्गय्‌ च्‍वंगु देगलं पिहां वल। वयाके नं ज्वःगु ईंचा दु। 18 मेम्‍ह छम्‍ह स्‍वर्गदूत होम यायेगु थासं पिहां वल। थ्‍वयाके मियागु अधिकार दु। अले ज्वःगु ईंचा दुम्‍हय्‌सित थ्‍वं ततसलं धाल -- “पृथ्‍वीइ च्‍वंगु दाख ईंचां लया का, दाख पाकय्‌ जुइ धुंकल।” 19 अले व स्‍वर्गदूतं थःगु ईंचा पृथ्‍वीइ संकल। अले दाख लयाः मुंकल। थ्‍व यंकाः परमेश्वरयागु तंयागु तःधंगु दाख तिस्‍सिगु थासय्‌ वांछ्वत। 20 शहरं पिने यंकाः दाख तिस्‍सिल। दाख तिस्‍यूबलय्‌ सलयागु गःपः तक जायाः स्वसः किलोमिटर तक हि बाः वन।* १४:२० यशै ६३:३; विलाप १:१५; प्रका १९:१५