13
Mac holeyeledabeleng
1 Ngic hae-gbafocne, ngenge ngengungtihac kwelenginengti angac ngagenagulu ago ainagulu gadabiyeng. 2 Ngic-ngigac haic fulune ngengela kwesibong ngenge yenge macnginang locebanogale mi hegiledaing. Ngic-ngigac gocne yenge inguc aiibong, yenge ngicbenang macka locebagabeleng milu angelo gocne macka locebaibong.✡ Rom 12:13; Fike 18:1-8; 19:1-3 3 Aime ngic-ngigac muc-macka ngiyebong ngenge yengeholec momochac ngiyegaing, silicine yogo ingucnehac ngengi yengele ngagesilu baficebadabiyeng. Nga ngic-ngigac gocne wecebacaigaing, yogo ngengele soc momochac wegaing, silicine yogo ingucnehac ngengi yengele ngagesilu baficebadabiyeng.
4 Aime ngawe-ngigac banagucaigaing aibaba i alang bacnodabiyeng. Aime ngawe-ngigac yeke momochac mac fafanginec alang bacnolu selo aibaba mi aiboc wonong mikac fadaic. I yangucte, Wapongti kaiselo ngic-ngigac funginengineng wosaelu ameine yeledaicte hocne.✡ Efs 5:5 5 Aime ngenge hiye-monengte angac sugucnehac mi ngagedabiyeng, ngenge wiyac biyac fangelegac, i sugu andoine aigac, ngenge inguc ngagelu gadabiyeng. Wapong yeuctihac yanguc biyachac miwec,
“Na ngenge mi hegilecngebadacte, ailu wiyacngineng lilolu nalic mi lobe-holengeledacte, i miyacbenang.” (Yefe-yowa 31:6) ✡ Yef 31:6,8; Yos 1:5
6 Ilec sanangkelu hangoc mikac galu yanguc nalic midabelengte,
“Sugucne ye nongileng babaficnonggeng, aime ngic monicti wiyac monic ainoleme ilec nalic mi hangocnubadaicte.” (Miti gee 118:6-7)
Ngage-ngagesingnonggeng balaibenoga
7 Ngenge micnefocngineng Wapongte yowa edocngebalu wedungelelu gaibong ailu noine wenuc bafuwaibong, i ngagesilu gadabiyeng. Ngenge domalu ngage-ngagesingngineng ngani-motolu yengele silic balaibedabiyeng.✡ 1Kor 4:16 8 Yesu Kristo ye awecnahac nga yakumac ailu damengsoc silicine moniyang gaginowagac.
9 Wapongte baba-madicti kwele-ngage-ngagengineng basanangkeme sanangne domadaingte, yogodi wiyac madicne. Aime noba-nosingte yefe-yowa fungine fungine yogodi kwelengineng nalic mi basanangkedaicte. Ilec ngenge yowa kwesacine gbolicne fungine fungine wedungelebong yowa ingucnedi mi mudocngebadaic.✡ Rom 14:17 10 Aime nongileng Yesudi alatanonggeng ingucne aime gabeng depec-baba ngic yengi kpoluc-falewa bole balu gagaing, yenge alata iwacni nosing monic nalic mi balu nodaingte. 11 Depec-baba ngic yengele damong sugucnedi sic yengele sac balu ibu-kuluc kweline Gbagbacnebenang, iwa bafelu bikic baic-baicte ibu lolu gaibong. Ailu sic noinebac ngiye-domac aicaigaing mac yogolec lobeina lobong lobelu defeine sugu ailu gawec.✡ Dep 16:27 12 Ilec Yesudi inguchac yeicne sacti ngic-ngigac gbagbacne bacebanale taon nuinele lobeina doic ngagewec.✡ Yoh 19:17 13 Ilec ngiye-domac aicaigabeleng, yogolec lobeina yela hikelu yeholec momochac ye game bawec ingucnehac badabeleng.✡ Hib 12:2 14 Himong yagowa nongileng taon sanangne monic mi fagac. Ilec nongileng taonnonggeng lobewa kwesinale donge hilalu gagabeleng.✡ Hib 11:10,16; 12:22
Mimi-madicte ibu
15 Ilec nongileng Yesule wacka Wapong damengsoc mitengkedabeleng, yogodi ibu noine aidaic. Micnonggengti wacine mibeng yegengkeme noine bafuwadabeleng.✡ Mige 50:14,23 16 Aime ngic-ngigac gocne ngani-bafic aiyeledabiyeng, ailu wiyacngineng fagac, i heuckelu yeledabiyeng, aibaba i mi hegiledaing. Wapongti ibu ingucnele hocne ngageme madickedaicte.✡ Filp 4:18
Yowangineng balaibenoga
17 Ngenge micnefocngineng yenge alang bacebalu yowangineng balaibedabiyeng. I yangucte, yenge gung-gboli galu kwele-asungineng damongkelu bolenginengte yowa-siduc Wapongta minogale damengngineng loicne fagac. Iwa yengele bole i kwele-madicineholec aidaic. Ngenge kwele-umacka bole i badaingtewa, na ngagebe ngenge nalic mi baficngebadaicte.✡ 1Tim 5:12
Wenac-madic
18 Ngenge nongele milockedaing. Nonge kwele-ngage-ngagenonggeng gbagbacne, inguc ngagepangkelu gagabeleng. Aime aibabanonggeng sasawa madicne fanale ainolegac.✡ Sale 24:16; 2Kor 1:12 19 Ngenge hatacmac mimilockabenang baficnubaebongka, na dameng mi wikedacte ailu ngengela biyacbenang hefaliye funogale ngagesigabac.
20 Sugucnenonggeng Yesu ye lama-damongtowa ingucne damongnubagac. Aime Kwele-mogungte Wapongti Yesu homackacni bagboliyeme fangkewecte Yesule sacka dodofic sanangne fafeginowagac.✡ Yer 32:40; Esek 37:26; 1Pi 2:25 21 Wapongti hocne Yesule ailu bole madicne sasawa banogale tapili bame wakengeleme yeicne angac nga ngage-ngage balaibedaingte. Ye inguc ainolelu ngageme madickedaicte, aibaba yogodi nongela fikedaic. Aime wac feicnedi yela mimiteng fafeginowagac, i noine.
22 Ngic hae-gbafocne, na hibi yago kwelengkegabac, i dalicne miyac, ilec ngenge yowa yago tatakic mikac galu ngageningte kpafengngebalu migabac. 23 Ailu monic yanguc edocngebabe ngagening, yenge agononggeng Timoti muc-mackacni lukecnoibong. Ilec ye nala biyac kwesidaictewa, noke momochac ngengela biyac fulu nganicngebadabelecte.
24 Nongele wenac-madicti micnefocngineng ailu ngic-ngigac Wapongte bingec sasawa yengela fugac. Ailu alingfocnonggeng Itali himongkacni yenge inguchac wenac-madicngineng ngengela logaing.
25 Wapongte baba-madicti ngic-ngigac sasawa ngengela fadaic.
I foinac.