6
नोआ व खुसिबाः वःगु
(६:१–९:२८)
1 पृथ्वीइ मनूत यक्व दयावल, अले इमि म्ह्याय्पिं नं यक्व दयावल। 2 परमेश्वरया काय्पिन्सं मनूतय् बाबांलाःपिं म्ह्याय्पिं खनाः थःत यःयःपिं ल्ययाः ब्याहा यानाः यंकल। 3 अले परमप्रभुं धयादिल-- “जिगु आत्मा मनूतय्गु नुगलय् सदां च्वनि मखु। छाय्धाःसा इपिं सदां दइपिं मखु। आवंलि इपिं १२० दं अप्वः म्वाइ मखु।”
4 उबलय् व वयां लिपा तक नं पृथ्वीइ नेफिलिनत दुगु खः। परमेश्वरया काय्पिं व मनूतय् म्ह्याय्पिनि पाखें मस्त दत। इपिं उबलय्या बल्लाःपिं व नांजाःपिं खः।
5 पृथ्वीइ च्वंपिं मनूत मभिनावःगु व इमिगु नुगलय् न्ह्याबलें मभिंगु खँ जक थानाच्वंगु खनाः परमप्रभुं थःम्हं 6 पृथ्वीइ मनूत सृष्टि यानागुलिं पस्ताय् चायादिल। वय्कलं तसकं नुगः मछिंकादिल। 7 अले परमप्रभुं धयादिल-- “जिं सृष्टि यानापिं फुक्क मनूतय्त पृथ्वीं न्हंकाछ्वयाबी। अज्ज ला फुक्क पशु, घिसय् जुइपिं जन्तुत व आकाशय् च्वंपिं पंक्षीतय्त तकं न्हंकाछ्वयाबी। छाय्धाःसा थुमित सृष्टि यानाः जि पस्ताय् चाये धुन।” 8 नोआ खनाः धाःसा परमप्रभु लय्तायादिल।
नोआं परमेश्वरयात लय्ताय्कूगु
9 नोआया खँ थथे दु-- नोआ उगु इलय्याम्ह धर्मीम्ह व छुं दोष मदुम्ह मनू खः। व परमेश्वरं धाःथें जुइम्ह खः। 10 वया स्वम्ह काय् दु - शेम, हाम व येपेत† 6:10 हिब्रू भासय् येपेत खँग्वः ‘यक्व दये’ खँग्वःलिसे ज्वःलाः।।
11-12 परमेश्वरं पृथ्वीइ स्वयादीबलय् पृथ्वीइ च्वंपिं फुक्क मनूत मभिंपिं जुयावःगु व न्ह्याथासं ल्वापुख्यापु जक खनादिल। 13 अले परमेश्वरं नोआयात धयादिल-- “पृथ्वीइ च्वंपिं फुक्क मनूतय्त जिं न्हंकाछ्वयेगु क्वःछीधुन। जिं इमित पृथ्वी नापं सुचुक न्हंकाछ्वये। छाय्धाःसा पृथ्वी इमिगु ल्वापुख्यापुं जायेधुंकल।
14 “छं भिंगु सिँयागु जहाज छगू दय्कि। उकी दुने क्वथा दय्कि। अले उकिया दुनेपिने अलकत्रां पा। 15 छं उकियात १५० मिटर हाकः, २५ मिटर ब्या व १५ मिटर जाः यानाः दय्कि। 16 जः वय्केत जहाजया च्वय् छकु ति त्वःताः पौ दय्कि। जहाजयात स्वतँजाः यानाः दय्कि। अले छखे पाखे लुखा दय्कि।
17 “छाय्धाःसा जिं पृथ्वीइ च्वंपिं फुक्कसित न्हंकेत खुसिबाः वय्के यनागु दु। पृथ्वीइ च्वंपिं फुक्कं सी। 18 तर जिं छलिसे बाचा चिने। छ छिमि कलाः, काय्पिं व भौपिं ब्वनाः जहाजय् च्वंहुँ। 19 अले ज्यान दुपिं फुक्क जातयापिं छज्वः छज्वः यानाः जहाजय् ति। इपिं नं छलिसे हे म्वायेमा। इपिं फुक्कं भाले-पोथी जुइमाः। 20 पृथ्वीइ च्वंपिं फुक्क जातयापिं झंगः, फुक्क जातयापिं वस्तु व बँय् घिस्रय् जुयाजुइपिं छज्वः छज्वः म्वानाच्वनेत छलिसे वइ। 21 छंगु व इमिगु लागि नयेत फुक्क कथंयागु नसा नं मुंकाः ति।”
22 नोआं परमेश्वरं धाःथें फुक्कं यात।