1 विश्रामबारया कन्‍हय्‌ खुन्‍हु सुथ न्‍हापां मरियम मग्‍दलिनी व मेम्‍ह मरियम चिहानय्‌ स्‍वः वन।

2 अबलय्‌ आकाझाकां तसकं भ्‍वखाय्‌ ब्‍वल। अले परमेश्वरया छम्‍ह दूत स्‍वर्गं वयाः प्‍वाः तिनातःगु ल्‍वहं चीकाः उकी द्यःने च्‍वन। 3 वयागु ख्‍वाः हावलासा च्‍याःगु थें थी, वसः नं च्‍वापु थें त्‍वइसे च्‍वं। 4 थ्‍व खनाः पिवाः च्‍वना च्‍वंपिं सिपाइँत ग्‍यानाः सी थें च्‍वन।

5 व स्‍वर्गदूतं स्‍वः वःपिं मिसातय्‌त थथे धाल -- “छिपिं ग्‍याये मते। छिपिं क्रूसय्‌ यख्‍खायाः स्‍याःम्‍ह येशूयात स्‍वः वःपिं धकाः जिं स्‍यू। 6 येशू थन मदी। वय्‌कलं धयादीथें वय्‌कः सीम्‍हं म्‍वाना वये धुंकल। प्रभुयात तयातःगु थाय्‌ स्‍वः वा। 7 याकनं वनाः वय्‌कःया चेलातय्‌त थथे धया ब्‍यु -- ‘वय्‌कः म्‍वाना वये धुंकल। वय्‌कः छिपिं स्‍वयाः न्‍हापां गालीलय्‌ थ्‍यंकादी। अन छिमिसं वय्‌कःयात खनी।’ जिं धयागु थ्‍व खँ ल्‍वःमंके मते।”

8 इपिं ग्‍या नं ग्‍यात, अले लय्‌ नं ताल। अले इपिं अनं हथाय्‌ पथासं चेलातय्‌त थ्‍व खँ कनेत ब्‍वाँय्‌ वन।

9 येशूं इमित नाप लानाः “छिमित शान्‍ति दयेमा” धकाः धयादिल। इमिसं न्‍ह्यःने वनाः वय्‌कःयागु तुति ज्‍वनाः भ्‍वपुल। 10 “ग्‍याये मते, छिमिसं वनाः जिमि किजापिन्‍त ‘गालीलय्‌ हुँ’ धकाः धया ब्‍यु। अले अन हे इमिसं जितः खनी” धकाः वय्‌कलं इमित धयादिल।

11 इपिं वने धुंकाः पिवाः च्‍वंपिं गुम्‍हं गुम्‍हं सिपाइँतय्‌सं शहरय्‌ वनाः अन जूगु खँ फुक्‍क तःधंपिं पुजाहारीतय्‌त कना बिल। 12 तःधंपिं पुजाहारीतय्‌सं थकालिपिं लिसे सल्‍लाह साहुति यानाः व सिपाइँतय्‌त धिबा नकाः थथे धकाः खँ स्‍यन -- 13 “छिमिसं ‘जिपिं द्यना च्‍वनाबलय्‌ येशूया चेलातय्‌सं वयाः वयागु सीम्‍ह खुया यंकल’ धकाः धा। 14 छुं जुयाः पिलातसं थ्‍व खँ सिल धाःसां जिमिसं वयात ह्यय्‌के। छिमित छुं नं जुइ मखु, छिपिं ग्‍याये मते।” 15 पिवाः च्‍वंपिं सिपाइँतय्‌सं धिबा कयाः इमिसं स्‍यंथें यात। आः तकं यहूदीतय्‌सं थ्‍व हे खँ धया वयाच्‍वंगु दु।

16 झिंछम्‍ह चेलात येशूं धयादीगु गालीलयागु पहाडय्‌ वन।* २८:१६ मत्ती २६:३२; मर्क १४:२८ 17 इमिसं वय्‌कःयात खनेवं वय्‌कःयागु तुतिइ भ्‍वपुल। छम्‍ह निम्‍हय्‌सिनं धाःसा वय्‌कः हे खः ला मखु ला धकाः संका यात।

18 वय्‌कलं इमिगु न्‍ह्यःने वयाः थथे धयादिल -- “संसार व स्‍वर्गयागु फुक्‍क अधिकार जितः बियातःगु दु। 19 अय्‌जूगुलिं छिपिं वनाः फुक्‍क जातियापिं मनूतय्‌त चेला दय्‌कि। अले इमित परमेश्वर बाःयागु नामं, काय्‌यागु नामं व पवित्र आत्‍मायागु नामं बप्‍तिस्‍मा ब्‍यु।* २८:१९ प्रे १:८ 20 अले जिं स्‍यनाथें छिमिसं इमित स्‍यनेकने यानाः फुक्‍कं खँ मानय्‌ याकि। न्‍यँ, संसार फुना मवंतले जि छिपिं नाप हे दइ।”