1 Wuupaceroni Nluku hopattusa irimu ni itthaya. 2 Ilapo yaari yoohinnanna ni yoohitthu; ipiphi yahokhuneela ipahari ni Nnepa wa Nluku wanaweettakaca waculu maasi. 3 Ni Nluku aheera: Ukhale waarya, ni uhokhala waarya. 4 Nluku ahoona wiira waarya uri wooreera, phimaana ahokawaniha waarya ni ipiphi. 5 Nluku aheehana waarya nwe uthana, nuuripela nwe aheehana uhiyu. Wahela nuusa; nno naari nihuku noopacera.

6 Wahoolo Nluku aheera tho: Iriyari yo maasi nikhale nlaka ninhala ukawaniha maasi wawaya wawaya. 7 Vano Nluku ahopanka nlaka ni ahokawanihaca maasi yari vathi ni ale yaari uculu. Ni commo waheerannyaa. 8 Nlaka nno Nluku aheehana irimu. Waheela nuusa; nno naari nihuku nonayeeli.

9 Vaavale Nluku aheera: Maasi ari vathi waya irimu, athukumane nipuro nimoca, ikhale itthaya yowuuma. Ni commo waheerannyaa. 10 Mphantte wo wuuma Nluku aheehana itthaya, ni nthukumano wo maasi aheehana ipahari. Ni Nluku ahoona wiira wari wooreera. 11 Vano Nluku aheera: Itthaya yothene ikhuneeliye ni itakhwa, maphumpulu ni miri cimmaha mihokorokho ni ipyo co khula nnanna. Ni commo waheerannyaa. 12 Itthaya yahomela itakhwa yaarina maphunpulu o khula nnanna. Ni miri cowiima cavaha inuku co khula nnanna. Nluku ahoona wiira wari wooreera. 13 Waheela nuusa; nno naari nihuku noneeraru.

14 Nluku aheera: Cikhale imwaleelo wirimu wiira cikawanihe uthana ni uhiyu. Wiira cikhale cennyo nthoonyero wo ukati, mahuku ni myakha, 15 ni cikhale coomwaleela wirimu ni vathi. Ni commo waheerannyaa. 16 Nluku ahopanka imwaleelo piili cuulupale; imwaleelo yuulupale iyo wiira ilamulele uthana ni yankani iyo wiira ilamulele uhiyu. Ciicammo ahopanka itthoottwa cinci. 17 Nluku aheesa cennyo wanlakani no wirimu wiira cimwaleele itthaya, 18 cilamulele uthana ni uhiyu, ni cikawanihe waarya ni ipiphi ni Nluku ahoona wiira wari wooreera. 19 Wahovira ucoocilo ni wicisu; nno naari nihuku noneecese.

20 Ciicammo Nluku aheera: Mmaasini mmo akhale makoto onama coomumula, ni iriyariru irimu ni itthaya avaave asaanuni. 21 Commo Nluku ahopattusa inama cuulupale co mpahari ni inama cikhwawe coomumula cinkhala mpharya co khula nnanna, ni asaanuni othene o khula nnanna. Ni Nluku ahoona wiira wari wooreera. 22 Vano Nluku ahoreeriha eeraka: Ntotholane ni muncereranyee! Ncare mmasini o mpahari! Ni inuni citotholane vathi va! 23 Waheela nuusa; nno naari nihuku noneethanu.

24 Ni vaavale Nluku aheera: Itthaya ikhale inama cikumi co khula nnanna; nhuwo ni inama contakhwani ni masene o mwiilaponi, o khula nnanna. Ni commo waheerannyaa. 25 Nluku ahopanka masene o khula nnanna, nhuwo wo khula nnanna, ni inama cineepurula co mwiilaponi co khula nnanna. Ni Nluku ahoona wiira wari wooreera.

26 Vano Nluku aheera; nimpanke ntthu oolattana ni hi ni ookhala toko hii. Uyo alamulele ihopa cothene co mpahari, inuni cothene co wirimu ni inama cothene cuulupale co mwiilaponi, ni inama cothene cikani cineepurula vathi. 27 Nluku ahompattusa ntthu oonlattana naawe oolattana ni Nluku ahompattusa; nlopwana ni nthiyana phaapattusilyawe.

28 Nluku ahaareerihaca, ni aheerelaca: Ntotholane ni muncereranyee! Ncare ni mmwareele ilapo yothene! Nlamulele ihopa cothene co mpahari, inuni cothene co wirimu ni inama cothene cineetta vathi. 29 Nluku aheera tho: Kinawuuvaha miri cothene cowiima cimenle ilapo yothene ni cinvaha ipyo, ni miri cothene cinvaha mihokorokho ni inuku. Cennyo cinwookhala coolya cinyu. 30 Ni kinawuvahani mataakhuru othene wiira akhale yoolya eenyu mpaka ciicammo inama cothene cirina ukumi: inama cothene cuulupale co mwiilaponi, ni inuni cothene co wirimu ni inama cothene cineettakaca ilapo yo vathi. Ni commo waheeranya.

31 Phimaana Nluku hoona wiira citthu cothene cipankilyawe, ciri cooreera venci cinenne. Wahela nuusa; nno naari nihuku nonasiita.