33
ጋላታ ዓይኑሞ
1 ዒንሢ ፂሎ ዓሳ! ናንጊና ናንጋ ጎዳ ማዼ ባኮሮ ዎዛዹዋቴ፤
ፒዜዞንሢ ዒዛ ጋላታንዳያ ኮይሳኔ።
2 ጎኦላ ዋርቂ ናንጊና ናንጋ ጎዳ ጋላቱዋቴ፤
ታጶ ሻዦ ዴንሢ ዋርቆ ጎኦሎናኣ ዒዛም ዓይናዹዋቴ።
3 ዓኪ ዓይኑሞ ዒዛም ዓይናዹዋቴ!
ጎኦሎ ሚዛጲሲ ዴንሢ ዋርቁዋቴ፤
ዎዛናኣ ዒላሹዋቴ።
4 ናንጊና ናንጋ ጎዳኮ ቃኣላ ጎኔ ቃኣላኬ፤
ማዻኣ ቢያ ዒዛኮ ጉሙርቂንታያኬ።
5 ናንጊና ናንጋ ጎዳ ፂሉሞና ፒዜ ዎጊሢና ናሽካኔ፤
ዒዛኮ ናንጊና ናንጋ ናሹማ ሳዖ ኩማኔ።
6 ናንጊና ናንጋ ጎዳሢ ቃኣሎና
ጫሪንጫ ማዢንቴኔ፤
ዒዛኮ ዑኡዞና ዓቦንታ ዓጊኖንታ
ዦኦጋሢያ ማዢንቴኔ።
7 ባዞ ዋኣፆ ቢያ ዒ ፔቴ ቤስካ ቡኩሲ ዴይሤኔ፤
ዼኤፖ ዔቶ ባዞ ዋኣፆማኣ
ዴዓንዳ ቤሲ ዒዚ ጊኢጊሼኔ።
8 ሳዖይዳ ናንጋ ዓሳ ቢያ ናንጊና ናንጋ ጎዳ ዒጊጩዋቴ፤
ዓጮይዳ ዓኣ ሜሌ ዴራ ቢያ ዒዛ ቦንቹዋቴ።
9 ዒዚ «ማዖም» ጋጋዓዛ ሳዓ ማዢንቴኔ፤
ዒዛኮ ዓይሢፆና ቢያ ባካ ዶዲ ዔቄኔ።
10 ናንጊና ናንጋ ጎዳ
ዴሮኮ ጌኖ ማሊፆ ቱኡዞ ሁርዲሳኔ፤
ዔያቶኮ ማሊፆዋ ፓሡዋያ ማሃኔ።
11 ናንጊና ናንጋ ጎዳ ቱኬ ቱኡዛ ናንጊና ዶዲ ናንጋያኬ፤
ዒዛኮ ማሊፃኣ ሾይንቲፓ ሜሌ ሾይንቲ ሄላያኬ።
12 ናንጊና ናንጋ ጎዳ ማዔ ፆኦዛሢ ዓሲ ማዔያና
ዒዚ ፔ ዓሲ ማሂ ዶኦሬ ዴሬ ዓንጂንቴያኬ!
13 ናንጊና ናንጋ ጎዳ ጫሪንጫፓ ሊካ ዛጋኔ፤
ዓሲ ዜርሢ ቢያ ዒ ዴዴንቃኔ።
14 ዒዚ ፔኤኮ ካኣቱሞ ዖይታ ዴዒ
ሳዖይዳ ዓኣ ዓሶ ቢያ ዛጋኔ።
15 ዒዚ ቢያሢኮ ዒኖ ማዤሢኬ፤
ዔያታ ማዻ ባኮዋ ቢያ ዛጋኔ።
16 ካኣታ ፔ ዖሎ ዓሶ ሚርጉሞና ዖሊ ባሹዋሴ፤
ዖሎና ዔርቴሢ ፔኤኮ ዼኤፖ ዎልቆና ሃይባፓ ቶሉዋሴ።
17 ፓራሢና ዖሊ ባሻንዳኔ ጌዒ ዎዛ ጌሥሢ ጉሪኬ፤
ዔያታ ዬያ ዎልቆና ዖናኣ ዓውሳኒ ዳንዳዑዋሴ።
18 ናንጊና ናንጋ ጎዳ ዒዛ ዒጊጫዞንሢና
ዒዛኮ ናንጊና ናንጋ ናሹሞ ሃጋኣ ዎዛ ማሃዞንሢ ዛጋኔ።
19 ሃይቦይዳፓ ዒዚ ዔያቶ ዬያና ዓውሳኔ፤
ናዮ ዎዶናኣ ሼምፔና ዒዚ ዔያቶ ዓይሳኔ።
20 ሼምፓሢ ኑኡኮ
ናንጊና ናንጋ ጎዳ ሃጊ ማዓ ዎዛ ማሂ ካፓኔ፤
ኑና ማኣዳሢና ኑኡኮ ጊቲማሢያኣ ዒዛኬ።
21 ዒዛኮ ዱማዼ ሱንፆ ኑ ጉሙርቃሢሮ
ዒዚ ኑና ዎዛሳኔ።
22 ናንጊና ናንጋ ጎዳሢዮ!
ኑኡኮ ሃጊ ማዓ ዎዞ ኔና ኑ ማሄ ጎይፆና
ኔኤኮ ጋፑዋ ናሹማ ኑኡም ማዖንጎ።