1 Aime hudu-baba ngic yengele damong monic wacine Yulius, ye Sisale habu, yogowacni hudu-baba ngic 100 inguc damongebalu gawec. Aime Itali himongka hikenogale dameng bangkaleme ngictaudi mime Pol nga muc-macka ngic gocne Yulius yele molewa locebabong, yedi bacebame yenge momoc lac-wagewa feibong. 2 Aime wage yogo Adamitium taonkacni, ailu Asia prowins mesuina balaibelu taon ngiye-legackasoc, iwa hikenogale aime, Tesalonaika taon Masedonia prowins, iwacni ngic monic wacine Aristakus, yeholec nonge momoc hikeibeng.✡ Sale 19:29

3 Mac saeme wage Saidon taonka hike sulumelu iwa domaibeng. Yuliusdi Pol ago aicnolu ngagecnome taonka hikelu agofocine nganicebame ngani-bafic aicnoibong. 4 Aime wagewa hatacmac felu taon yogo hegilebeng gbelongti hikenogawa haic kwesime Saiparus nuc nga Asia prowins hewacnginac hikeibeng. 5 Hikelu Silisia nga Pamfilia prowins falockelu hikegacgu Maira taon Lisia himongka hike sulumelu hauibeng. 6 Aime iwa Aleksandia taonkacni lac-wage monic domalu Itali himongka hikenogale aiwec. Aime hudu-baba ngic yengele damongti lac-wage yogo nganilu iwa bacnubame feibeng. 7 Felu hadeng gocne uneng-uneng doic-bole bahikecgu Nidus taon ngiyewecka-haic hikeibeng. Hikebeng gbelongti wecnubame Krit nucka-haic hikeibeng. Hikegacgu nuc yogolec mesuine monic wacine Salmone falockelu 8 Lasea bangkalelu kiwec madecna monic fawec, wacine Wage Nalic Domadaingte, nonge doic-bole bagacgu iwa hauibeng.

9 Kiwecka dameng dalicne gaibong ailu mac-gbelong dameng bangkalelu gacgu basowalecnubadaickale Poldi sawang-yowa yanguc miwec, 10 “Ngic ngenge ngagening, yago nganilu ngagegabac, Entacka hikedabelengte, nongileng basowale-benangkebeng woc-wiyac homacnehac benang hauyackedaingte. Wage nga mafa sugu mi haudaingte, ngic nongileng momoc kiwecka haudabelengte ingucne aigac.” 11 Inguc edocebame hudu-baba ngic yengele damong yedibac Polle yowa mi ngagesingkewec. Ailu ye wage-damong nga wage fileine yekele yowa ngagelu balaibewec. 12 Ailu kiwec madecna yogo nganibong wagedi iwa mac-gbelongkolec dodomalesoc mi aiwec. Inguc aime yenge yogo hegilelu Krit nucka madecna monic fawec, wacine Finiks, iwa nalic haulu domaebongka mac-gbelong dameng miyac ainale homacnedi miibong. Iwa lai gbelong sanangnedi mi wecaigac, yafaladi sugu efecnemac wecaigac.

13 Aime kiwecka gbelong gbelong madicne weme wage-ngic yengi miibong, “Nalic hikedabelengte.” Milu angga fuluckebong ofeme Krit nuc kwegegengkelu hikeibeng. 14 Hikebeng dameng mi daliweme lai gbelong sugucnedi nuc falockelu wage magocina sanangnehac wewec. 15 Welu wage igockeme aibibiyelu hegilebeng gbelongte angacka hikeme hikeibeng. 16 Hikegacgu nuc kpisicne monic wacine Kauda, ilec siyacina hikebeng dinggi kiwecka haunogale aime 17 doic-bole bagacgu dinggi wage witina fuluckebong ofeme hefebong fawec.

Fame wage siyeckedaickale mucti basanangkelu wapiyeibong. Wapiyelu hefebong Siriti dingong faticna* Siriti dingong faticne yogo Afrika himongka fahikegac. iwa fedabelengkale hangocebame wage gumoinele kpoluc sugucne fuluckebong wame gbelongti fitolingnubame hikeibeng. 18 Hikebeng gbelong kucineholec welu fame basowalecnubadaickale mac saeme mafa gocne kiwecka wikebong hauwec. 19 Haume deboc hadeng habackang aime wagele bolele woc-wiyac wikebong hauwec. 20 Haume deboc hadeng homacne gbelong sugucnedi welu fawec. Fame nonge wenac me asocmeng monic mi fikeme nganilu ngage-ngagesingnonggeng fongkeme mi gadabelengte, inguc ngageibeng.

21 Aime ngic yenge dameng dalicne nosing misa hegilelu gacgubong Poldi lelu hewacnginang domalu yanguc edocebawec, “Ngic, ngenge nale yowa ngagedabong, ibac nongileng Krit nuc mi hegiledabeng. Ailu foinac, wage mi sowaleme mafa nalic mi wicebadabeng. 22 Aime yanguc edocngebabe, nongileng hewackacni monicti mi miyac ainale kwelengineng mi wadaic. Wagedi sugubac kwosockedaicte. 23 Awecnahac debocka na Wapongnele mic-yowa balaibelu gagabac, yele angelo monicti nala kwesi domalu 24 yanguc edocnuyec, ‘Pol, mi hangocguna, ga Roma ngictau Sisa yele dongewa domadamec, yogo fikedaicte.’ Wapongti gale mimilocte ailu yanguc migac, ‘Ngic yago ngenge wagewa gagaing, ngengelacni monicti mi miyac aidaicte.’✡ Sale 23:11 25 Ilec ngic yago ngenge kwelengineng madickena. Wapongti yowa edocnugac, yogo inguc fikedaicte, yogo ngagesingkegabac. 26 Aime wagedi sugu nuc monicka feme hegilebeng kwosockedaic.”✡ Sale 28:1

27 Inguc mime Adaria kiwecka† Adaria kiwec ye Mediteranean kiwec nebocine. Ye Grik himong nga Itali himong kwelina fagac. fabeng iyongnubame gaebengka deboc hadeng 14 aiwec. Aime deboc hewac-hewac wage-ngic yenge himong bangkalegac inguc ngagelu 28 dingong sawaine bangkalegac milu maine wikebong haume mitaine 36 aiwec. Aime hikelu maine hatacmac wikebong haume mitaine 27 aiwec. 29 Aime posa witina fedaingkale milu hangocebame wage haina angga 4 wicebabong haubong mac saenale milockeibong. 30 Milockebong wagele bole-ngic yenge wage hegilelu hikenogale ngagesilu wage dinggiine lobong haume kwesac ailu yanguc miibong, “Nonge wage mesuina angga monic wikebeng haudaicte.” 31 Inguc mibong Poldi hudu-baba ngic yengele damong nga ngicfocine yanguc edocebawec, “Entacka wage-ngic hikeyackedaingte, ibac ngenge wasecne mi aidaingte.” 32 Inguc edocebame hudu-baba ngic yenge dinggile muc helockebong dinggi sugudi kiwecka hauwec.

33 Haume mac sae-saele Poldi ngic yenge nosing noningte sanangnehac yanguc edocebawec, “Ngenge umacka nosing hegilelu gacgubong, yakumac hadeng 14 aigac. 34 Gobengineng nosingte aime nosing mi nono gacgu homadaingkale sanangnehac migabac. Ngenge kwele-yaec mi aining, ngenge sasawa nalic ngiyedaingte.” 35 Inguc mime yenge sasawadi nganibong dongenginang bret monic balu Wapong kwele-madic micnolu bauckelu nowec. 36 Nome yenge yogo nganilu kwelengineng madickeme yenge inguchac nosing noibong. 37 Ngic wagewa gaibeng, nongele dzalenonggeng 276. 38 Aime nosing nobong gebecebame wage efeckenale milu wit homacnedi wagewa fawec, yogo kiwecka wikebong haume wage efeckewec.

39 Mac saeme himong nganiibong ailu himong yogo mi ngage-motoibong. Ailu kiwec madecna monic posa mikac dingong sugu fame yenge yogo nganilu wage iwa nalic haunale miibong. 40 Inguc mibong ngic yenge angga mucngineng helocebabong kiwecka hauyackeibong. Haubong dingongka haunale wagele puli mucngineng lukelu kpoluc kpisicne hefelu fuluckebong feme gbelongti kpolucka weme kiwec heuckeme dingongka hikeibong. 41 Hikelu kiwec hewacka dingong monic ofelu fawec, iwa felu wage mesuine hifidackeme sanangkeme dibong sugucnedi wage haine weme siyeckeyackelu kpisic-kpisic ainogale aiwec.

42 Wage siyeckeme muc-macte ngic yenge fifiyac balu hikedaingkale hudu-baba ngic yenge muc-macte ngic wehomacebanogale miibong. 43 Inguc mibong hudu-baba ngic yengele damongnginengti Pol agong holecnonale ngagelu yenge kpatalayelelu yanguc edocebawec, “Fifiyac babaine ngenge kiwecka molickelu wintacke haulu fifiyac balu dingongka fedaing. 44 Aime gocne nonge katapa witina falu ilungkedabelengte nga gocnedi wage siyeckegacte sindacinele witina falu ilungkedaing.” Nonge nongileng bucnac inguc sasawa ailu dingongka feyackeibeng, aime nongelacni monicti mi sowalewec.