15
Pegtipon doton te Jerusalem
1 Nayan, doen menge otaw egpemenal dimateng lekat te Judiya kidoen te Antyokya aw migtoladà dan, kagi dan, “Eked kaw pekelowà lekat te salà niyo singed aw tolien kaw aw tomolò kaw te kedita te punù ingkeliwat i Moises.”
2 Meneng nengela si Pablo aw si Bernabe diyà te intoladà dan sìyan. Migpedindilay dan aw wedà dan pegsebad. Penga niyan, miglalang se menge otaw egpemenal te isogò dan si Pablo aw si Bernabe aw menge doma otaw domoton te Jerusalem amon megkità dan te menge sogounun i Cristo aw menge egpengibing te simbahan tepad te toladà dan sìyan. 3 Penga niyan, impekesayo dan te menge otaw egpemenal. Peg-okit dan te Fenisya aw Samarya, mig-indan dan te nemenal den se menge otaw kenà Judiyo. Pegdineg te kedita te otaw egpemenal kenyan, ontò dan neluba. 4 Pegdateng dan doton te Jerusalem, sinagman dan te menge otaw egpemenal, aw menge egpengibing te simbahan, aw menge sogounun i Cristo. Penga niyan, mig-indan si Pablo aw si Bernabe te kedita te ininang te Timanem pineokit kandan. 5 Meneng timindeg se menge sakop te Parisiyo egpemenal ki Jesus. Yan se menge otaw ontò egtolò te punù ingkeliwat i Moises. Minikagi dan, “Eked tadon peekopi se menge otaw kenà Judiyo singed aw tolien dan aw tomolò dan te kedita te punù ingkeliwat i Moises.”
6 Penga niyan, migtipon se kedita te sogounun i Jesus aw menge egpengibing te otaw egpemenal amon megpebelaw-belaway dan te menonen se menge otaw kenà Judiyo, aw tolien dan aw eked. 7 Nenamay dan migpebelaw-belaway. Penga niyan, timindeg si Pedro aw minikagi, “Menge kedowa ko, netegahan niyo den besi te siak se pinemallì te Timanem diyà te kedita tadon amon megtoladà a te Mèpiya Indan diyà te menge otaw kenà Judiyo amon memenal dan. 8 Netegahan te Timanem aw melobos se pedowan te kedita te otaw. Impetaga-taga din te sinakop din den se menge otaw kenà Judiyo pineokit te pegpemegay din te Espiritu Santo diyà kandan onawa te pegpemegay din diyà kenitadon kedengan. 9 Eden niyo aw olò menge Judiyo se linisan din te pedowan lekat te salà, meneng eleg din heman linisan se pedowan te menge otaw kenà Judiyo pineokit te pegpemenal dan kandin. 10 Meopal besi se Timanem aw ipetolò niyo dan te ontò melima, so wedà iyan kebatog te kemonaan tadon, aw eked kidon heman pekebatog kenyan. 11 Meneng netegahan tadon den te nekelowà kidon lekat te salà pineokit te tabang i Jesu Cristo kenitadon. Onawa heman se pegpelowà din te menge doma otaw, pengkey kenà dan Judiyo.”
12 Penga niyan, netingen se kedita te otaw aw nenenalan dan. Mig-indan si Bernabe aw si Pablo te menge kepelahan ininang te Timanem pineokit kandan doton te menge otaw kenà Judiyo. 13 Pegkepenga niyan, minikagi si Santiago, “Menge kedowa ko, penenalan kaw kanak. 14 Mig-indan den si Simon te doen den heman menge otaw kenà Judiyo pinemallì te Timanem amon makop dan heman diyà kandin. 15 Onawa heman se kagi te Timanem insolat te telekeliwat te kagi din,
16 ‘Penga niyan, lomikò a. Pengkey simagked se peglowan te bowad-bowad i David, meneng todà ko ipedeleg se peglowan dan 17 amon tomaking te Pengolo se kedita te otaw tinawal ko pengkey kenà dan Judiyo. 18 Yan se kagi te Pengolo impetaga-taga din gebii.’
19 “Nayan, aneng-aneng ko, eked kidon pegleges te menge otaw kenà Judiyo egpemenal te keilangan tolien dan. 20 Meneng mèpiya aw olò kidon somolat kandan aw megpunù kidon te eked dan kaen te pengelapen tapay imbegay diyà te inotaw, aw ayam-ayam egpelengen aw dipanog, aw eked dan heman peg-inabut te kenà kandan esawa. 21 Mèpiya aw tomolò dan kenyan, so lekat te gebii doen gayed egtoladà te punù ingkeliwat i Moises te kelikit te Sebado doton te simbahan te Judiyo kidoen te teg sebad-sebad lonsod.”
Solat diyà te menge otaw egpemenal kenà Judiyo
22 Penga niyan, migsebad se aneng-aneng te kedita te otaw egpemenal sipat menge sogounun i Cristo aw menge egpengibing te simbahan. Pinemallì dan se dowa otaw tomaking ki Pablo aw si Bernabe domoton te Antyokya. Se pinemallì dan, yan si Silas aw si Judas, se doma ngadan din si Barsabas, so induyun dan te kedita te otaw egpemenal. 23 Seini se kagi te solat impeibing kandan.
“Menge kedowa day kenà Judiyo doton te Antyokya, aw Sirya, aw Silisya. Se simolat kani, yan se menge sogounun i Cristo aw egpengibing te simbahan. Sikami se kedowa niyo. 24 Doen ekon menge otaw lekat dini migsamok kenyo pineokit te pegtoladà dan. Migbulung dan ekon te pedowan niyo. Meneng wedà kay sogò kandan doton kenyo. 25 Migsebad den se aneng-aneng day te isogò day se otaw domoton kenyo, aw tomaking dan te kedowa tadon si Bernabe aw si Pablo egkedekelan tadon te pedowan. 26 Se didowa dan gayed egsalig te Pengolo tadon si Jesu Cristo. 27 Se pinemallì day isogò doton kenyo, yan si Judas aw si Silas. Sobloden dan se kagi insolat day doton kenyo. 28 Inelladan kay te Espiritu Santo, aw yan migsebad kay te eked kay pegleges te pegtolò niyo te kedita te ketanem day, meneng seini olò se ipunù day kenyo. 29 Ikà niyo egpengaen te pengelapen tapay imbegay diyà te inotaw, aw dipanog, aw ayam-ayam pelengen. Ikà niyo heman eg-inabut te kenà kenyo esawa. Mèpiya aw tomolò kaw kenyan. Taman den iyan te ikegiyen day kenyo.”
30 Penga niyan, nesayo se insogò dan pesalo doton te Antyokya. Pegdateng dan doton te Antyokya, pigtipon dan se kedita te otaw egpemenal. Imbegay dan se solat diyà kandan. 31 Pegbasa dan kenyan, ontò neluba se pedowan dan tandà te solat sìyan.
32 Nenamay migtoladà si Judas aw si Silas te menge otaw egpemenal, so telekeliwat dan te kagi te Timanem. Inantag dan se pedowan te menge otaw egpemenal amon melobos se pedowan dan diyà te Timanem. 33 Pegkenamay-namay dan kidoen, nesayo si Judas aw si Silas, aw minikagi se menge otaw egpemenal te mèpiya peg-ipanaw dan. Penga niyan, minolì dan doton te Jerusalem. [ 34 Meneng aneng-aneng i Silas, mèpiya aw meg-ogpà sikandin kidoen.] 35 Meneng mig-ogpà pa si Pablo aw si Bernabe doton te Antyokya. Migtoladà aw mig-indan dan te kagi te Pengolo. Medita heman se otaw migtelaban kandan.
Pegsoway i Pablo aw si Bernabe
36 Pegkenamay-namay, minikagi si Pablo diyà ki Bernabe, “Elew, lomikò ki den doton te kedita te lonsod, sìyan pigtoledaan ta te kagi te Pengolo kedengan, amon ketegahan ta aw eden den se kandan pegpemenal.”
37 Ibeg i Bernabe ipetaking dan si Juan, se doma ngadan din si Marcos. 38 Meneng eked keibeg si Pablo, so simoway si Marcos kandan kedengan doton te Pampilya, aw wedà ebey pegtelaban kandan. 39 Yan migpedindilay si Bernabe aw si Pablo, aw yan se doun te migsoway dan. Penga niyan, impetaking i Bernabe si Marcos, aw simakay dan te dakel belangay pesalo doton te Sipro. 40 Yan pinemallì i Pablo si Silas tomaking kandin. Migtawal-tawal se menge otaw egpemenal te megtabang se Pengolo kandan te peselowan dan. Penga niyan, nesayo dan. 41 Tineped dan se menge lonsod doton te probinsya te Sirya aw Silisya. Inantag dan se pedowan te menge otaw egpemenal amon melobos se pedowan dan diyà te Timanem.