1 जिं जक यःथें याये मदु ला? जि जक छम्‍ह प्रेरित मखु ला? झी प्रभु येशूयात जिं खनागु मदु ला? छिमित परमेश्वरयागु भिंगु खँ न्‍यंकाः विश्वास याका तयाम्‍ह जि हे मखु ला? 2 मेपिन्‍सं जितः प्रेरित धकाः मानय्‌ मयाःसां छिमिसं ला जितः मानय्‌ यानाच्‍वंगु दु। छिमिसं प्रभुयात विश्वास यानाः ज्‍या यानाच्‍वंगुलिं हे नं जि छम्‍ह प्रेरित खः धकाः बांलाक सी दु।

3 जितः कुंखिनिपिन्‍त जिं थथे लिसः बी -- 4 थथे ज्‍या याना च्‍वँसेंलि जिं जक नयेत्‍वने मथ्‍याः ला? 5 मेपिं प्रेरिततय्‌सं याना जू थें जिं जक याना जुइ मदु ला? प्रभुया किजापिन्‍सं व केफासं याना जूथें जि जक थः कलाः ज्‍वनाः चाःहुला जुइ मदु ला? 6 बारनाबासं व जिं जक ज्‍या यानाः नया जुइ माः धयागु दु ला? 7 सुं सिपाइँनं थःम्‍हं हे खर्च यानाः ज्‍या याइ ला? दाखमा प्‍यूम्‍हय्‌सिनं दाख नये मदइ ला? फै जवालं थःम्‍हं लहिना तःपिं फैतयगु दुरु त्‍वने मदइ ला?

8 थथे न्‍हिया न्‍हिथं जुया च्‍वनिगु खँयात जि थःम्‍हं हे धाये माःगु मदु, छाय्‌धाःसा व्‍यवस्‍थाय्‌ नं थ्‍व हे खँ च्‍वयातःगु दु। 9 “अन्‍न दाइबलय्‌ द्वहंया त्वाथय्‌ पिचा तयाबी मते” धकाः मोशां च्‍वया थकूगु दु। द्वहं थें ज्‍याःम्‍हय्‌सित ला परमेश्वरं थुकथं स्‍वयादी धाःसा झीत जक स्‍वया मदी ला?* ९:९ व्‍य २५:४; १ तिमो ५:१८ 10 थ्‍व खँ झीगु निंतिं नं च्‍वयातःगु खः। बुँ पालिम्‍हय्‌सिनं व छ्व लइम्‍हय्‌सिनं थःत छुं दइ ला धकाः हे बुँज्‍या याइ।

11 जिमिसं नं प्रभुयागु वचन पुसा ह्वले थें छिमित न्‍यंकागु दु। अय्‌जूगुलिं जिमिसं छिमिके छुं काल धकाः अजूचाये माःगु दु ला?* ९:११ रोम १५:२७ 12 मेपिन्‍सं ला छिमिके अथे कयाच्‍वंगु दु धासेंलि जिमिसं जक काये मथ्‍याः ला?

जिमिसं ला छिमिके छुं कयागु मदुनि। ख्रीष्‍टयागु भिंगु खँ न्‍यंका जुइबलय्‌ छुं पंगः मवय्‌मा धकाः जिमिसं थथे सह यानाच्‍वनागु खः।

13 देगलय्‌ सेवा याइपिन्‍सं देगलय्‌ हे नये दइ, अले बलि बी थाय्‌ सेवा याइपिन्‍सं नं बलिं थःगु ब्‍ब काये दइ धकाः छिमिसं सि हे स्‍यू।* ९:१३ व्‍य १८:१ 14 अथे हे भिंगु खँ न्‍यंकीपिन्‍सं नं भिंगु खं हे नयेत्‍वने याये माः धकाः प्रभुं धयादीगु दु।* ९:१४ मत्ती १०:१०; लूक १०:७ 15 अय्‌सां जिं थथे काये ज्‍यूगु, काये दुगु छुं हे कयागु मदु। अले हानं अथे कायेत नं जिं थ्‍व खँ च्‍वयाच्‍वनागु मखु। थथे याये सिबंय्‌ ला सिना वनेगु हे भिं जू। सुनानं जिगु थ्‍व घमण्‍डयात फुस्‍कुलुगु धकाः धाये फइ मखु। 16 जिं थथे भिंगु खँ न्‍यंकाच्‍वनागु दु धकाः तःधंछुइ माःगु मदु। थ्‍व ज्‍या ला जिं याये हे माःगु ज्‍या खः। जिं थ्‍व भिंगु खँ मन्‍यंकल धाःसा जितः धिक्‍कार दु।

17 जिं थःम्‍हं हे थ्‍व ज्‍या यानागु जूसा जितः ज्‍याला दइ। अथे मखुसे थ्‍व ज्‍या परमेश्वरं जितः लः ल्‍हानादीगुलिं जिं थथे याये हे माः। 18 अय्‌सा जिगु ज्‍याला छु लय्‌? छुं हे मकासे भिंगु खँ न्‍यंकेगु हे जिगु ज्‍याला खः। अथे ला जिं जिगु ज्‍याला काःसां ज्‍यूगु खः।

19 जि सुयां दास मखु। अय्‌नं फुसा यक्‍व हे मनूतय्‌त विश्वासी याये धकाः जि थः थःम्‍हं तुं फुक्‍क मनूतय्‌ दास जुयाच्‍वनागु दु। 20 यहूदीतय्‌त विश्वासी यायेत इपिं नाप च्‍वनाबलय्‌ जि नं छम्‍ह यहूदी थें जुया। व्‍यवस्‍था मानय्‌ याये म्‍वाःसां जि व्‍यवस्‍था मानय्‌ याइम्‍ह थें जुया। थुकथं जिं इमित विश्वासी यायेत स्‍वया। 21 अथे हे यहूदीमखुपिन्‍त विश्वासी यायेत जि नं इपिं थें जुया। थथे यात धकाः जितः सुनानं परमेश्वरयागु आज्ञा पालन मयाइम्‍ह मनू धकाः धाये फइ मखु, छाय्‌धाःसा जिं ला ख्रीष्‍टयागु आज्ञा पालन याना जुयागु दु।

22 विश्वासय्‌ बमलानिपिं मनूतय्‌त थुइकेत नं जि इपिं थें जुया। थुकथं इपिं गथे खः जि नं अथे हे जुया। थुकथं फुक्‍क मनूतय्‌त विश्वासय्‌ हयेत जि न्ह्याम्हं जुया। 23 न्‍ह्याथे यानाः जूसां फुक्‍क मनूतय्‌त भिंगु खँ न्‍यंकेत जिं थथे कुतः यानागु खः। थथे यानाः दइगु आशिष जितः दइ धकाः जिं मतिइ तयागु दु।

24 ब्‍वाँय्‌ वनेगु कासाय्‌ फुक्‍क मनूत ब्‍वाँय्‌ वनी, तर न्‍हापांगु सिरपाः धाःसा छम्‍हय्‌सित जक दइ धकाः छिमिसं मस्‍यू ला? उकिं सिरपाः कायेत ब्‍वाँय्‌ वनेगु कुतः याना च्‍वँ। 25 न्‍ह्यागु कासाय्‌ ब्‍वति काइपिं मनूतय्‌सं न्‍हापा लाकाः नाश जुया वनिगु सिरपाः कायेत न्‍हियान्‍हिथं कुतः यानाच्‍वनी। अथे हे झीसं नं नाश जुया मवनिगु सिरपाः कायेत कुतः याये। 26 अय्‌जूगुलिं जि निसानाय्‌ थ्‍यंकेत ब्‍वाँय्‌ वने। जिं फसय्‌ मुक्‍का नके थें जक मयाना। 27 जिं थःगु म्‍हयात दायाः दायाः बसय्‌ तयाच्‍वना। थथे मयाःसा मेपिन्‍त जक भिंगु खँ न्‍यंकाः जि थः हे सिरपाः काये बहःम्‍ह जुइ मखु।