1 དེ་ཡང་ཁྱོད་ཀྱིས་མི་དེ་རྣམས་ལ་དཔོན་པོ་དང་དབང་འཛིན་པ་རྣམས་ཀྱི་བཀའ་བརྩི་ཞིང་ཅི་གསུང་བཞིན་དུ་བསྒྲུབ་པ། ལས་བཟང་པོའི་རིགས་ཐམས་ཅད་བསྒྲུབ་པར་སྟ་གོན་བྱེད༌དགོས་པ་དང༌། 2 མི་སུ་ལའང་ཚིག་ངན་མི་སྨྲ༌བ་དང༌། འཁྲུག་རྩོད་མི་བྱེད༌པ། ཞི་ཞིང་དུལ་བ། མི་ཀུན་ལ་ཁེངས་སྐྱུང་ཡོད་པ་བཅས་བྱེད་པར་དྲན་སྐུལ་བྱའོ།། 3 ཅིའི་ཕྱིར་ཞེ་ན། དེ་སྔར་བདག་ཅག་ཀྱང་ཡིད་རྨོངས་ཤིང་བཀའ་ལ་མི་ཉན་པ་དང་བསླུ་བྲིད་ཐེབས༌པ། མ་རབས་ཐ་ཤལ་གྱི་ལས་དང་འདོད་ཡོན་སྣ་ཚོགས་ཀྱི་དབང་དུ་སོང༌སྟེ། རྟག་ཏུ་གདུག་རྩུབ་དང་ཕྲག་དོག་གིས་འཚོ༌ཞིང༌། གཞན་རྣམས་བདག་ཅག་ལ་སྡང་བ༌དང༌། ཕན་ཚུན་ལའང་སྡང་བའི་ཕྱིར་རོ།། 4 འོན༌ཀྱང༌། བདག་ཅག་གི་སྐྱབས་མགོན་དཀོན་མཆོག་གི་ཐུགས་རྗེ་དང་ཁོང་གིས་མི་རྣམས་ལ་བཅངས་པའི་བྱམས་པ་དེ་ཉིད་མངོན་སུམ་དུ་བྱུང༌ཚེ། 5 ཁོང་གིས་བདག་ཅག་བསྐྱབས་ཤིང་། དེ་ནི་བདག་ཅག་གིས་དྲང་བདེན་གྱི་ལས་བྱས་པའི་རྐྱེན་གྱིས་མ་ཡིན༌པར། ཁོང་གི་ཐུགས་རྗེའི་དབང་གིས་ཡིན༌པ་དང༌། ཡང་བསྐྱར་སྐྱེས་པའི་ཁྲུས་དང་དམ་པའི་ཐུགས་ཉིད་ཀྱིས་གསར་དུ་མཛད་པ་བརྒྱུད་ནས་བདག་ཅག་བསྐྱབས༌པའོ།། 6 དམ་པའི་ཐུགས་ཉིད་ནི་དཀོན་མཆོག་གིས་བདག་ཅག་གི་སྐྱབས་མགོན་ཡེ་ཤུ་མཱ་ཤི་ཀ་བརྒྱུད་ནས་བདག་ཅག་ལ་ཕངས་མེད་དུ་གནང་བ༌སྟེ། 7 ཁོང་གི་ཐུགས་རྗེ་ལ་བརྟེན་ནས་བདག་ཅག་མི་རྣམ་དག་ཏུ་མཛད༌ཅིང༌། མཐའ་མེད་པའི་ཚེ་སྲོག་གི་རེ་སྨོན་བཞིན་རྒྱུད་འཛིན་མཁན་དུ་འགྱུར་བའི་ཕྱིར༌ཡིན་ལ། 8 གཏམ་འདི་ནི་ཡིད་རྟོན་རུང་བ་ཡིན་ནོ།།

ཡང་དཀོན་མཆོག་ལ་དད་པ་བྱེད་མཁན་རྣམས་ཀྱིས་ལས་བཟང་པོར་བརྩོན་པའི༌ཕྱིར། ཁྱོད་ཀྱིས་དོན་འདི་དག་ནན་ཏན་གྱིས་གསལ་པོར་སྟོན་རྒྱུ་ནི་བདག་གི་རེ་བ་ཡིན༌ལ། དོན་འདི་དག་ནི་ལེགས་ཤིང་མི་ཐམས་ཅད་ལ་ཕན་ཐོགས༌མཆིས་སོ༎ 9 འོན༌ཀྱང༌། བླུན་ཞིང་རྨོངས་པའི་རྩོད་གླེང༌དང༌། ཁྱིམ༌རྒྱུད་ཀྱི་སྟོང་བཤད། འཁྲུག༌རྩོད། བཀའ་ཁྲིམས་སྐོར་གྱི་རྩོད་པ་བཅས་ལ་སྙིང་པོ་མེད་ཅིང་ཕན་ཐོགས་ཅི་ཡང་མེད་པས་དེ་དག་ལས་གཡོལ་བར༌གྱིས། 10 ཕྱོགས་ཁག་སྒྲིག་མཁན་ལ་ཉེན་བརྡ་རྒྱོབས་དང་། དེ་ནས་ཐེངས་གཉིས་ལ་ཉེན་བརྡ་བརྒྱབ་རྗེས་རིང་དུ་དོར༌ཅིག 11 རྒྱུ་མཚན་ནི་མི་དེ་ལྟ་བུ་ཕྱིན་ཅི་ལོག་ཅིང་སྡིག་པ་བྱེད་མཁན་ཡིན༌ལ། རང་གིས་རང་ལ་ཁྲིམས་ཐག་བཅད་པ་ཡིན་པ་ཁྱོད་ཀྱིས་ཤེས་པའི་ཕྱིར༌རོ།།

12 ད་ལོ་དགུན་དུས་བདག་ནི་ནུ་ཀོ་པོ་ལི་རུ་སྡོད་རྒྱུ་ཐག་གིས་བཅད༌པས། བདག་གིས་ཨར་ཏེ་མཱའམ་ཐི་ཀེ་ཀུ་གཉིས་ལས་མི་གཅིག་ཁྱོད་ཀྱི་གམ་དུ་མངག་པར་འགྱུར་བའི་དུས༌སུ། ཁྱོད་ནི་མྱུར་བ་མྱུར་དུ་གནས་དེར་ཡོང་བར་གྱིས། 13 ཁྱོད་ཀྱིས་ཁྲིམས་རྩོད་པ་ཟི་ནཱ་དང་ཨ་པོལ་ལོ་གཉིས་ལ་ཇི་དགོས་པ་སྦྱར་ཏེ་མྱུར་དུ་བསྐྱལ་བར༌གྱིས། 14 སྤྱིར་གང་ལ་གང་མཁོ་སྟ་གོན་བྱས་ཏེ་འབྲས་བུ་དང་ལྡན་པའི༌ཕྱིར། བདག་ཅག་གི་མི་རྣམས་ཀྱིས་ངེས་པར་ལས་བཟང་པོ་སྒྲུབ་ཚུལ་བསླབ་དགོས་སོ།། 15 བདག་དང་མཉམ་དུ་ཡོད་པ་ཀུན་གྱིས་ཁྱོད་ལ་འཚམས་འདྲི་ཞུ༌ཞིང༌། ཁྱོད་ཀྱིས་བདག་གི་འཐུས་ཚབ་ཏུ་ངེད་ཅག་ལ་བྱམས་ཤིང་གཅེས་པའི་དད་ལྡན་གཞན་རྣམས་ལའང་འཚམས་འདྲི་ཞུ་བར༌གྱིས། ཐུགས་རྗེ་ནི་ནམ་ཡང་ཁྱོད་རྣམས་ཐམས་ཅད་དང་མཉམ་དུ་གནས་པར༌སྨོན།། །།