18
ዓይኑሞ ሱኡጋሢ ዓይሣ ጎይፆና ዓይናዺንታ ፆኦሲ ዓይላሢ ዳውቴ ዓይኑሞ፤ ፆኦሲ ሳኣዖኦሌና ዒዛኮ ሞርኮናይዳፓ ዒዛ ቶሊሴያና ፆኦሲ ቦንቾም ዓይናዺንቴያኬ።
ዳውቴ ባሺሢ ዴንቃዖ ዓይናዼ ዓይኑሞ
1 ናንጊና ናንጋ ጎዳሢዮ!
ታኣም ዎልቄ ዒንጋሢ ኔናታሢሮ ታ ኔና ናሽካኔ።
2 ናንጊና ናንጋ ጎዳ ታኣኮ ላላሢ
ታኣኮ ዹካሢንታ ታና ዓውሳሢያኬ፤
ታ ፆኦዛሢ ታኣኮ ዓኣሺንቶ ካያሢኬ፤
ዒዚ ታኣኮ ጊቲማሢና ጉራናሢኬ።
3 ጋላታ ኮይሳ ናንጊና ናንጋ ጎዳ ታኣኒ ሺኢቃኔ፤
ዒዚ ታ ሞርኮይዳፓ ታና ዓውሳኔ።
4 ሃይቢ ካራ ባይዚ ታና ሜታሴኔ፤
ባይሲንታ ዲጲያ ታና ዱኡኬኔ።
5 ዱኡፒ ሱሲ ታና ማሬኔ፤
ሃይቢ ፒሮጉዲ ታኣም ፒሪንቴኔ።
6 ታኣኒ ሜታዼ ዎዶና ናንጊና ናንጋ ጎዳ ዔኤሌኔ፤
ታና ዒ ማኣዳንዳጉዲ ታ ፆኦሲ ታኣኒ ሺኢቄኔ፤
ዒዚያ ፔኤኮ ጌኤዦ ማኣራ ዓኣዖ ዑኡዞ ታኣሲ ዋይዜኔ፤
ታኣኮ ዒላቶዋ ዒዚ ዒና ዔኬኔ።
7 ሳዓ ዚምባሪ ጎጋይቄኔ፤
ዹኮኮዋ ፃጳ ዓጊፂፆና ኮሬኔ፤
ናንጊና ናንጋ ጎዳ ዻጋዼሢሮ ዔያታ ዓጊፄኔ።
8 ዒዛኮ ሲኢዻፓ ዻጎ ጩባ ኬስኬኔ፤
ዻንጋፓ ዒዛኮ ሙሙዓ ታሚ ሎስቶና
ሚሚቻ ቄንሢያኣ ኬስኬኔ።
9 ጫሪንጮ ዳርዚ ሊካ ዒ ኬዴኔ፤
ዒዛኮ ቶኮ ዴማ ዲም ጌዔ ሻኣሬ ዓኣኔ።
10 ዒዚ ኪሩቤኤሎ ዑፃ ዴይ ባራኔኔ፤
ዢባሮ ጋኣዞና ባራኒ ሌካ ዒ ኬስኬኔ።
11 ፔና ዒዚ ዹሞና ዓኣቼኔ፤
ካርሤ ሻኣራኣ ዒዛ ካንቂ ዓኣኔ።
12 ዒዛኮ ዓኣ ፖዖፓ ዔቄያና ሻቺንታ ታሚ ፖዒንታ
ዲም ጌዔ ሻኣሮ ባኣኪና ሶፒ ኬስኬኔ።
13 ናንጊና ናንጋ ጎዳ ጫሪንጫፓ ጉጉንሤኔ፤
ዼኤፖ ፆኦዛሢ ዑኡዞ ፔኤሲ ማኣሚሴኔ።
14 ዒዚ ሂኢዦ ፔኤሲና ዱኪ ሞርኮ ላኣሊሼኔ፤
ጉጉንፆ ሚርጊሺ ካራ ባይዚ ዔያቶ ዳውሴኔ።
15 ናንጊና ናንጋ ጎዳሢዮ!
ኔኤኒ ኔኤኮ ሞርኮ ጎሬ ዎዶና
ዻጎ ዑኡዞ ኔኤኮ ኔ ዋይዚሴ ዎዶና
ዼኤፖ ባዞኮ ዴማ ፔጋዺ ጴዼኔ፤
ሳዖኮዋ ማዢንቶ ዓይፆ ካራ ፔጋ ኬስኬኔ።
16 ናንጊና ናንጋ ጎዳ ሎኦፓ ኩጮ ዳኪ ታና ዓርቄኔ፤
ሚርጌና ዔቴ ማዔ ዋኣፆፓ ጎቺ ታና ዒ ኬሴኔ።
17 ታጊዳፓ ዎልቆና ባሼ ማዔ ታ ሞርኮፓ
ታና ዒዚ ዓውሴኔ፤
ታና ዒፃ ዓሶ ቢያሢ ኩጫፓ
ዒዚ ታና ዓይሴኔ።
18 ዔያታ ታኣኒ ሜታዼ ዎዶና ታኣኮ ሞርኬ ማዒ ዔቄኔ፤
ናንጊና ናንጋ ጎዳ ጋዓንቴ ታና ካፔኔ።
19 ዒዚ ታና ዳልጊ ቤሲ ኬሴኔ፤
ዒዛ ታኣኒ ዎዛሴሢሮ ዒ ታና ዓውሴኔ።
20 ናንጊና ናንጋ ጎዳ ታኣም ታ ፂሉሞጉዲ ጪጋንዳኔ፤
ታ ጌኤሹሞጉዲያኣ ማሂ ታኣም ዒንጋንዳኔ።
21 ናንጊና ናንጋ ጎዳኮ ጎይፆ ታ ሃንቴኔ፤
ፑርታ ባኣዚ ማዻኒ
ታ ዓኣፖ ካሮ ታ ፆኦዛሢ ቤርታፓ ሺርሺባኣሴ።
22 ዒዛኮ ዎጎ ቢያ ታኣኒ ማዺ ኩንሣኔ፤
ዳምቦዋ ታ ዒዛኮ ቦንቺፆ ሃሺባኣሴ።
23 ዒዚ ታና ዛጌ ጎይፆ ታኣኒ ፂሎኬ፤
ጎሜይዳፓ ታና ታኣኒ ካፔኔ።
24 ናንጊና ናንጋ ጎዳ ታኣኮ ፂሉሞጉዴያ
ኩጫኣ ታኣኮ ጌኤሺ ማዔሢጉዴያ
ታኣም ኮይሳ ባኮ ዒዚ ጪጌኔ።
25 ናንጊና ናንጋ ጎዳሢዮ! ኔኤም ጉሙርቂንታዞም
ኔኤኒያኣ ጉሙርቂንታያኬ፤
ጎኔ ዓሲ ማዔዞንሢም ኔኤኒያኣ ጎኔ ማዓያኬ።
26 ጌኤዦ ዓሶም ኔኤኒ ጌኤሺኬ፤
ዎቦ ዓሶም ጋዓንቴ ዔያቶም ኮይሳሢ ኔ ዒንጋኔ።
27 ዒኖ ሼሌዔ ዓሶ ኔኤኒ ዓውሳኔ፤
ዖቶርቃዞንሢ ጋዓንቴ ኔኤኒ ዻውሲሳኔ።
28 ናንጊና ናንጋ ጎዳሢዮ! ታኣኮ ኔኤኒ ፖዓሢኬ፤
ታ ፆኦዛሢዮ! ዹሞ ታኣኮ ኔ ፖዒሣኔ።
29 ኔ ዎልቆና ዖሎ ዖላ ዓሶ ባሺ ታኣኒ ሄርቄኔ፤
ኔ ዎልቆና ኬኤሎ ዲሮና ጱሊ ታ ጌሌኔ።
30 ፆኦሲ ጎይፃ ሃይማ ፓጬኔ ጌይሳ ባኣዚ ባኣያ ፒዜኬ!
ቃኣላኣ ዒዛሲ ጌኤሺኬ!
ዒዛና ካናዻ ዓሶም ዒዚ ጊቲማሢኬ።
31 ናንጊና ናንጋ ጎዳፓ ዓታዛ ዖናዳይ ፆኦሲ?
ዒዛይዳፓ ዓታዛ ላሌ ማዓሢ ዖናዳይ?
32 ታኣም ዶዱሞ ዒንጋሢንታ
ጎይፆዋ ታኣኮ ፒዚሳሢ ፆኦሲኬ።
33 ዒዚ ቶኮ ታኣኮ ዎሾ ቶኪጉዲ ዶዲሻኔ፤
ጌሜሮይዳ ሂርጋ ባኣያ ታና ዒዚ ዔቂሳኔ። ዒምባ. 3፡19።
34 ኩጮ ታኣኮ ዒ ዖልዚ ዖሎንዶ ጎይሢ ዔርዛኔ፤
ኩጫ ታኣኮ ሞኦኖ ዓንጎ ቆኦዞ ጎቻንዳጉዲ ዒ ዶዲሻኔ።
35 ኔኤኮ ባሺፆ ጊቲሞ ኔኤኒ ታኣም ዒንጌኔ፤
ኔኤኮ ሚዛቆ ኩጫኣ ታና ካፓኔ፤
ኔኤኒ ታና ማኣዳኒ ሙኪ ዼኤፒ ማዾ ማዼኔ።
36 ታ ሃንታንዳ ጎይፆ ኔኤኒ ታኣም ዳልጊሼኔ፤
ቶካኣ ታኣኮ ዹቂንቲባኣሴ።
37 ሞርኮ ታኣኮ ታኣኒ ዳኪ ዓርቄኔ፤
ጋፒሲ ባይዙዋዖ ጊንሢም ታኣኒ ማዒባኣሴ።
38 ላሚ ጊንሣ ዔያታ ዔቁዋጉዲ ታኣኒ ዔያቶ ጋኣጬኔ፤
ዔያታ ታኣኮ ቶኮ ዴማኣ ሎኦሜኔ።
39 ዖላንዳጉዲ ዎልቄ ኔኤኒ ታኣም ዒንጌኔ፤
ታ ሞርኮ ታ ቶኮ ዴማ ኔኤኒ ጉምዓሤኔ።
40 ታ ሞርካ ጊንሢም ባሺንቲ ጳሽካንዳጉዲ ኔ ማሄኔ፤
ታኣኒያ ታና ዒፃዞንሢ ጋፒሲ ባይዜኔ።
41 ዔያቶ ማኣዳ ዓሲ ኮይ ዔያታ ዒላቴኔ፤
ጋዓንቴ ዔያታ ዴንቂባኣሴ፤
ናንጊና ናንጋ ጎዳ ባንሢ ዔያታ ዒላቴኔ፤
ዒዚ ጋዓንቴ ዔያቶም ዋይዚባኣሴ።
42 ዢባሬ ፒፂ ዔኪ ዓኣዻ ሲላሊ ማዓንዳያ ሄላንዳኣና
ታኣኒ ዔያቶ ጋኣጬኔ፤
ጎይሢዳ ዓኣ ዾቃሌጉዲ ታ ዔያቶ ሄርቄኔ።
43 ዋይዞ ዒፃ ዴሮይዳፓ ኔኤኒ ታና ዓውሴኔ፤
ዴሮ ዑፃ ኔ ታና ዶኦሬኔ፤
ታኣኒ ዔሩዋ ዴሬ ታ ቢታንቶ ዴማ ዎርቃኔ።
44 ፃንጎ ማዔ ዓሳ ታኣም ዚጋኔ፤
ታ ማዻ ባኮ ዋዋይዛዖ ታኣም ዔያታ ዓይሢንታኔ።
45 ዒጊቹሞና ካራ ዔያታ ባይዛኔ፤
ፔኤኮ ዋርዲዮ ቤዛፓ ጎጋይቂ ጎጋይቂ ኬስኪ ሙካኔ።
46 ናንጊና ናንጋ ጎዳ ባይቁዋያኬ!
ታ ፆኦዛሢ፥ ታኣኮ ላላሢ ቦንቺንቶንጎ!
ታና ዓውሴ ዎልቆ ፆኦዛሢ ዼግ ዼግ ጎዖንጎ።
47 ዒዚ ታ ሞርኮ ኮሜ ኮፃኔ፤
ዴሮዋ ታ ዴማ ማሂ ታኣም ዒ ዎይሣኔ።
48 ዒዚ ታኣኮ ሞርካፓ ታና ዓውሳኔ፤
ታ ሞርኮኮ ዑፃ ማሂ ኔኤኒ ታና ዼጊሳኔ፤
ጎርቲኖ ማዻ ዓሶይዳፓ ኔ ታና ዓውሳኔ።
49 ናንጊና ናንጋ ጎዳሢዮ! ዬያሮ ዴሮ ባኣካ
ታኣኒ ኔና ጋላታኔ፥ ሱንፆዋ ታ ኔኤኮ ዓይኑሞና ሄርሻኔ። ሮሜ 15፡9።
50 ዒዚ ካኣታሤ ካኣቲም ዼኤፒ ባሺሢ ዒንጋንዳኔ፤
ዒ ፔኤሮ ዶኦሜ ካኣቲም ናንጊና ናሹሞ ፔኤሲ ዒ ቤኤዛንዳኔ፤
ዳውቴና ዜርፆናም ናንጊና ዬያ ዒ ማዻንዳኔ።