1 फरी अङग्‍यालाई चरैःसिउ ज़्‍यावए उजूँनी है ङादाचिज़्‍या। तान्या ते आव पाँए उजूँनी गे प़ाइँए ज़ गेसैंज़्‍या, खाली सैंन्‍या जैसिज़्‍याव मिँ ते स॰ज़्‍या। नैं मेंलाई चिऊन्‍यानी वाज़ प़ाइँलाई तान्‍या ताज़्‍या। 2 जोए ‘ङा ज़ बनै ङासैंज़्‍या’ है लिज़्‍या, नो मिँए आःपै सैंव परिन्‍या भरी काता ज़ मासैंताव। 3 जोए परमेस्‍वरलाई मया दोज़्याव, होलाई परमेस्‍वरए सरेस्‍ज़्‍याव।

4 है जैद फरी ब तखेप नो अङग्‍यालाई चरैःसिउ ज़्‍यावए उजूँनी है ङादाचिज़्‍या। गे गेसैंज़्या, नो अङग्‍या काता ज़ माःक। तोबोका तोबो परमेस्‍वरकिन छुत काता ज़ माले। 5 नाम नमल दै देवता यारादोज़्‍यावर, प्रभु यारादोज़्‍यावर बनै कुधु ज़ यालिदी ब, 6 गे गेपरमेस्‍वर ते तोबो वाज़ लिज़्‍या, नो गेबाबु परमेस्‍वर ज़। ताव भरी ब ओल ओराजैव ज़, गे ब ओल उजूँनी जैसिउर ज़। गेप्रभु ब तोबो वाज़ लिज़्‍या, नो येसु ख्रीस ज़। परमेस्‍वरए ओराजैव भरी नो गेप्रभुनी ज़ याजैक्‍यो। गे गेदैव अजम्‍बरी जुनी ब ओल गेप्रभुनी ज़। 7 खाली मिँ भरिए अङग्‍या काता ज़ माःक लिन्‍या चबनै माथ·रैतार। है जैद ख्वा ख्वाराए ङ़ादाङाव याचलननी अङग्‍यालाई साचो देवता याजैवए आःपै मामेंःधुर। है जैद अङग्‍यालाई चरैःसिउ ज़्‍याव याज़्‍युकिन ‘आव पाँ माचाव ज़’ थ·रैद याखत ल्‍योर याताव ङम्‍सिज़्यार। 8 नो ज़्‍याव गेज़्‍युदी ब गेमाज़्‍युदी ब परमेस्‍वरस खैव जैव मादोव, माखैव ब जैव मादोव।

9 हैदी ब ङा है ङादाचिज़्‍या, आव पाँरानी जोगोइसिद लिच्‍यो, म़ानी जे ‘जो गेज़्‍युदी ब ताए’ है जेलिज़्यावनी ‘आव चाव, आव माचाव’ लिन्‍या माछुतैधुज़्यावरालाई जेराबले·या। 10 निताव मिँए जे परमेस्‍वरए ओपाँत सैंन्‍या जैसिज़्‍यावराए अङग्‍यालाई याचरैःव ज़्‍यावर मन्‍दिरल जेज़्‍युज़्याव उरँःचिकिन, झन माज़्‍यान्‍या ओथ·रैवलाई फरी ब ज़्‍याद ओऱासो य़ेनलाई फरी ब दान्‍या ओछ्यास लिज़्या। 11 जे परमेस्‍वरए ओपाँत ‘गे ज़ सैंन्‍या गेलिज़्‍या’ है लिज़्‍यावराए ज़ चाव माचाव माछुतैधुज़्यावरालाई झन ज़ जेराबले·ज़्‍या। नो जेराबले·ज़्‍यावर मनी ख्रीसए उजिउ झाःद ओरायो जेभाइर ज़। 12 निताव जेभाइरालाई बले·द, मादान्‍या याथ·रैव य़ेनलाई फरी दाव जेरापरींवए ख्रीसए ओक्‍याँत ब पाप जेदोके। 13 है जैद ङाभाइलाई ज़्‍यावए ओबले·किन नोलाई ओबले·ज़्‍याव देखा बुरू ङा स्‍याकरी खर्क ज़ कैन्‍या ङामाले।