1 Kiŋariŋ jareyaŋuŋji sogueru ropeme Juda ŋiŋigo kubu yoyoka fukeru gobuŋ. Goineji kantri goineone wareru Grik buŋo mibuŋ eru goineji yoŋoyaŋunde moreŋgo go waperu Arameik eru Hibru buŋo miegobi. Oŋu gobi damaŋ oo noigoi fukeya. Grik buŋo mibuŋ, yoŋoji iŋi mibi sembeaya, “Aposol yoŋoji damaŋ so uqo mebo boroiŋgaru noreegobiyoŋ, Grik buŋo mimi ŋigo koje niŋore uqo mebo mobeine oi mobeine sowo noreegobi. Sogokoŋ so boroiŋ gabi so sagaga.”

2 Oŋu mibuŋ ore eru aposol 12 yoŋoji kiŋariŋ kubu oi kepore yabebi tumaŋgabi iŋi yajibuŋ, “Niŋoji sakire gio baku uqo munjaŋ boroiŋga yareru Anuture Biŋe giore damaŋnoŋuŋ soine so sagako mande gionoŋunji egu wakiiŋ. Oi so sagaga. 3 Ore eru ogopunoŋuŋ, maneniŋ! Ŋoŋoji ŋoŋo-ŋaŋunde botugone gio babapi bofuke yabeinebi. Moro Tiriineji ŋi maŋyaŋuŋ puseko Anutuji maŋgboroŋine fuŋine mo yareme biŋeroro fiine baku dimagobi, ŋi oŋuine 7 roosoe yabeinebi. Oi roosoe yabebi gio oi yarekabi oi siŋaŋ garu baku gonimiŋ. 4 Yoŋoji oŋu gonimiŋyoŋ, niŋonoŋe damaŋ so sanaŋgaru oŋga wosiru Anuture Biŋe buŋo miine dimaku misaueku gokimiŋ. Gio oo damaŋ so dimakimiŋ.”

5 Oŋu yajibi kubu sosowo yoŋoji “Soine sagaga,” mibuŋ. Oŋu miku ŋi tinaine Stiwen roosoebuŋ. Stiwen oi Anutu sanaŋine manesiŋ gako Moro Tiriineji maŋine puseko goya. Jikigaru ŋi yoo roosoe yabebi: Filip, Prokorus, Nikanor, Timon, Parmenas eru Nikolas. Nikolas oi kotu kantrire siti tinaine Antiokia oo fukeru jiki Juda ŋi fukeru maŋine Kristoreo kerisieya. 6 Oi roosoe yabebi aposol yoŋore jiŋo maio roperu rabi meyaŋuŋ qoruyaŋuŋgo ruaru oŋga wosiru mifia yabebuŋ.

7 Anuture buŋo misauebi touŋmoririineke fukeko kiŋariŋ yoŋore jareji Jerusalem sitio sogueru saueya. Soriŋ gio siŋaŋ yoŋore kubuone boakoŋ yoŋoji oŋuakoŋ maŋyaŋuŋ kerisieru Yesu manesiŋ gabuŋ. Oŋu.

8 Anuture yauŋmoririine eru usuŋine oiji gio babapi ŋi Stiwende maŋ puseko dimaku soi mosi qoqowirie sogo sogo oi ŋiŋigo botuyaŋuŋgo bako fukeya. 9 Oi fukeyayoŋ, Juda goineji pakereru Stiwen kiso etebuŋ. “Keŋgoroŋgaru warebuŋ, yoŋore oŋgawowosi pi kubu” * Oŋgawowosi pi kubu more tina oi iŋi fukeko mibuŋ: Ŋiŋigo tinabiŋeyaŋuŋke yoŋo goine furiyaŋuŋ babi biŋeyaŋuŋ fukeru rauyaŋunde kiŋaŋ omaine qaku gogu (sleiw) meyaŋuŋgone keŋgoroŋgaru warebuŋ, yoŋoji yoŋoyaŋunde oŋgawowosi pi kubu ruaru tinayaŋuŋ oŋu mibuŋ. yoŋore botugo Juda goineji Sairini eru Aleksandria Ijipt siti yoyoka oone kirieru wareru dimabuŋ. Ŋi oŋuji qodureru pakereru Silisia eru Eisia prowinsgone warebuŋ, yoŋore kubuone Juda ŋi goine oga yaperu moko Stiwenke gbedigaru noigoi eru migobobo mimane ebuŋ.

10 Oŋu mimane ebuŋyoŋ, Moro Tiriineji Stiwen boburogame maŋgboroŋ soguinere paio buŋoine bokirieru yajiya, oi Juda yoŋoji kepieiŋgo embimbiŋgaru wakibuŋ. 11 Embimbiŋgaru wakiru mimigaŋgaŋ eku raru ŋi goine bofukeru bapakare yaberu wareru iŋi mibuŋ, “Iŋoji igosisi buŋo miku oo Moses eru Anutu nifepupu eyateme manebeŋ.”

12 Oŋu miku raru ŋiŋigo kubu, yoŋore minebobo eru Kadi buŋore qaqaji yoŋore maŋgokaka buŋo mibi maŋyaŋuŋ jo jaya. Jo jako qojugaru wareru Stiwen poreru qafagaru roru soriŋ kaunsol kubu yoŋore jiŋo maio rabuŋ. 13 Raru ŋi goine oga yabebi waperu Stiwende sakigo buŋo ikoine ruaku iŋi kitiŋgaku mibuŋ, “Ŋi yo oiji boji soriŋnoŋuŋ eru Mosesre Kadi buŋo kiso eku so bokeegayoŋ, oi jikigaru miega. 14 Kiso eku iŋi miko manebeŋ, ‘Yesu, Nazaret ŋiji boji soriŋ yo ketotieme siŋsaŋ peiŋ eru Mosesji Kadi buŋo noreko pega, oi qopieiŋ.’ ”

15 Oŋu mibi soriŋ kaunsol kubure tutumaŋgo ŋebuŋ, oi sosowoji Stiwen poretiŋ pibi kamasiineji Sombuŋ mimerereŋ oŋuine fukeko ŋoneru manebuŋ. Oŋu.