कोरिन्थीरालाई
पावलए उस॰कताव परींद ओरायो चिथी
आव चिथी कोरिन्थलाव मन्दलीए जूँनी पावलए ओसरो ज़। नो पो अखैया खन्दलाव बनै उमिन थासो सहर ओल्यो। नल प़ाइँनिकाव मिँर दुप्सिहुद यामन लागिउ य़ेन ज़ यादोज़्याव। परमेस्वरए उमिनतावराए मनी निताव माचाव य़ेनर दाद (१ कोरिन्थी ५:१–६:२०), झन या याल माखैद इ़सिउ ज़ लिज़्यार दी लिन्या पावलए ओथैज़्याव (१:११; ३:३)। है जैद नोर बलेस्र्या लिद ननी जोगोइन्याए जूँनी नोरालाई सिङार्द (४:१४-१७), मन्दली कितावनी चलैन्या लिद (११:२–१४:४०) परमेस्वरए उमिनत पाथ ओरापारैव सरैंःसिउ लिज़्या।
1
1 परमेस्वरए ओखतैनाव येसु ख्रीसए ओसाची ङा पावल स़ोनो ङास लिज़्याव गेभाइ सोस्थेनेसस गिन्ल्योनी, 2 जे कोरिन्थलाव परमेस्वरए ओमन्दलीलाई आव चिथी परींद गिन्याचिज़्या। जे प़ाइँङाव गेप्रभु येसु ख्रीसए उमिन हाइज़्यावरास जे ब येसु ख्रीसनिकाव छैंव तान्या खुल्सिउर जेलिज़्या। 3 परमेस्वर गेबाबु स़ोनो गेप्रभु येसु ख्रीसनी जेल्योदा नियुँ गराँद जेयुँ होलाँ जैद ओयाचिरक।
परमेस्वरलाई धन्याबाद
4 जे येसु ख्रीसनिकाव परमेस्वरए ओअसिकर जेदैवए ङा जेजूँनी परमेस्वरलाई एकम्न्या धन्याबाद चरैःव ज़ ङानैज़्या। 5 जे पाँल तादी ब, ग्यानल तादी ब ख्रीसनी प़ाइँनी ज़ बनिउर ताद जेले। 6 ननी ज़ जेलाई गेसथैचिउ ख्रीसए ओपाँर जे जेक्याँत थ॰रिके। 7 है जैद ज़ गेप्रभु येसु ख्रीस ओमाहुवा पै जेयुँ थू जैद कींद जेनैज़्याव भरिल, ओल ओय़ेन दान्यात प़ाइँ बरदानर जोरैद नैद्याचिउ, कातानी ब कम्ती जेमाले। 8 है जैद गेप्रभु येसु ख्रीस उहुन्या छ्याम पै ओल परमेस्वरए ज़ जेलाई थ॰रिउर जेखत माल्योर नैचिरिज़्याव। 9 निताव य़ेनल परमेस्वरलाई युँ हुबो ज़ लिज़्या। ओज़ा गेप्रभु येसु ख्रीसस सिप लिन्या खुल्द नैचिउ।
माखैन्या पाँर
10 अ ङानैं ङामेंर, गेप्रभु येसु ख्रीसए उमिननी ङाअर्थैचिज़्या, जे जेल सु ज़ माखैव ताताक, बुरू प़ाइँ तयुँ जैद खैद लिच्यो। 11 खाली आङ ते झन जे इ़सिउ ज़ जेलिज़्या दी लिन्या क्लोयए उझ़िमलावराए ल्योनी ङाथैके। 12 ङा है ङालिज़्याव आव ज़, ख्वाराए ‘गे पावलसकावर’, ख्वाराए ‘गे अपोल्लोससकावर’, ख्वाराए ‘गे पत्रुससकावर’, ख्वाराए ‘गे ख्रीससकावर’ है जेलिज़्या दी। 13 काता ख्रीस चिरा·सिउ उलिज़्याव रो? सैं ङा पावल क्रुसत तङ्गैसिद ङाजिउ झाःद ङायाचिउ रो? सैं ङा ङामिनत सछैंसिउर ब यालिज़्याव रो? 14 परमेस्वरलाई धन्याबाद लिज़्या, जे जेल्योङाव ङानिसछैंवनी क्रिस्पस स़ोनो गायसनी वाज़ लिज़्यानी। नो ऩेब्लोकिन छुतर ङामारासछैंवए, 15 ङा ङामिनत गेसछैंसिके लिन्या सुए ज़ है ल्यो दैन्या जेमाले। 16 ओहो, स्तिफनासए उझ़िमलावरालाई पाला ङारासछैंव ज़। नोकिन छुतर ते ङामारासछैंखेहो लिन्या मिताव ङाङम्सिज़्या। 17 ख्रीसए ङालाई मिँर सछैंन्याए जूँनी उपरींनाव माःक, चाव था सथैन्याए जूँनी उपरींनाव ची। नो पाँ ङारासथैक येसु ख्रीस क्रुसत उसिउ पाँए ओअर्थ ताम़ाक लिद बनै मोहोन्यालो जैद ङामापाँए, किताव उलिज़्याव हिताव ज़ ङापाँज़्या।
ख्रीस उसिउ ओलेखा ल्यो ज़
18 ख्रीस क्रुसत उसिउ पाँ नर्गलाव येमदा बाज़्यावरालाई ओलेखा माल्यो पाँ मिताव ज़ लिज़्या। खाली गे अजम्बरी जुनीदा बाज़्यावरालाई ते नो पाँत परमेस्वरए ओसक्ती लिज़्या। 19 काराव ल्यो ताकिन धर्मसास्त्रल इताव सर्सिउ लिज़्या,
“बनै सैंन्याराए यापाँ ओअर्थ माल्यो अऩाकलाव ज़ ङाजैरिज़्या।
ओगहक ल्यो मिँए ओगहक ब पल्तैद ङाएरिज़्या।” 1:19 यसै २९:१४
20 यागहक ल्योर खैकी? सास्त्रीर स़ोनो आव जुकलाव सैंन्यार काङ्ङ यालिज़्याव? ओल परमेस्वरए ज़ आव मानुवातावराए याबुद्धी अऩाकलाव ज़ जैद याएक्यो। 1:20 अयू १२:१७; यसै १९:१२; ३३:१८; ४४:२५ 21 परमेस्वरए ङ़ादाकिन ज़ अचम्बलाव ओगोइँनी आव मानुवाताव मिँरालाई या याबुद्धीनी यागहकनी ओललाई मासरेस्धुन्या याजैक्यो। बुरू गे गेरासथैज़्याव आव मानुवाताव मिँराए ओअर्थ माल्यो याथ·रैव पाँनी ज़ झन यायुँ हुप्ज़्यावरालाई परमेस्वरए अजम्बरी जुनी यान्या थ·रैक्यो। 22 यहूदीराए ते परमेस्वरए ओराज्यालाव सरेसर आव मानुवात यामारँःवा पै यायुँ ओमाहुप्ज़्याव। ग्रीकराए फरी बुद्धीलाव पाँ याखिम्ज़्याव। 23 गे ते ख्रीस क्रुसत उसिउ पाँर गेरासथैज़्या। नो पाँए यहूदीरालाई यायुँ केःद याएज़्याव, ग्रीकरालाई फरी ओअर्थ माल्यो ल़॰न्या मिताव पाँ ज़ लिज़्या। 24 परमेस्वरए ओराछाँतिउरालाई ते, यहूदीर तादी ब, ग्रीकर तादी ब, ख्रीसए ओक्याँत परमेस्वरए ओसक्ती ब लिज़्या, उबुद्धी ब लिज़्या। 25 काराव ल्यो ताकिन परमेस्वरए ओय़ेन मुर्ख मिताव ओरैंःदी ब मिँराए यागहकनी यादोज़्याव य़ेनकिन ओलेखा ल्यो लिज़्या। नत ओसक्ती माल्यो हार्या मिताव ओजैसिदी ब मिँराए यार्साकिन परमेस्वरए ओसक्ती नत ज़ रैंःके।
परमेस्वरए ज़िम्ज़ारालाई ओराछाँतिउ
26 जे ब जेसैंज़्या ङानैं ङामेंर, जे परमेस्वरए उखुल्चिउ बेलाक मिँराए लेखानी जेबुद्धी ल्योर कोसै जेमाले, घेप्पा मिँर ब कोसै जेमाले, घेप्पा जातलावर ब कोसै जेमाले। 27 ननी ज़ रैंःज़्या, परमेस्वरए आव मानुवाताव बनै सैंन्याराए यागहक अऩाकलाव जैद्यान्याए जूँनी जे मिताव कान्ल ज़ मागनिसिउरालाई रूजिचिक्यो। घेप्पा मिन दैवरालाई लाज मोर्नो जैन्याए जूँनी जे मिताव ज़िम्ज़ारालाई छाँतिचिक्यो। 28 आव मानुवाताव यासघ्योःव पाँर अऩाकलाव जैन्याए जूँनी परमेस्वरए झन ज़िम्ज़ा, काम मालागिउ स़ोनो कान्ल ज़ मागनिसिउरालाई यारूजिक्यो। 29 है जैद परमेस्वरए ओङ़ाक यानी सु ज़ सघ्योःसिधुन्या मालेर। 30 जे ब परमेस्वरनी वाज़ येसु ख्रीसस सिप ताद जेले। नोए ज़ परमेस्वरलाई सरेस्न्या बुद्धी ब यासिक्यो, ओल उयुँलाव मिताव छैंवर ब जैसिक्यो, माचावनी रेंःद उमींर ब जैसिक्यो। 31 है जैद धर्मसास्त्रल सर्सिउ लिज़्या,
“जो सघ्योःसिउ पैंज़्याव,
प्रभुनी वाज़ ओसघ्योःसिक।” 1:31 यर ९:२४