1 གནའ་དུས་མི་ཡིས་ཁེངས་པའི་གྲོང་ཁྱེར་དེ། ། ད་ལྟའི་དུས་སུ་ཅིའི་ཕྱིར་གཅིག་པུར་ལུས། ། གནའ་དུས་རྒྱལ་ཁམས་ཁྲོད་དུ་ཆེ་བ་དེ། ། ད་ལྟའི་དུས་སུ་ཅིའི་ཕྱིར་ཡུགས་མོ་བཞིན། ། གནའ་དུས་རྒྱལ་ཁམས་ཁྲོད་ཀྱི་སྲས་མོ་ * འདིར་སྲས་མོ་ཞེས་པ་ནི་ཡེ་རུ་སཱ་ལེམ་དང་དེར་གནས་པའི་མི་རྣམས་ལ་གོ་བ་སྟེ། བུད་མེད་ཅིག་གིས་རང་གི་སྐྱེས་པ་བསྐྱུར་ནས་མི་གཞན་དང་འགྲོགས་པ་ནང་བཞིན། ཁོ་རྣམས་ཀྱིས་དཀོན་མཆོག་ཡ་ཝཱེ་བསྐྱུར་ནས་ལྷ་གཞན་རྣམས་ཀྱི་རྗེས་སུ་འབྲངས་པ་ཡིན། དེ། ། ད་ལྟའི་དུས་སུ་བྲན་གཡོག་ཅིག་དང་འདྲ། ། 2 ཁོ་མོ་མཚན་མོར་ངུས་ཤིང་མཁུར་ཚོས་མཆི་མས་བརླན། ། དགའ་རོགས་ཁྲོད་དུ་ཁོ་མོར་སེམས་གསོ་བྱེད་མཁན་དབེན། ། ཁོ་མོའི་གྲོགས་པོ་ཀུན་གྱིས་གཡོ་སྒྱུས་མོ་འཛིན་ཞིང་། ། གྲོགས་པོ་ཐམས་ཅད་ཁོ་མོའི་དགྲ་ཟླར་གྱུར་པ་ཡིན། ། 3 ཡ་ཧུ་དཱ་པས་དཀའ་སྡུག་ཚད་མེད་མྱངས་མ་ཟད། ། ངལ་ལས་ཞུགས་ཏེ་ནམ་རྒྱུན་ཕྱི་ཕྱོགས་ཡུལ་དུ་འཁྱམ། ། རྒྱལ་ཁམས་ཁྲོད་དུ་ཁོ་མོས་བདེ་བ་བཙལ་མ་རྙེད། ། འདེད་མཁན་དག་གིས་གུ་དོག་གནས་སུ་ཁོ་མོ་ཟིན། ། 4 དུས་ཆེན་སྲུང་བའི་མི་དབེན་པས། ། ཛ་ཡན་བརྒྱུད་པའི་ལམ་སྡུག་ཅིང་། ། ཁོ་མོའི་སྒོ་ཆེན་དག་སྟོངས་ཤིང་། ། མཆོད་དཔོན་རྣམས་ཀྱིས་ཤུགས་རིང་འབྱིན། ། ཁོ་མོའི་མོ་གསར་ཡིད་སྐྱོ་ཞིང་། ། ཁོ་མོས་སྡུག་བསྔལ་ཚད་མེད་མྱངས། ། 5 ཁོ་མོའི་དགྲ་བོ་གཙོ་བོར་གྱུར། ། ཁོ་མོའི་དགྲ་ཟླ་བདེ་ལ་བབས། ། ཁོ་མོའི་སྡིག་པ་མང་དྲགས་པས། ། ཡ་ཝཱེས་ཁོ་མོ་སྡུག་ལ་སྦྱར། ། ཁོ་མོའི་བྱིས་པ་དེ་དག་ནི། ། དགྲ་བོའི་མདུན་ནས་བཙོན་དུ་ཁྲིད། ། 6 ཛ་ཡན་བུ་མོའི་བཀུར་འོས་གཟི་བརྗིད་ཐམས་ཅད་ནི། ། ཁོ་མོའི་མི་སྡེ་རྣམས་དང་ཡོངས་སུ་བྲལ་བར་གྱུར། ། ཁོ་མོའི་མངའ་བདག་རྩྭ་ས་མ་རྙེད་ཤྭ་བ་བཞིན། ། འདེད་མཁན་རྣམས་ཀྱི་མདུན་ནས་ཐར་བའི་སྟོབས་ཤུགས་ཟད། ། 7 ཡེ་རུ་སཱ་ལེམ་དཀའ་སྡུག་ཁྲོད་དུ་འཁྱམ་པའི་དུས། ། སྔར་གྱི་འདོད་ཡོན་ལོངས་སྤྱོད་སྣ་ཚོགས་ཀུན་ནས་དྲན། ། ཁོ་མོའི་མི་སྡེ་དགྲ་བོའི་ལག་ཏུ་ཤོར་བའི་དུས། ། ཁོ་མོར་རོགས་རམ་བྱེད་མཁན་གཅིག་ཀྱང་མ་བྱུང་སྟེ། ། དགྲ་བོས་ཁོ་མོར་བྱུང་བའི་དོན་རྣམས་མཐོང་བ་ན། ། ཁོ་མོའི་ཉམ་ཐག་ལ་ནི་འཕྱ་དགོད་བྱས་པ་འོ། ། 8 ཡེ་རུ་སཱ་ལེམ་གྲོང་གིས་སྡིག་པ་ཆེན་པོ་བསགས་པས་ན། ། མི་གཙང་དངོས་པོར་གྱུར་ཅིང་ཁོ་མོར་བཀུར་མཁན་དག་གིས་ཀྱང་། ། ཁོ་མོ་གཅེར་བུ་ཡིན་པ་མཐོང་ནས་སྨད་ཅིང་མཐོང་ཆུང་བྱེད། ། ཁོ་མོས་ཀྱང་ནི་ཤུགས་རིང་གཏོང་བཞིན་ཁ་ཕྱིར་འཁོར་ནས་ཡིབ། ། 9 ཁོ་མོའི་སྨད་གཡོག་ནག་ནོག་དྲི་མས་ཀུན་ནས་སྦགས་ན་ཡང་། ། ཁོ་མོས་རང་གི་མཐའ་མའི་འབྲས་བུ་ཡེ་ནས་དྲན་མ་བྱུང་། ། དེའི་ཕྱིར་ཁོ་མོ་ཡ་མཚན་ཉམས་ཀྱང་སེམས་གསོ་བྱེད་མཁན་བྲལ། ། ཡ་ཝཱེ་ཁྱེད་ཀྱིས་བདག་གི་སྡུག་བསྔལ་ཀུན་ལ་གཟིགས་པར་མཛོད། ། དགྲ་བོས་རང་ཉིད་མཐུ་སྟོབས་ཆེ་བར་མངོན་ཞེས་ཁོ་མོས་ཞུས། ། 10 དགྲ་བོས་ལག་པ་བརྐྱངས་ཏེ་ཁོ་མོའི་གཅེས་ནོར་བཙན་གྱིས་ཕྲོགས། ། ཁོ་མོས་ཕྱི་ཕྱོགས་པ་རྣམས་གནས་མཆོག་ལ་ནི་འཛུལ་བ་མཐོང་། ། ཁྱེད་ཀྱིས་ཕྱི་ཕྱོགས་པ་རྣམས་ཉིད་ཀྱི་ཚོགས་ལ་ཞུགས་པ་དགག ། 11 ཁོ་མོའི་འབངས་ཀྱིས་ཤུགས་ནར་འབྱིན་ཞིང་ཁ་ཟས་འཚོལ། ། སྲོག་འཚོའི་ཕྱིར་དུ་ཁོ་ཚོས་གཅེས་ནོར་འབྲུ་རིགས་བརྗེས། ། དེ་ཡང་མི་ཡིས་ང་ལ་མཐོང་ཆུང་བྱས་པས་ན། ། ཡ་ཝཱེ་ཁྱེད་ཀྱིས་ང་ལ་གསན་ཞིང་གཟིགས་པར་མཛོད། །

12 ཁྱོད་ཅག་ལམ་འགྲོ་དག་གིས་དོན་འདི་མི་མཐོང་ངམ། ། བདག་གི་སྟེང་དུ་བྱུང་བའི་སྡུག་བསྔལ་འདི་ལྟ་བུ། ། ཡོད་དང་མེད་ལ་ཁྱོད་ཚོས་ཞིབ་ཏུ་བལྟ་བར་གྱིས། ། དེ་ནི་ཡ་ཝཱེ་ཁོང་ཉིད་ཐུགས་ཁྲོའི་ཉིན་མོ་ལ། ། ང་ལ་སྡུག་བསྔལ་མྱངས་སུ་བཅུག་པའི་དོན་དེ་འོ། ། 13 ཁོང་གིས་མཐོན་པོའི་གནས་ནས་མེ་ཕུང་ཆེན་པོ་འཕངས་གྱུར་ཏེ། ། ང་ཡི་རུས་པའི་གཏིང་དུ་ཟུག་ཅིང་ང་ནི་ཡོངས་སུ་བཅུན། ། ཁོང་གིས་རྙི་རྒྱ་བཏབ་སྟེ་ང་ཡི་རྐང་པ་དེའི་ནང་ཟིན། ། ང་ཡིས་ཁ་ཕྱོགས་བསྒྱུར་ནས་གཏན་དུ་སྐྱོ་ཞིང་ཉམས་པར་མཛད། ། 14 ང་ཡི་ཉེས་པའི་གཉའ་ཤིང་ཁོང་གིས་དངོས་སུ་བསྡམས་པར་མཛད། ། དེ་ནི་ང་ཡི་སྡིག་པའི་གཉའ་ཤིང་སྐེ་ལ་བཏེགས་པ་བཞིན། ། ཁོང་གིས་ང་ཡི་ལུས་ཀྱི་སྟོབས་ཤུགས་ཐམས་ཅད་ཉམས་མཛད་དེ། ། གཙོ་བོས་ང་ནི་རྒྱལ་བར་དཀའ་བའི་དགྲ་ཡི་ལག་ཏུ་སྤྲད། ། 15 གཙོ་བོས་ང་ཡི་འཁོར་གྱི་དཔའ་བོ་ཐམས་ཅད་དོར། ། ཁོང་གིས་མི་ཚོགས་བསྡུས་ཏེ་ང་ལ་རྒོལ་བཅུག་སྟེ། ། ང་ཡི་ན་གཞོན་དག་ལ་རྒོལ་བར་གྱུར་པ་དང་། ཁོང་གིས་རྒུན་འབྲུམ་འཚིར་གཞོང་བརྫིས་པ་ནང་བཞིན་དུ། ། ཡ་ཧུ་དཱ་ཡི་བུ་མོའི་ནང་གི་མོ་གསར་སྨད། ། 16 དོན་དེའི་ཕྱིར་དུ་ང་ནི་ངུས་ཤིང་མིག་ལས་མཆི་མ་བཞུར། ། སེམས་གསོ་བྱས་ནས་ཚེ་སྲོག་སྐྱོབ་མཁན་ང་དང་རིང་དུ་གྱེས། ། ང་ཡི་བུ་དང་བུ་མོ་ཁེར་རྐྱང་ངང་ནས་ཡིད་སེམས་སྐྱོ། ། དེ་ནི་དགྲ་ཟླ་ཐམས་ཅད་རྣམ་པར་རྒྱལ་བའི་ཕྱིར་ཡིན་ནོ། ། 17 ཛ་ཡན་མི་ཡིས་ལག་ཟུང་བརྐྱངས་ཀྱང་སེམས་གསོ་བྱེད་མཁན་མེད། ། ཡ་ཝཱེ་ཁོང་གིས་ཡ་ཀོབ་སྐོར་ལ་བཀའ་དག་གནང་ཟིན་ཞིང་། ། མཐའ་ནས་བསྐོར་བ་ཐམས་ཅད་ཁོ་ཡི་དགྲ་རུ་ལངས་གྱུར་ཏེ། ། དེ་དག་ཁྲོད་དུ་ཡེ་རུ་སཱ་ལེམ་མི་གཙང་རྫས་སུ་གྱུར། །

18 ང་རང་ཁོང་གི་བཀའ་དང་འགལ་བས་ན། ། དྲང་བདེན་ཡ་ཝཱེས་ང་ལ་དེ་ལྟར་མཛད། ། ཀྱེ་ཀྱེ་མི་ཚོགས་ང་ཡི་གཏམ་ལ་གསོན། ། ང་ཡི་སྡུག་བསྔལ་ལ་ནི་གཟིགས་པར་གྱིས། ། ང་ཡི་ན་ཆུང་མ་དང་གཞོན་ནུ་དག ། ཡོངས་སུ་བཙོན་དུ་ཁྲིད་པར་གྱུར་པ་འོ། ། 19 ང་ཡིས་རང་གི་དགའ་རོགས་རྣམས་ལ་སྐྱབས་ཞུས་ཀྱང་། ། དེ་དག་གིས་ནི་ང་ལ་མགོ་སྐོར་བཏང་བ་དང་། ། ང་ཡི་མཆོད་དཔོན་དང་ནི་རྒན་པོ་དག་གིས་ཀྱང་། ། འཚོ་བར་འགྱུར་ཆེད་ཁ་ཟས་འཚོལ་བའི་དུས་དེ་ལ། ། གྲོང་ཁྱེར་ནང་དུ་དབུགས་རྒྱུན་ཆད་དེ་འཆི་བར་གྱུར། ། 20 ཀྱེ་ཀྱེ་ཡ་ཝཱེ་ཁྱེད་ཀྱིས་གཟིགས་པར་མཛོད། ། དཀའ་སྡུག་ང་ཡི་སྟེང་ལ་བབས་པས་སོ། ། ང་ཡི་སེམས་ནི་སྐྱོ་ཞིང་ཡིད་ནི་འཁྲུགས། ། དེ་ནི་ང་ཡིས་ལོག་སྤྱོད་བྱས་པའི་ཕྱིར། ། ཕྱི་རུ་རལ་གྲི་ཐོགས་པས་བུ་ཤོར་ཅིང་། ། ཁྱིམ་གྱི་ནང་དུ་འཆི་བ་ཉིད་ནི་སླེབས། ། 21 ང་ཡི་ཤུགས་སྐད་ཐོས་ཀྱང་བདག་ལ་སེམས་གསོ་བྱེད་མཁན་མེད། ། ང་ཡི་དགྲ་ཟླ་རྣམས་ཀྱིས་ང་ཡི་རྐྱེན་ངན་ཐོས་པར་གྱུར། ། ཁྱེད་ཀྱིས་དེ་ལྟར་མཛད་པས་དགྲ་ཟླ་རྣམས་ནི་དགའ་བར་གྱུར། ། ཁྱེད་ཀྱིས་ཉིད་ཀྱི་དུས་ནི་ངེས་པར་འོང་ཞེས་བསྒྲགས་པའི་དུས། ། དགྲ་ཟླ་དེ་དག་མ་ལུས་ང་དང་ཀུན་ནས་མཚུངས་པར་འགྱུར། ། 22 ཁོ་ཚོའི་སྤྱོད་ངན་ཐམས་ཅད་ཁྱེད་ཀྱི་སྤྱན་སྔར་མངོན་གྱུར་ཅིག ། ཁྱེད་ཀྱིས་ང་ཡི་ཉེས་པར་ལན་ནི་ཇི་ལྟར་འཇལ་བ་བཞིན། ། དེ་དག་ལ་ཡང་དེ་ལྟར་ལན་ནི་འཇལ་བར་མཛོད། ། དེ་ནི་ངའི་སེམས་སྡུག་ཅིང་ཡིད་ནི་སྐྱོ་ཕྱིར་རོ། །