1 Fütanga ngü la, fü ra awu gara *malayïka ka Me, te koro agbü kpï, ngbü ekö enü kpa füh kotö akine, de mere nyarï esaka ye, bete mafüta ka mere siti du. 2-3 Fü malayïka la akoro bü ꞌduwa, azoro mere siti kpürü de ïrï ye *Satana, de te ngbü fï bü da efifiti wü kpara füh kotö ne. Fü malayïka la ai Satana de mere nyarï la, gö gö gö! agü agbü mere du, ani mö nganga, gbuuu! atümü ꞌduwa atümü de mafüta. Ah tümü Satana, ce o kpala, teka wü re kutu biri (1,000), angü ah ena adu afiti wü kpara. Fütanga wü re kutu biri la, Me ena adu afuru Satana, teka sïkpï mba cüküꞌdaye.

4 Fütanga ngü te wüh i Satana, gü tete gbü mere du ne, fü ra awu wü *kpara ka Yesu, ta te wüh mörö ewü, teka ngü ka Me ne, angü wü kpara la rü ta kpekpeke gbü ngü ka Yesu. Wüh le ta aje rïrï ka siti nü te koro gbü ngu ne, da ecu ngüngü na nda-wü de. Wüh le kpah aba ïrï siti nü la eraku wü, anga eküte kpa wü, nda-wü kpah de. Dela si-ngü ta te wüh wete wü kpara la, mörö tete ne. Teka ngü la, fü Me adu azükü ewü gbü kpi la, ato wazi fü ewü, de wüh ngbü baka wü miri ede Yesu, adi ekolo ngü ka wü kpara, teka mere bi wü re, kutu biri (1,000). 5 Dene gina wü kpara, de te Me zükü ewü gbü kpi. Amba wü gara kpara de te ewü kpi ne, wüh zükü nda-wü la de, zalü te re kutu biri la ena anza feke.

6 Te di bala, gina wü kpara, de te Me ena azükü ewü gbü kpi ne, ka-ye zu wü kpara, de te Me ngbü fe ewü, to wazi fü ewü fanü fanü ne. Wü kpara la tï adu akpi nda-wü tïne de. Me ena ao ewü baka wü kovo, te ewü ena angbü egbo nga ïrï Me bete Yesu *Kurisito. Fü ewü angbü wü miri, de wü Yesu Kurisito, teka wü re kutu biri (1,000).

7 Fütanga wü re kutu biri (1,000) la, wüh ena adu ace kpa te Satana. 8 Fü Satana ayia tïne, adu angbü endondoro te nga wü sü füh kotö ne ꞌburu, da emere e fe fe fe, teka afifiti nguwa wü kpara füh kotö ne ꞌburu, teka de wüh di emere gü de wü *kpara ka Yesu. Satana ena abiti wü miri gbü nguwa wü kpara füh kotö ne ꞌburu, abe te wü marajümïya ka-wü, de te sibi baka siki ne. Fü ewü areke te-wü, de wü Goga bete Magoga,* 20:8 Mü ena amaka ngü ka wü Goga ake Magoga gbü buku ka Ezekele 38-39. Ïrï wü Goga ake Magoga la, ah de mani teka wü kpara, te ewü le ngü ka Me de ne. teka anü amere gü de wü kpara ka Me. 9 Fü ewü anü, anü baaala, zalü akoro gbü sü de te wü kpara ka Me ngbü tete, agbü mere kötï, de te Me le fa sü ne. Fü ewü ayia afü kere wü kpara ka Me la, kerekere gbaa! teka de ani nza ngü ka ewü. Wüh te eceka bane de, Me tima wa ka-ye eyi mbele! baka ülele. Fü ah ayia acuru ewü, anza ꞌbuti ꞌbuti! 10 Fütanga ngü la, fü wü malayïka adu azoro Satana, angü ah ngbü fiti wü kpara la me-ye. Fü ewü aza engu, agü agbü du ka wa kpala, kpa gbü nga siti nü te koro gbü ngu, bete engu te koro gbü tö ne. Fü ewü angbü ezü cïnga, agbü mere du ka wa la, fï mere badi. Fütanga ngü la, gara kpara te ena adu afiti wü kpara nda tïne ma.

11 Fütanga ngü la, fü ra ayia afü jia ra, awu Me te ngbü füh mere kpökpö ka-ye, te vi ngbü ꞌduwa kpïlïlï! da eci aci bala! Fü kpï ake tö akpe adürü bü bala, ma du wu ewü tïne de. 12-13 Fü ra adu awu wü kpara, de te ewü kpi eyi ne, ꞌburu. Angü wü malayïka ka Me ngbü biti wü kpara la, te nga wü sü füh kotö ne ꞌburu, koro de ewü engagira kpökpö ka Me. Wüh ngbü koro de gara ewü gbü wü mbükü, de wü gara ewü te wüh ti de.† 20:12-13 Mene wü kpara te wüh ti de ne, ah de mene ewü te wüh kpi gbü ngu, wü gara te wü nü zü me-wü, bete mene ewü te wü cögbörö dïrï tï füh ewü. Fü malayïka aza wü buku, de te wüh ngbü ba lara wü tima ka wü kpara, te nga wü ngü de te ewü ngbü memere kpikpi ye kpikpi ye ne, akoro di. Fü Me ayia akpo akolo ngü ka wü kpara ꞌburu, te nga tima ka-ewü biri biri ꞌburu. Fü malayïka la ayia aza kpah gara buku, te di buku ka *Küküwa, akoro di. Mene buku la, wüh ba ïrï wü kpara, de te ewü ena aküwa fï mere badi, teka ngü ka Yesu ne, gbügbü. 14-15 Teka mene wü kpara ꞌburu, de te ïrï ewü di gbü buku ka Küküwa la ma ne, wüh ngbü za ewü, gü ꞌburu agbü mere du ka wa. Dela tïne eyi eꞌbaꞌbasu kpi. Fü ewü aza kpi ake mbükü, agü kpah agbü du ka wa kpala, fü ngü ka-ewü anza fï mere badi.