56
«ዶኦሌላ ሃኬ ዓኣ ሻኣቦይዳ» ጌይንቴ ዓይኑሞና ዓይኑሞ ሱኡጋሢ ዓይሣ ጎይፆ ካላሊንቴ ዳውቴ ካላሎ (ፒሊስፄኤሜ ዓሳ ጌኤቴይዳ ዳውቴ ዓርቄያና ዒ ካላሌያኬ።)
ፆኦሲ ጉሙርቂ ሺኢቂንታ ሺኢጲሢ
1 ፆኦሲዮ! ዓሳ ታና ዋኣዪሳሢና
ሞርካኣ ታኣኮ ታና ቢያ ዎዴ ዳውሳሢናሮ
ታኣም ሚጪንቴ።
2 ዖቶርሙሞና ታና ዖላ ዓሳ ሚርጌኬ፤
ሞርካ ታኣኮ ሮኦሮ ጉቤ ታ ዑፃ ዔቄኔ።
3 ታና ዒጊቻ ዎዶና
ታኣኮ ጉሙርቂፆ ታ ኔጊዳ ማሃኔ።
4 ታኣኒ ፆኦሲ ጉሙርቃሢሮ ዒጊጫዓ፤
ታኣም ዒንጊንቴ ሃጊ ማዓ ዎዞሮ ዒዛ ታ ጋላታኔ፤
ታኣኒ ዒዛ ጉሙርቃሢሮ
ዔዞ ዓሲ ታና ዎዳንዳይ?
5 ሞርካ ታኣኮ ሮኦሮ ጉቤ
ታ ዻቢንቴቴ ዓርቃኒ ኮዒ ሃንታኔ፤
ቢያ ዎዴ ታና ባይዛኒ ዎላ ዞርታኔ።
6 ቡኪንቲ ታና ዔያታ ካታኔ፤
ሄፆ ቢያ ዔያታ ታኣኮ ኮጲሳኔ፤
ሼምፓሢ ታኣኮ ባይዛኒ ኮዓኔ።
7 ፆኦሲዮ! ዎይቴቴያ ዔያታ ቶሊ ዓቱዋጉዲ ማዼ!
ያቶ ዴሮ ኔኤኮ ጎሪንቶና ዻውሲሴ።
8 ቃያሢ ታኣኮ ፃኣፒ ዓርቄ፤
ዓቢፆዋ ኔ ዶሎዞይዳ ቃዼ፤
ቢያሢ ፃኣፒ ዓርቆ ቤዛ ዓርቂንቴያቱዋዓዳ?
9 ኔ ባንሢ ታኣኒ ዔኤሊንታ ኬሎና
ሞርካ ታኣኮ ጊንሢም ማዓኔ፤
ዬያና ፆኦሲ ታኣኮ ኮራ ማዔሢ ታ ዔራኔ።
10 ዬይ ታኣና ዎላ ማዔ ፆኦዛሢ
ቃኣሎ ታ ዒዛኮ ጋላታሢና ቦንቻ ፆኦዛሢኬ።
11 ታኣኒ ዒዛ ጉሙርቃሢሮ ዒጊጫዓ፤
ዓሲ ታና ዓይጎ ዎዳንዳይ?
12 ፆኦሲዮ!
ኔኤም ታኣኒ ናኣቤ ናኣቢ ዓኣኔ፤
ዬይያ ጋላታ ታ ኔኤም ሺኢሻያኬ። 1ሳሙ. 21፡13-15።
13 ሃይቢዳፓ ኔኤኒ ታና ዓውሴኔ፤
ዹቂንቲ ታኣኒ ሎኦሙዋጉዲ ኔ ታና ማኣዴኔ፤
ዬያሮ ሼምፖና ዓኣ ዓሶ ዑፃ ፖዓ ፖዖይዳ
ፆኦሲ ቤርታ ታኣኒ ሃንታኔ።