1 Ti sau to, Yesus yros ykyas bo mam maru ro Genesaret. Tna raa mawat myar mama mawe mari bokyas rAit ro ykyas mbam kʼAllah. 2 Tna Ait ymat wiak trion ewok raa miti mam weto. (Raa ro wiak wana weto hre myon jala wana.) 3 Wiak sau to Simon rait. Tna Yesus yamo yaut hre mam wiak reto, tna ybis Simon yyum wiak reto kebet baro sai. Tna Yesus hre ykyas bo kʼraa.

4 Yesus ykyas bo mkak tna yawe kʼSimon yawe, “Miin baro namoʼt wore wo uun wono. Tna mbeak jala re nfot syoh aro.” 5 Simon yawe, “Guru; riwai ti ro miyõ refo amu nsafo beak jala saso syoh he nfot aro fee! Menohe Nyõ nbis feto to, jõ te beak jala refo u oh.” 6 Ana beak jala refo tna fo mkuk jala reto maut tna mmat menohe syoh mawat toni. Tna jala reto maja taro hri. 7 Tna ana mtu mafoh wana taro mama. Ana mama tna msya ana mkuk jala refo mkah syoh mawat toni, mbeak mam wiak wana weto mato. Tibyo wiak ewok reto matot toni maami wiak hoh.

8-10 Simon yafoh na weto, sait yasom Yakobus tna sait yasom Yohanes. Ana mbewok to Zebedeus yare. Ana msya Simon-Petrus mmat syoh mawat tibyo mrok ktak. Tna Simon yamo yo kʼYesus yjit yimna. Tna yawe, “Tuhan; sikba jõ namo rof: Jõ fi raa kair!” Tna Yesus yawe kʼSimon yawe, “Waa ma! Maban wore wefo nyõ nfot syoh u fee. Kbe nyõ nfot raa.” 11 Ana mabo tuuf weto mkuk wiak wana mamoʼt mne. Tna sikba bo wana beta makus masen kro Yesus.

12 Ti sau Yesus yhau mam remo sau tna ymat raa ro yafa kusta ro mkair-kar toni sait. Raa retait ymat Yesus tna yjit yimna soh-soh kʼAit yawe, “Bobot, soh Nyõ ksoh meto mi, nisoh jõ re kusta refo marak.” 13 Tna Yesus yatem ybo ait tna yawe, “Jõ ksoh, tawe nyõ mbros oh!” Ayõ reto si fo, kusta reto mrok marak. 14 Tna Yesus yawe wa kʼait yawe, “Namo to, nkyas bo refo kʼraa ma. Namo nerif narak anyõ kʼimam ro agama Yahudi sait re ait ymat sas nyõ. Nyõ noof u tibyo noo bo nee. Nee kʼimam re ysan kʼAllah mamyot Watum ro Musa ykom yawe. Nno bo weto re kbe raa mhar mawe netsu anyõ to moof u.” 15 Menohe Yesus yasom to, raa mkyas renti mam woyõ-woya sai. Tibyo raa myar mama mari bokyas rAit tna soh-soh kʼAit re yisoh ana re kiyam wana marak ye. 16 Tna mun aro to, Yesus yamo skabuk mam yuk ro mimon.

17 Ti sau Yesus ykyas bo kʼraa mam samu sau. Tna raa manes ro agama Yahudi baro hre mari ye: Raa ro Farisi msya guruagama ye. Ana mama mbam kota msya remo aro rau-rau mam provinsi ro Galilea, tna mbam kota Yerusalem msya remo roto taro sor mam provinsi ro Yudea. Tuhan yatak rAit yatam Yesus. Feto to Ait yisoh raa ro mafa kiyam. 18 Tna raa baro mama nkatar ait ro yaa mhai sait mam sese. Tna yafoh wait weto mawe makah raa retait twok mam samu reto mse re Yesus ymat. 19 He raa mawat burut wa Yesus. Feto to ana makah ait maut abyõ ti manaf. Tna ana mitrah ti manaf reto baro mno hroh tna mruk ait mkah sese rait ye. Mruk mam samu mato mam wore wo Yesus yros ysya raa mawat weto susai. 20 Yesus ymat ana tna yhar yawe ana smot Ait matak. Tibyo Yesus yawe kʼraa retait yawe, “Tao, iro wonyõ to, Jõ tyon oh.” 21 Raa ro Farisi msya guruagama weto mari bo ro Yesus yawe feto tibyo kmo. Tna mnaut mawe, “Bi Ait refi yrok yawe Ait awya, re yawe yyon iro ro raa! Bo ro Ait yawe to berasi Allah! Awya ytai yyon iro? Allah yesait aran sai!”

22 Menohe Yesus yhar bo ro ana mnaut weto oh. Tna ytu kʼana yawe, “Fyi re anu nnaut bo weto mam nsrau mato wanu to? 23 Soh Jõ tawe kʼait refi tawe, ‘Iro wonyõ to, Jõ tyon oh.’ Bo ro msai fee: Kbe raa mahni bo reto mabo fe mfe a. Menohe tawe, ‘Nasen namo oh!’ Tawe feto afo re kbe raa mmat bo reto mabo. Mmat tna mhar mawe Jõ ttai tno bo ewok ye to. Ewok ye mnan-nan kʼJõ. 24 Jõ fi 'Ait ro Yroh Yama Yfi Raa Sai'. Tna bo ro kbe Jõ tno fo, Jõ tno re kbe anu nhar Jõ tatak tyon iro raa mam tabam refo.” Tna Yesus yawe kʼAit ro yaa mhai retait yawe, “Nasen, tubat sese anyõ, tna nasom namo bonyõ oh!” 25 Tna raa beta mmat he raa retait yasen yros fooh. Tna ait tubat sese rait yasom yamo. Yamo bait ybaut Allah yamo. 26 Ana beta miskawowo tna mbaut Allah. Ana mawe kʼanya mawe, “Ayõ refo anu bmat bo msai ro mase toni!”

27 Yesus frok ybam amah reto yamo. Yamo tna ymat raa ro ja yoo namabyoh (pajak) yee kʼpemerintah ro Roma sait. Yasom Lewi.* Lewi tait, ja raa mtu yasom Matius ye. Bi ait hre mam kantor ro namabyoh rait. Tna Yesus ytu kʼait yawe, “Nama kro Jõ bmo!” 28 Lewi yari feto, tibyo ait yasen sikba bo beta, yamo kro Yesus mamo.

29 Ti sau fo, Lewi yakyõ bokyõ sau re yafoh wait mama fri anya msya Yesus. Tna raa msis mama hre mait boit su. Lewi yafoh weto taro mamo raa ro moo namabyoh ye. 30 Raa Farisi ro mamo guruagama msya raa Farisi roto mmat he Yesus ysya raa wAit makyõ bokyõ su msya raa weto. Tna ana santri bo mawe kʼYesus kuber wAit (murid-murid) mawe, “Fyi re anu hre niit boit su nsya raa ro moo namabyoh tna msya raa ro ja mno iro bo weto?” 31 Tna Yesus yawe, “Raa ro metsu moof to, ja mamo saso dokter fee. Ja raa ro kiyam oh mi mamo saso dokter to. 32 Jõ tama ttu raa ro mhaf moof to fee. Tama fo ttu raa ro mno iro afo re kbe ana mashana.”

33 Raa ro Farisi msya raa taro mawe kʼYesus mawe, “Kuber ro Yohanes msya kuber raa ro Farisi ja mhau bo mait ye tna skabuk ye. Menohe kuber woNyõ ja mhau bo mait to fee.” 34 Yesus ykyas bofret kʼana yawe, “Ati ro raa sait ymen fnya to, ja raa mno bo bawya? Anu nwe kʼait yafoh wait ro mama to, nwe ana mhau bo ro mait sai a? Mfe! Ana makyõ bokyõ fea! 35 Ana makyõ bokyõ wia. Tna fo raa moo ait makah mamo. Ati reto to, kbe mafoh wana sraujin tibyo mhau bo ro mait. Kuber woJõ mfi feto ye. Jõ thau tsya ana fares fo, ana sraujin fee. Menohe ati ro Jõ sikba ana to, kbe ana sraujin tibyo mhau bo ro mait ye.”

36 Tna Yesus ykyas bofret sau naut kʼana yawe, “Mfi bo ratan matah ro hri-hra sau. Ja fnya moo ratan ro ntfia tna ktan fee. Au moo ratan mabuf ro ntfia reto tna mtin kait mkah ratan rau ro matah fe mfe a? Soh au mno feto to, kbe mno ratan rau ro ntfia reto mkair. Tna raa mmat mawe ratan mabuf ro moof msya ro matah to, mmat mawe ewok reto mnan anya fee. 37 Feto ye, Ja raa mror anggur maya ro tna mam baah marak ro matah fee. Anggur maya reto mno baah marak reto matu mbua. Tna kbe anggur maya reto maus miyi mroh mamo mkak. 38  Anggur maya ro tna to, ja raa moo mror mam baah marak ro tna sai. 39 Raa ro mhar anggur maya to, ana nksoh rana ro matah to mata. Tna ana hawe mata anggur maya ro tna.”