1 ओवता प्रेरित एने विश्वासी बाहख जा यहुदिया माय एता, होमल्या काय बिगेर यहुदि बी बोगवानान वचन मान लियेल हेते। 2 एने जेवी पतरस यरूशलेम माय आवो, ते खेतना केरायेल यहुदि विश्वासी माणहे तान चिहटा केरने बाज गीया, 3 “तु खेतना नाह ईयेल बिगेर यहुदि माणहान गेर जाईन ता हिऱ्यो रिनो, एने खादो पिदो।” 4 तेवी पतरस ताह सुरवात रेन जो जो ईयेल तो आखो आरवेल केय होमलाव्यो।

5 “मी याफा हेयरा माय विन्ता केरतालो, एने देरसेन दिख्यो काय एक चादरो मोटला ठामलान गेत चार खुणे रेन लेटकेल जुगाम रेन उतरीन मार फाय आवो। 6 एने जेवी मी ताह हास केरीन दिख्यो, ते ता माय पालनारे देरतीन चार पायावाला जेनवारे एने जेंगली जेनवारे एने लोलनारे जेन्तु, एने जुगान चीड़ाह दिख्यो। 7 एने मी इहकेरीन आवाज मार हिऱ्यो बोलतालो होमल्यो, ‘पतरस, उठ; मारीन खा!’ 8 पुण मी केयो, ‘नाह मालीक, नाह; काहाकाय काल्ली बी एठी एने खाराब चिज मार मुया माय केदी नाह गियी।’ 9 पुण दिहरी वार जुगाम रेन एक आवाज होमलानो, ‘जाह बोगवान चोखो ठेरायेल हे, ताह एठो मा मानहे।’ 10 तीन वार ओहलोच एनो; तेवी आखो काय पोशो जुगा माय खेचाय गीयो। 11  * 11:11 मी ईतो; थोड़ाक लेख माय आमु एता लिखेल हे।एने दिखो, जा गेराम आमु एता ता गेरान ओंगाण केसरीया रेन मार फाय मोकलायेल तीन माणहे आवीन उबरियेल एता। 12 तेवी जीव माहु केयो काय कायच विचार नाह केरता ता हिऱ्यो जा। ओवता ज्या सोव विश्वासी बाहख बी मार हेऱ्या आवा, एने आमु ता कुरनेलीयुस माणहान गेर जायेल। 13 एने कुरनेलीयुस केयो काय मी मार गेरा माय एक हेरोगदुत उबरियेल दिख्यो, तो माहु केयो, ‘याफा हेयरा माय एगदाह मोकलीन शिमोनाह जो पतरस केवाथे, हादाड़ ले। 14 तो तुवाह ओहल्यु वातु केय जान द्‍वारा तारो एने तारा आखा कुटूमान सुटकारो एय।’ 15 जेवी मी वातु केरने बाज गीयो, ते चोखालो जीव ता पोर तिहेच केरीन उतेरनो, जिहकेरीन सुरवात माय आपु पोर उतरेल एतो। 16  ✡ 11:16 प्रेरितान काम 1:5तेवी मालीक कियेल वात माहु एर आवी; ती इहकेरीन काय, ‘योहान ते पाण्या केरीन बपतीस्मा केरी ज्यो खेरी हे; पुण तुमरो बपतीस्मा चोखाला जीवा केरीन एय।’ 17 जेवी बोगवान बिगेर यहुदिह बी तोच दान आप्यो, जो आमुह मालीक यीशु मसी पोर बुरहो केरने से जुड़ेल ईतो; ते मी कुण ईतो जो बोगवानाह रोक सेकतालो!”

18 ज्यो होमलीन ता आखा चिहटा केरनेन केरता बोंद केरीन बोगवानान बोड़ाय केरतीन केया, “ताहार ते बोगवान बिगेर यहुदिह बी जीवाय जुड़ी केरीन मोन बोदेलनेन इकेल आपेल हे!”

19  ✡ 11:19 प्रेरितान काम 8:1-4विश्वासी माय रेन थोड़ाक माणहे ती तेकलीत ने वोजेसे जी स्तिफनुसान मोतीन वोजेसे ईयेल एती, जोत तोथा वेराय जायेल एता, ता फिरते फिरतेन फीनीके एने साइप्रस, एने अन्‍ताकिया माय पोचना, पुण यहुदि माणहाह सोड़ीन दिहरा कुणीह बी वचन नाह केताला। 20 पुण ता माय रेन थोड़ाक माणहे साइप्रसवाला एने कुरेनी एता, जा अन्‍ताकिया माय आवीन बिगेर यहुदिह† 11:20 बिगेर यहुदिह थोड़ाक लेख माय युनानी बाषा बोलनारे यहुदि माणहे बी मालीक यीशुन हाजाली खोबरीन वातु केणे बाज गीया। 21 तेवी मालीकान ताकेत ता हेऱ्यी एती, एने जुलूम माणहे बुरहो केरीन मालीका निही वोलना।

22 जेवी तान चेरचा यरूशलेमान मोंडलीह होमलाणेम आवी, ते ता बरनबासाह अन्‍ताकिया माय मोकल्या। 23 जेवी बरनबास ताहरी पोचीन माणहाह दिख्यो काय बोगवान ताह किहीक गीण आपेल हे खुस एय गीयो, एने आखाह विन्ता किऱ्यो काय तुमरा पुरा मोना केरीन खेरलाम एने मालीका हेऱ्या विश्वासयोग्य रिवो। 24 काहाकाय बरनबास एक हाजो माणुह ईतो, एने चोखाला जीवा केरीन एने बोरहा माय पाको ईतो; एने दिहरा जुलूम होवटा माणहे मालीकान बोरहाम आव मिलना।

25 तेवी बरनबास शाऊलाह होदणेन केरता तरसुस हेयरा माय जात रिनो। 26 एने जेवी बरनबास शाऊलाह मिलनो ते ताह अन्‍ताकिया माय लावो, एने इहकेरीन एनो काय ता दुयू ताहरी एक वोरीह वोर मोंडली माय ईलीमिलीन जुलूम होवटा माणहाह हिकाड्या, एने चेलाह मसी ज्यो नाव पेल्‍ली वार अन्ताकियाम जुड़नो।

27 तास दिह्या माय यरूशलेम रेन थोड़ाक जाणाव केरनारे अन्ताकियाम आवा। 28  ✡ 11:28 प्रेरितान काम 21:10तेवी ता माय रेन अगबुस नावान एक माणुह उठीन जीवान ताकेत माय ज्यो जाणाव किऱ्यो काय आखी दुनिया माय मोटलो काल पोड़न्यो हे। ज्यो काल क्‍लोदियास ने राज केरनेन टेम माय पोड़नो। 29 तेवी चेला निर्णय केऱ्या काय यहुदिया माय रेणारे विश्वासी बायाख ने मोदेक ने केरता आपुह पुरवाय तोलो दान मोकली। 30 एने ता तिहेच केरीन केऱ्या, एने बरनबास एने शाऊलान आथाम यरूशलेम ने मोंडलीन डायडाया फाय ता पोयशा मोकली देना।