43
Ihamaurida na Iehova mo
1 Iakob e, e havaramu Diravana,
Israel e, e karamu Diravana,
Iehova, harihari ini e gwau tomamu:
Basio gari, badina be lau ese vada na hamaurimu;
ladamu vada na hatoa, oi na lauegu.
2 Ranu lalodia amo ba hanai negana ai, lau na oi ida;
sinavai lalodia amo ba hanai negana ai na basie habubunimu;
lahi amo ba raka hanai negana ai, basio heara;
lahi hururu-hururuna ese basine golemu oho.
3 Badina be lau na Iehova, emu Dirava,
Israel ena Helaḡa Diravana, oi Ihamaurimu.
Aigupto na henimu, oiemu mauri davana,
Etiopia bona Seba na henimu, oi ibodohilaimu.
4 Badina be oi davamu na bada lau vairagu ai;
na matauraimumu, na ura henimumu;
taunimanima na henimu, oi davamu,
bona bese na henimu, oiemu mauri ibodohilaina.
5 Basio gari, badina be lau na oi ida;
oi garamu na laurabada kahana amo baina hakaudia mai,
bona lahara kahana amo baina haboumui.
6 Mirigini kahana baina hamaoroa, bainato “A kahudia nege”,
bona diho kahana baina hamaoroa, bainato “Asio rudia”;
natugu mamaruanedia na dauha amo
bona natugu hahinedia na tanobada dokona amo
ba hakaudia mai;
7 lau ladagu e henemailaidia taudia iboudiai,
ihahairaidia totona na havaradia, na karadia bona oromadia na henidia taudia.
8 Mai matadia to matadia e kepulumu taudia,
mai taiadia to taiadia e kudimamu taudia,
a hakaudia lasi.
9 Basileia iboudiai bae hegogo,
bese idau-idau bae hebou.
Idia bogaragidiai daika ese ina na baine gwauraia?
Daika ese ḡau gunadia baine haheitalaida?
Edia hereva ihamomokanidia taudia bae mailaidia, igwaurai-maorodia totona;
bae kamonai, bena baeto “Hereva momokanina”.
10 Iehova na e tomu: Umui na egu hereva ihamomokanidia taumui;
umui na egu hesiai, vada na abimui hidi,
ba dibagu bona bavabiabiraigu totona,
bona lalomui bae parara Lau na Ia.
Asi dirava ta ese lau e gunalaigu,
bona lau murigu ai danu dirava ta basine hedinarai.
11 Lau binai Iehova,
asi ihamaurimui ta, lau mo sibogu.
12 Iehova na e tomu:
Idau dirava ta lasi bogaragimui ai negana ai,
na herevava, na hahemauriva, na gwaurai hedinaraiva;
bona umui na egu hereva ihamomokanidia taumui.
13 Lau na Dirava; ina harihari amo ela Lau na Ia;
ta ese lau imagu amo basine harohomui mauri diba.
Lau na ḡaukaramu:
daika ese egu ḡaukara ilao-ahuna mai dibana?
14 Ihamaurimui, Israel ena Helaḡa Diravana,
Iehova, ini e gwau tomamu:
Umui daimui ai haida na Babulono baina siaidia lao,
bona auri iboudiai baina hakwaidudia;
bena Kaldea taudia edia hone na
taitai ai bainela.
15 Lau na Iehova, emui Helaḡa Diravana,
Israel Ihavarana, emui Pavapava.
16 Iehova na unu e gwau tomamu;
ia ese dala e lailaiamu davara lalonai,
davara badadia lalodiai danu.
17 Ia ese kariota bona hosi e hakaudia lasimu,
bona tuari oreana bona tuari taudia danu;
idia na e hekuremu, basie tore isi diba;
idia na e bodomu, gida e bodomu na heto.
18 Ḡau gunadia basio lalodia tao,
nega gunadia basio haerodia.
19 A itaia, ḡau matamatana na karaiamu,
harihari e hedinaraimu; asio itaiamu a?
Lau ese dala ta tano ḡaḡaena ai baina karaia,
bona sinavai baina kara, tano kaukauna ai.
20 Uda boromadia ese bae imodaigu,
uda sisiadia bona kokokoko ese danu;
badina be tano ḡaḡaena ai ranu na henimu,
bona sinavai tano kaukauna ai danu,
egu abi-hidi besena ranu baina henia totona.
21 Besena bunai vada na karaia egu,
lau i'imodaigu herevadia bae gwaurai totona.
22 Ḡau tamona, Iakob e, oi ese so boi henigu;
Israel e, egu ai vada o hesiku.
23 Emui mamoe na egu ai asio mailaidia, ḡole-oho ḡaudia ai baela totona;
emui boubou ḡaudia amo asio imodaigu.
Lau na boubou karadia amo asina hametaumui,
bona muramura mai bonana dainai asina hahesikumui.
24 Egu kane*Kane: Heberu taudia edia muramura mai bonana ta. asio hoi;
emui boubou ḡaudia digaradia asio henigu davana.
A emui kara dika amo vada o hametaugu,
bona emui kara havara amo vada o hahesikugu.
25 Lau na emui kerere e abidia ohomu Diravana, lau sibogu daigu ai;
emui kara dika na basina lalodia tao.
26 Ba hahelalogu une, baita hedorilai heheni;
emui gini-kau gabuna ba gwauraia hedinarai, bae gwauraimui maoro totona.
27 Emui bese ihavarana tauna vada e kara dika,
bona emui peroveta taudia ese e kara havara henigu.
28 Emui pavapava ese egu gabu helaḡana e hamiroa;
taunabunai, Iakob na habuaia tari vaitani,
bona Israel na ḡonaḡonalaia.