39
ዓይኑሞ ሱኡጋሢ ዓይሣ ጎይፆና ዔዶታሜ ዛሎ ዓይናዺንቴ ዳውቴ ዓይኑሞ
ዓሲ ሜታ ሄላዛ ዔልቃሚጉዲ ሺኢቃ ሺኢጲሢ
1 ታኣኒ፦ «ታ ማዾንታ ዒንዲርዞዋ ጎሜፓ ካፓንዳኔ፤
ፑርቶ ማዻ ዓሳ ታ ኮራ ዓኣ ዎዶና ዻንጎ ታኣኮ ታ ቢፃልቃንዳኔ»
ጌዒ ታ ጫኣቄኔ።
2 ዻንጋ ባይቄ ዓሲጉዲ ዚቲ ታ ጌዔኔ፤
ኮሺ ባኣዚ ጌስታኒታዖ ዻንጎ ታኣሲ ታ ዓርቄኔ፤
ዬይ ያዺ ማዔታቴያ ሜታሢ ታኣኮ ሃቺም ሚርጌኔ።
3 ዒና ታኣኮ ጋራ ዖይዼኔ፤
ማሊፆ ታ ማሌሢሮ ዬይ ታማ ዔኤቴኔ፤
ዬካፓ ዻንጎ ቡሊ ሂዚ ጌይ ታ ኬኤዜኔ፦
4 «ናንጊና ናንጋ ጎዳሢዮ!
ናንጎኮ ታኣኮ ጋፒንፆ ሌዖኮዋ ፓይዶ ታና ዔርዜ፤
ታኣኒ ዓኣዻያና ባይቃያ ማዔሢ ታ ዔሮም።»
5 «ሃይሾ ታኣኒ ናንጋንዳ ዎዶ ኬኤላና ዋርቂ ኔ ዛጊ ሃሼኔ፤
ታኣኒ ናንጋ ሌዓ ኔ ቤርታ ዔኤቢ ማዒ ፓይዲንቱዋሴ፤
ጎኔና ዓሲኮ ናንጊ ቢያ ዓዳ ሱኡሌጉዴያኬ።
6 ዓሲ ናንጊ ሺቢዳፓ ዱማቱዋሴ፤
ጉሪ ላቢንታኔ፥ ቆሎዋ ቡኩሳኔ፤
ጋዓንቴ ዬይ ቆላ ዖኦም ማዓንዳቴያ ዔሩዋሴ።»
7 «ናንጊና ናንጋ ጎዳሢዮ!
ሂዴቴ ታኣኮ ሃጊ ማዓ ዎዛሢ ዖናዳይ?
ናንጊና ናንጋ ጎዳቱዋዓዳ?
8 ታኣኮ ጎማፓ ቢያ ታና ዓውሴ፤
ዔቦ ዔሩዋ ዓሶም ሚኢቺ ታና ማሂፖ።
9 ሃያ ቢያ ማዼሢ ኔናታሢሮ
ታኣኒ ዚቲዮ ጋዓንዳኔ፤
ዻንጎዋ ታኣኮ ታ ቡላዓኬ።
10 ቃሶ ኔኤኮ ታ ዑፃፓ ዔቂሴ፤
ኩጫ ኔኤኮ ታና ጳርቄሢሮ ሚርጌና ታ ላቤኔ።
11 ዓሶ ዔያቶኮ ጎሞ ዛሎሮ ሜታሳኒ፥ ኔ ዔያቶ ጎራኔ፤
ቆሎዋ ኔ ዔያቶኮ ቢሎና ባይዛኔ፤
ጎኔና ዓሲኮ ናንጊ ሱኡሌይዳፓ ባሼቱዋሴ።»
12 «ናንጊና ናንጋ ጎዳሢዮ!
ሺኢጲፆ ታኣኮ ዋይዜ፥ ዒላቶዋ ዔኬ፤
ታ ዬኤካኣና ዑኬና ታና ማኣዴ፤
ዻካ ዎዴም ታ ኔኤኮ ሾኦቺኬ፤
ታኣኒ ታኣኮ ቤርታኣ ዓዶንሢጉዲ ቤሲባኣያ ማዒ ናንጌያኬ።
13 ሃይቂ ታኣኒ ማዑዋ ቤዞ ዓኣዻንዳሢኮ ቤርታ
ሃዳራ ታ ዎዛዻንዳጉዲ ዻካ ታኣም ጌዔቴራ።»