5
Israel e, ba helalo
1 Israel besena e, egu rohe-ahu herevana oi latamu ai vada ba kamonai.
2 Israel hane-ulatona vada e moru,
ia na basine tore isi lou;
ena tano ai vada e rakatania,
ta ese basine hatorea isi.
3 Badina be Ḡaubada Iehova ini e gwau tomamu:
Hanua ta amo daha-ta e raka lasimu,
a sinahu tamona bae mauri;
ma hanua ta amo sinahu-ta e raka lasimu,
a gwauta mo bae mauri,
Israel besena enai.
4 Badina be Iehova ese Israel besena e hereva heniamu,
ini e gwau tomamu:
Lau ba tahugu, bena ba mauri.
5 Betele basio tahua,
Gilgal ai basio raka vareai,
Bere-sieba ai basio raka hanai;
badina be Gilgal na dauhai bae hanohoa,
bona Betele na baine baia.
6 Iehova ba tahua, bena ba mauri;
ia na lahi na heto baine ara, Iosef ena ruma ai,
baine ara ore, ta basine habodoa diba Betele ai, na garina;
7 umui, hahemaoro ḡoevaḡoeva na muramura iditana ai vada o halaoa
bona kara maoromaoro tanobada ai vada o tilhoa dobi taumui!
8 Ia ese Kima bona Kesili*“Kima” bona “Kesili” be hisiu haida ladadia, Heberu gado ai. e karadia,
hanuaboi diburana na daba ai e halaoamu,
bona dina na e hadiburaiamu, hanuaboi ai e halaoamu;
ia ese davara ranudia e boiridiamu,
bena tanobada kopina ai e bubudia dobimu;
ia ladana na Iehova.
9 Ia ese goada taudia e aladia oremu,
bona kohoro aukadia e habuadia tarimu.
10 Hahemaoro gabuna ai sisiba herevadia e gwauraimu tauna na
idia ese e inai heniamu,
bona hereva momokanidia e gwauraimu tauna na
idia ese e inai henia badamu.
11 Taunabunai, badina be ogoḡami tauna vada o moia tao
bona ena uit momo vada o dadia dainai,
nadi rumadia vada o haginidia,
to lalodiai basio noho,
bona vine imeadia namodia vada o hado,
to edia vine ranudia basio inu.
12 Badina be lau dibagu emui kerere na momo,
bona emui kara dika na bada herea.
Umui ese kara maoromaoro taudia o hahisidiamu,
bona koikoi henitaona o abiamu,
bona e dabumu tauna hanua ikoukouna ai na
hahemaoro gabuna amo o lulua ohomu.
13 Taunabunai, nega inihetomana ai
lalo-ihunu tauna na asi reḡereḡena baine noho,
badina be nega dikana.
14 Namo ba tahua, dika basio tahua,
ba mauri helaoreana;
bena Dirava, Iehova Sabaota, ese baine bamomu,
ema hereva heḡereḡerena.
15 Dika ba inai henia, namo ba ura henia,
hahemaoro ḡoevaḡoeva na hanua ikoukouna ai ba haginia;
bena reana Dirava, Iehova Sabaota, ese
Iosef iduhuna taudia kwabukwabudia baine bogadia hisi.
16 Taunabunai Dirava, Iehova Sabaota, Ḡaubada, na ini e gvvau tomamu:
Ariara iboudiai lalodiai bae tai lolololo,
bona hanua ariaradia iboudiai lalodiai baeto
“Inaio, inaio!”
Biru taudia bae boiridia, bae taitai,
bona herohe-ahu mai dibadia taudia bae boiridia, bae tai lolololo;
17 vine imeadia iboudiai lalodiai bae tai lolololo,
badina be bogaragimui amo baina raka hanai.
Iehova na e herevamu.
18 Iehova ena dina o hekise-hekise heniamu taumui, madi, ihabaimui!
Dahaka dainai Iehova ena dina o laroamu?
Una dina na dibura, dia diari;
19 tau ta ese leona bema heautania
bena bea ta ida bema hedavari na heto;
eiava ruma lalonai bema raka vareai,
haba ai bema hetaotao,
bena gaigai ese bema koria na heto.
20 Iehova ena dina na dibura, dia diari, ani?
bona gabora asi diarina ani?
21 Emui aria na na inai henidiamu bona na dadaraidiamu;
emui hebou helaḡadia asina moalelaidiamu.
22 Ena be emui ḡole-oho bouboudia bona emui flaoa bouboudia ḡaudia o harihari henigumu,
to lau ese basina abidia dae;
bona emui ubu-ubu ḡaudia, maino boubou ḡaudia ai o halaodiamu, na
lau ese basina haḡeredia.
23 Emui ane reḡedia na egu ai bavabi oho,
emui gitara reḡedia basina hakala henidia.
24 A hahemaoro ḡoevaḡoeva baine aru, abata na heto,
bona kara maoromaoro, se kororomu sinavaina na heto.
25 Israel besena e, laḡani hari-ahui tano ḡaḡaena ai o nohova lalodiai boubou bona herahia ḡaudia na egu ai o mailaidia a? 26 Emui pavapava Sakutu, bona emui hisiu diravana Kaiwana, emui kaivakuku, imamui amo o kara gaudia, na do ba huadia; 27 taunabunai, lau ese baina laohaimui, Damasko unukahanai baina hanohomui. Dirava, ladana Iehova Sabaota, na e herevamu.