9
Allah ysok raa mana ro Israel
1 Taja, tme, tao, tano na; bo ro jõ, Paulus, tkyas kʼanu fo jõ sioh fee. Kristus ysya Har ro Allah to mhar mawe jõ tkyas bo refo mkah thaf ro moof. Bo tkyas to mabo yum. 2-3 Jõ tnaut raa ro Israel,* Tiwya Allah ytu Yakub yawe yasom rait Israel ye. Feto to kube rait to, raa mtu mawe raa ro Yahudi ye tna msya raa ro Israel ye. raa mana wojõ to, jõ sraujin toni yoyo. Jõ tawe soh Allah ksoh mi yno ayoh mroh kʼjõ rof re jõ tkai kair tna ana weto mkai riof to jõ ksoh. He mfe. 4 Tiwya Allah ysok ana, raa mana ro Israel to, yse hayah tna yno bo moof kʼana ye. Ait yayõ ana re ana mamo ku wAit. Ait yerif bo yase rAit kʼana. Ait ysi bo kʼana. Ait yoo Watum ro Musa yee kʼana. Ait yerif iso re ana skabuk Ait mam Samu rAit ro mbau. Tna Ait yawe kbe yno bo ro moof kʼana ye. 5 Raa ro Israel, hohos wana to, raa ro masom.† Bi Abraham, Ishak, msya,Yakub. Tna Mesias tait raa ro Israel ye. Yme msya bi ro tiwya ytos Ait to, wore wo Kristus yamaʼt tabam refo: Ana weto to raa ro Israel ye. Kristus tait Allah ro ybo bombra beta. Tna kbe raa mbaut bi Ait mamo snok mam meen hame wajin. Amin: Mabo oh!
6 Feto to tiwya Allah yawe yno bo ro moof kʼraa ro Israel. Yatem roro re yno fe mfe a? Yatem roro fee! Menohe raa mana ro Israel beta mamo raa ro Allah wAit ro wotur fee. Allah ysok raa to, ymat raa mana sai aran fee. Ana ro Ait ysok oh mi mamo raa wAit to. Roma 2:28,29; Galatia 6:16. 7 Nmat kube ro Abraham yabe: Ana beta to Allah ytu yawe ‘Abraham yare na ro wotur fee’. Allah yawe kʼAbraham yawe,
“Kbe jõ tmat kube wonyõ ro Ishak yabe, ana mesait aran oh mi ttu ku woJõ.”
Kejadian 21:12
8 Au oh mi ku ro Abraham wAit beta mamo ku ro Allah fee. Tiwya Allah ysi bo kʼAbraham yawe meen ait yabe ku sait. Ku ro tii ysi retait tait oh mi ku ro krek waan ro yaja. Yao ro yabi fee. Feto ye mfo wefo to raa ro tii Allah ysi weto oh mi Ait ytu yawe ku wAit. 9 Tiwya Allah ysi bo kʼAbraham yawe,
“Tahun rouu Jõ thah te tama to kʼnyõ. Kbe tama tmat ku mees sait. Ku ait ro nyõ nsya Sara nbe oh.”
Kejadian 18:10
10 Nmat kukek ro Ishak yabe ye: Ishak tait anu hohos ranu ye. Ait yoo Ribka tna au mhaf. Tna mabe ku mabo ewok mam ayõ sau reto ye. 11-12 Fai au mabe ku weto fefares tna Allah yawe kʼau yawe,
“Ku ro nabe ytek yatim to, kbe yamo sryan ro yari bo kʼait ro ytek tis yrof.”
Kejadian 25:23
Ku mabo ewok reto au mabe fefares. Ana mno bo ro moof aro fefares tna bo ro mkair aro fefares ye. Menohe Allah ysok ku sait. Ysok Yakub to ku retait ja yno bo moof fe mfe a? Mfe. Allah ysok Yakub fyi? Ysok Yakub mamyot si bonaut rAit sai. Allah yhar bo rAit oh. 13 Reto oh mi Allah ykyas mam bokom rAit yawe,
“Jõ tatmof Yakub tna Jõ knait Esau.”
Maleakhi 1:2-3
14-15 Feto ye, tiwya Allah yawe kʼMusa yawe,
“Jõ tsok raa taro tawe tatmof ana. Soh tawe tsok raa weto tno bo ro moof kʼana to, kbe tno sai.”
Keluaran 33:19
Feto to anu bkyas bwe Allah yno bo ro mkair fe mfe a? Allah yno bo ro mkair fee saut! 16 Allah ksoh ysok raa ro kbe mamo ku wAit to, ysok ana mamyot bo ro ana mno to fee. Ana hamer mamo raa wAit oh mi Ait ysok ana fee ye. Allah ysok tna yatmof raa mamyot Ait ksoh rAit sai. 17 Bokom ro Allah mawe,
“Tiwya Allah yawe kʼraja ro Mesir yawe, ‘Jõ tno re nyõ namo aban mana nbo raa ro Mesir beta. Tna Jõ tisti bo msai mbtek mai kʼnyõ. Jõ tno feto oh mi kbe raa beta mmat tna mhar tatak aJõ. Mhar mawe Jõ fi raa ro tase tbo raja ye tna tbo raa beta ye. Tibyo kbe raa mamo mkyas Jõ tasom aJõ kʼraa ro tabam refo beta.’ ”
Keluaran 9:16
18 Feto to anu bhar bwe Allah ysok raa taro yawe Ait yatmof ana. Tna taro ysok to, yno re ana mimara mtuk mnan fi raja ro Mesir retait.
19 Menohe anu sait santri bo ysya jõ yawe feto rauk, yawe: “Aha! Soh Allah ksoh rAit sai yno raa taro mimara mtuk to, tibyo mako hawe sai bo ro Allah yawe to mabo tu. Tis rau Ait ymit safo mana kʼraa weto yno fyi?” 20 Nkyas bo feto to ma! Anu raa tuu ro tabam refo sai. Anu to raa ro Allah yfen. Bofen ro ait sait yfen to ja masen hafrah bo si kʼait ro yfen bo reto to fee. Nno be bo ro yfen reto mhafrah mawe, “Nyõ nfen jõ mfi fefo fyi?” 21 Nnaut raa ro ja mabah koh tna mfen mangkuk bo (tukang periuk). Mfi bo raa sait yamo yabah koh baro. Yoo tna yihabah yse mam kbair ewok. Tna kbair ro sau to, yoo yfen bo ro moof. Tna kbair ro ewok to, ait yoo yfen bo ro mkair-kar sai. Yfen bo mamyot bawya ro ait ksoh sai mam yhaf mato rait. 22 Feto ye Allah oh mi yfen anu raa. Ait yfen raa taro to, yawe Ait kmo ana. Yhar yawe meen yno bo ro msai mbtek mai kʼana yum. Ait yase yno bo kʼraa mamyot Ait ksoh rAit sai. Menohe Ait yhau kanyin toni wia sai. 23 Ait kanyin wia afo re kbe raa taro mmat bo yase rAit. Mmat bo yase rAit ro miwer toni. Raa beta to, mkbair ewok. Ait ysok mkbair sau to yawe yatmof ana. Yatmof ana tibyo mkai riof ro mase. Mkbair ro mkai riof reto to, mhar mawe mkbair jaro mkai bo ro mkair-kar. Tibyo mkbair ro mkai riof mrok mhar mawe bo yase ro Allah to mase toni syok. 24 Tna anu oh mi mkbair ro Allah yatmof reto. Ait ytu anu bbam raa mana ro Yahudi taro ye tna anu bbam raa mana roto taro ye. Yawe anu beta kbe bmat bo yase rAit. 25 Tiwya Allah ykyas bo reto mam bokom ro nabi Hosea yawe,
“Raa ro tiwya raa woJõ to fee, meen jõ ttu ana re kbe ana mama mo kʼJõ tna mamo raa woJõ ye. Tna raa ro tiwya jõ thafri fee, meen jõ thafri ana ye.”
Hosea 2:22
26 “Tiwya Allah yawe kʼraa ro mhau mam rabin sau to yawe, ‘Anu to raa mana woJõ to fee!’ Menohe meen kbe Ait yawe kʼraa weto yawe, ‘Jõ fi Allah ro yaam. Tawe kʼanu tawe, “Mfo wefo anu nmo raa mana woJõ.” ’ ”
Hosea 1:10
27 Tna nabi Yesaya ykyas raa ro Israel yawe,
“Ku be ro bi Israel to, msis bia mfi snyik makan ro ftau mboh mam sawan maam. Menohe ana kebet aran sai kbe mkai riof. 28 Kbe Allah ymit safo kʼraa ro tabam refo. Yno bo mbtek mai kʼana mnan si. Yno bo mbtek mai kʼana abut sai. Tibyo kube ro bi Israel kebet aran sai kbe mkai riof.”
Yesaya 10:22-23
29 Nabi Yesaya yawe tinyi yawe kbe Allah yatmof raa ro Israel baro, yawe,
“Allah tait yase ybo bombra beta. Oos Ait maami yno raa wanu baro bhau, maami anu beta safe mkak bnan fi raa ro Sodom msya Gomora bo oh.”
Yesaya 1:9
Allah yawe raa ro Israel mhaf moof ati to fee
30 Feto to, anu bhar bwe fefo, “Raa ro wase agama Yahudi to, tiwya ana saso iso re mamo mhaf moof to fee. Ana saso fee, menohe ana smot Kristus tna mkai mhaf ro moof mam iso reto: Allah ymat mees ro Yesus tibyo yawe ana mfi raa ro mhaf moof ati meto. 31 Tna raa ro Israel tomer kro Watum ro Musa re kbe Allah ymat ana yawe ana raa ro mhaf moof. Menohe mfe. Ana mkai fee. Allah ymat ana yawe ana mhaf moof to fee ye.” 32 Fyi re ana weto mamo mhaf moof to fee? Ana mamo iso ro sre: Ja ana mnaut mawe ana kro Watum ro Musa kaket tibyo mkai riof. He mfe. Iso ro raa smot Kristus to, ana hawe bo kro. Raa fret bo mawe fraa sau burut wa iso ro ana mamo. Tibyo ana wasim tna mbtek mawe.‡ Yesus Kristus tait ynan fi fraa reto. Raa ro agama Yahudi (au oh mi raa ro Israel) mkyas mawe Yesus fi Kristus ro Allah ysok mkah bo yoo riof ro mase yee kʼraa to fee. Sion mkyas tabam ro Allah rAit. Raa taro mkyas tabam ro Israel to mtu masom Sion ye. 33 Tna bo reto to, mabo oh mnan si tiwya Bokom ro Allah mkyas matim wia:
“Jõ too fraa sau tse mam Sion. Fraa reto mburut iso wa. Tna raa ro Yahudi wasim fraa reto tibyo mbtek mawe. Menohe raa ro smot ‘Fraa’ reto to, meen manwaruk fee.”
Yesaya 28:16
*9:2-3 Tiwya Allah ytu Yakub yawe yasom rait Israel ye. Feto to kube rait to, raa mtu mawe raa ro Yahudi ye tna msya raa ro Israel ye.
†9:5 Bi Abraham, Ishak, msya,Yakub.
9:6 Roma 2:28,29; Galatia 6:16.
‡9:32 Yesus Kristus tait ynan fi fraa reto. Raa ro agama Yahudi (au oh mi raa ro Israel) mkyas mawe Yesus fi Kristus ro Allah ysok mkah bo yoo riof ro mase yee kʼraa to fee. Sion mkyas tabam ro Allah rAit. Raa taro mkyas tabam ro Israel to mtu masom Sion ye.