1 Oau rehn Jesus kapkap wijahkij. Nehn Ah kadoarihla Ah kapkappo, emen Nah sohnpadahkkok pwehng Ih, “Koaun, padahkihoang kamai doahr kapkap, doahroar en John ah padahkihoang nah sohnpadahkkok.”

2 Jesus pwehnglahng irai, “Anjoau in amwai kapkap kamwai pwa,

5 Jesus pel pwehng irai, “Ma emen kamwai mine ah pirien a ih inla ipoa in umwahu lopkoan pwong poaki ipoa, ‘Oai pirien kihdoa lopwon in pilahwa jiluh. 6  Oai pirien men ma kapwehsen lel ipoai, a johpwa mwinge kij ipoai ngoahi en kioang ih!’ 7  A ma armajjo loaloa japoang, ‘Joah kadroapwi ngoahi, wanihmmwe ne loakdi, noai jerihkai apel ngoahi ne moair. Ngoahi johkak pwohrda kioang koawoa mehkij.’ 8  Kamwai en kidal pwa ma ih joah pwohrda pwa en kioang koawoa pilahwa pwa koawoa ah pirien, a ih pirin pwohrda kioang koawoa me ohroj koawoa anahne pwa koawoa johpwa mehkki poaden poakpoak. 9  Ioar mehwa Ngoahi pwehngkihoang kamwai; poaki, a kamwai pirin oaloa; rapahki, a kamwai pirin diar; lesles, a wanihmmwo pirin risdahng kamwai. 10  Pwa inje ma poaki pirin oaloa; apel inje ma kin rapahki pirin diar; apel wanihmmwo pirin risdahng inje ma lesles. 11  Mine kamwai jahm men ma pirin kioang nihmwai jermweinno sinek ma ih poaki kanah mwumw? 12  Ke nehn a poaki adroau, a koawoa kioang aihe? 13  Ia woahr amwai nauna a kamwai kidal kioang me mwehu oang nihmwai jerihkan. Ia woahr koalikin Jamamwai nehnloannge pirin kioang Ngen Joarwi irai kan ma kin poaki Ih?”

14 Jesus kauj jang ngen jaus men ipen woal loahsoang men. Nehn en ngen jausso injang ipoa, woallo ken kak sapda lallal. Pokonno pwuriamweikihla. 15 Epwi ihr pwa, “Ih ioar Beelzebul, koaun in ngen jaus kan ma kioang Ih manman in kajroahjang ngen jaussok.”

16 Epwi nimen lidipi Jesus, irai poaki Ih en wiahng irai oau manmanno jang nehnloannge. 17 A Jesus kidal ahr lamlam, Ih pwehng irai, “Wei oau joah lipilpil ma kin pwalpijoang wiahda pwihn pwi ma kin uhpene nehn pwungarai johkak woaroai; peneinei oau ma kin uhpene kin mwoarpijoang. 18  A, imdoahr? Ma wein Jehsen mine pwihn pwi ma peipene nehn pwungarai, imdoahr ah wei en kak pwoaida? Kamwai siksikoa pwa Ngoahi kin kauj jang ngen jaus ipen armaj pwa Beelzebul kin kioang Ngoahi manman en wia me. 19  Ma ioar doahroar oai kin kauj ngen jaus kan, a imdoahr ioangoamwai kan kin kauj jang? Pein ioangoamwai kan kadehdehda amwai uhdahn japwung. 20  In oadoan Koahs ma Ngoahi kin kaujkihjang ngen jaus kan, me kadehdehda pwa Wein Koahs ne lel kamwai.

21  “Ma woal sihkei men ma ah koapwoahn mahwin ohroj onopda, ih jiloa umwahu, a ah koapwoa kan pirin nekidekla mwehu. 22  A ma emen ma sihkei jang pallanda ih, kalwehdi, ih pirin wahjang ah koapwoahn mahwin ohroj ma ih kin sihsihkeiki, apel nehkpijoang dahkij ih pirapoahla.

23  “Inje ma johkin pwili Ngoahi, kin uhwoang Ngoahi, a ih ma johkin jeuweje Ngoahi rikpene, kin kamwroahpijoang.

24  “Nehn en ngen jaus men kin diljang nehn armaj men, ih kin allaluhjili nehn japwsoahn raprapahki wijahn koammoal. A ma ih johkak diar, ih kin pwehng pein ih, ‘Ngoahi en pwurla in umwoaiho.’ 25  Ih ken pwurla kapangda doahroar en ummwo ne mwakelkelda apel joandi mwehu. 26  Ih inla ukdo ngen ijimen ma jaus jang pein ih, irai ken dilda koaujoanla wijahu. A in imwlahn joang ohroj, armajjo pirin naunahla jang in sapdahu.”

27 Nehn en Jesus Ah pwahla mehpwiai, a lihmen jang nehn pokonno pwehng Ih, “Ia woahr peren in liho ma noaisikihdi koawoa apel apwalihda koawoa!”

28 Jesus japoang, “Ioar, a ia woahr peren in irai kan ma kin rong mahjan in Koahs apel kapwaihahda!”

29 Nehn en armaj dir ahr pidekihpene Jesus, Ih pwa, “Ia uhwen nauna in armaj in rehn pwiai! Irai poakpoaki manman oau, a jehpirin aluhwoang irai, ioarroar kilel manmanno ma wiawi oang Jonah. 30  Doahroar joukohp Jonah a wia kilel oau oang mihn Nineveh, ioar doahroar Nihn‑Armaj pirin wiahla kilel oau oang armaj in rehn pwiai. 31  Nehn Rehnin Kadeikko li nahmwarki Sheba pirin uhda kadipoa armaj in anjoau oauwe; pwa ih jeiloakdo jang in imwin jampah pwa en rong doahroar en nahmwarki Solomon kaweid loalkoang. A apkas mine emen ma laplap jang Solomon mine me. 32  Nehn Rehnin Kadeikko mihn Nineveh pirin uhda kadipoa kamwai, pwa ahr koaluhla apel wiliakapwla nehn ahr rong en Jonah kapahrakkok; a kamwai en kidal pwa mine emen me ma koalik jang Jonah!”

33  “Johpwa emen kin akanda lahm oau apel oakihla ke kihdi oang pehn pahn oau; pwa ih pirin kioang nehn dohiahu, pwa armaj ohroj en kak kapang marammo nehn ahr dilda nehn ummwo. 34  Maj ioar lahm in palwar. Ma pwoaroan mijoammwen mwakelkel, palwoaroamwen pwon pirin dirkihla maram. A ma pwoaroan mijoammwen nauna, palwoaroamwen pwon pirin dirkihla ros. 35  Kanaihoahng pwa marammo ma mine ipoamw jaudi ros oau. 36  Ma palwoaroamwen pwon dirki maram, johpwa wijahkij mine nehn ros, ih pirin maram wija ohroj doahroar lahm oau ma joajjoaroa koawoa ki ah maram.”

37 Nehn en Jesus kadoarihla Ah kapahrak, Pharisee men luke Ih pwa en pwili mwinge ipoa; Jesus dildahng nehn ummwo apel mwindi oang in sehpil. 38 Pharisee‑o ken pwuriamweikihla nehn ah kapang Jesus johpwa amwumwla mwohn mwinge. 39 Doar Koaunno ken pwehnglahng Ih, “Kamwai Pharisee kan injinohkihoar kamwkele likin nihmwai mwoak apel pileis kan, a loaloamwai dirkihla lioas in uhwoang apel mwoarjuwed. 40  Pweipwei kamwai! Koahs ma wiahda kamwai, likin apel loaloa! 41  A kamwai kijkijoahki armaj joamwoahmwoa kan koanngoan nihmwai mwoak apel pileis kan, a joang ohroj pirin mwakelkel ipamwai.

42  “Ia woahr nauna oang kamwai Pharisee kan! Pwa kamwai kin meiroang kioang Koahs eijek kij oau in mihn doal mwinge kan doahroar mint, rue apel ohroj mihn doal mwinge sohrohr kan, a kamwai joh kin injinohki pwung apel limpoak oang Koahs. Ioar mehkoa ma kamwai en wia mijkoalkoal, mwohn amwai pirin wia joang sohrohr kan.

43  “Ia woahr nauna oang kamwai, Pharisee kan! Pwa amwai kin mwehuki mwindi nehn jeia ma keiou kajampwal nehn jinakoke kan apel nimen armaj kan en rahnmwahu in wahu nehn wijahn noasnoas kan. 44  Ia woahr nauna oang kamwai! Pwa kamwai doahroar joaujoau joah janjal pwi ma armaj allalu puwoa jehjoa.”

45 Emen jounkawoahwoa in kojonneddo ken pwehnglahng Jesus, “Jounpadahk, nehn oamw pwahpwahpwa joang pwiai, koawoa kin pel koauwe kamai!”

46 Jesus japoang, “Ia woahr pel nauna oang kamwai, jounkawoahwoa in Kojonneddo kan! Pwa amwai kin kasoausoauwihkihla armaj kan wijik ma irai johkak wahda, a pein kamwai johkin kailla jaid pas en jeuwejehda ahr wijik kan. 47  Ia woahr nauna oang kamwai! Kamwai kin wiahda joaujoau mwehu oang joukohppok, ma jamamwaihok kojukdi. 48  Kamwai pein kadehdehda pwa kamwai pwungki da jamamwaihok wia; irai ma kojukdi joukohppok, a kamwai wiahdahng arai joaujoau. 49  Ki kahrpoa oauwe erpis in Koahs ne pwahla, ‘Ngoahi pirin kadarlahng irai joukohp kan apel woaroak kan; a irai pirin kojukdi epwi apel koalkoa epwi.’ 50  Pwa armaj in anjoau oauwe en koaloklokki kojkojdihn joukohp ohroj jang kapikpikdahn jampah, 51  jang in kojkojdihn Abel lel kojkojdihn Zechariah, ma kojkojdi nehn pwungen pei joarwiho apel Umw Joarwiho. Eh, Ngoahi pwehng kamwai en kidal pwa armaj in rehn oauwe pirin loklokki irai ohroj.

52  “Ia woahr nauna oang kamwai, jounkawoahwoa in Kojonneddo kan! Amwai kin koldi kih‑o ma kin risingda wanihmw in umwen loalkoang. Pein kamwai johkin dilda, a kamwai kin iroahdihjang irai kan ma kin jongjongin dilda!”

53 Nehn en Jesus injang nehn ummwo, jounpadahk in Kojonneddo kan apel Pharisee‑ok sapda koauwe Ih inenin koalik apel peidekki joang dihrdir. 54 Pwa ihr nimen lidipihkihdi Ih mehkij ma Ih pwahla japwung.