ቶኦቻያ ጋዓንቴ ጎሪ ዞራ ዞሮ ዋይዙዋሴ።

ጌሻ ዓሶ ሱኡካ ጋዓንቴ ጌኔ ማዾ ማዺ ኩንሣኒኬ።

ማሉዋዖ ጌስታሢ ጋዓንቴ ባይቃኔ።

ያዺ ማዔቴያ ዒዚ ዴንቁዋሴ፤

ዶዲ ማዻ ዓሲ ጋዓንቴ ኮዔ ባኮ ቢያ ዴንቃኔ።

ፑርቶ ዓሶኮ ጌኤዛ ጋዓንቴ ቦርሲሳያና ዻውሲሳያናኬ።

ጎሞ ዓሶ ጋዓንቴ ዔያቶኮ ጎማ ባይዛኔ።

ዖርጎቺ ዓሲ ማዒ ጴዻኒ ኮዓኔ፤

ሃንጎ ዓሳ ሃሣ ሚርጌ ቆሎ ዓኣንቴ

ፔቴታዖ ቆሎባኣ ዓሲ ማሊ ናንጋኔ።

ማንቆ ዓሲ ጋዓንቴ ዔውታንዳ ቆሎ ዒዛኮ ባኣሢሮ ማሊ ሜታዹዋሴ።

ጎሞ ዓሶኮ ፖዓ ጋዓንቴ ሃሃይቃኔ።

ዔራቶ ጋዓንቴ ዞሮ ዋይዛ ዓሲ ኮይላ ጴዻኔ።

ዶዲ ማዼም ጴዼ ቆሎ ጋዓንቴ ሚርጊ ሚርጊ ዓኣዻኔ።

ዴንቃኒ ማሎና ባኣዚ ኩማዛ ጋዓንቴ ዎዎዛሳኔ።

ዓይሥሢ ቦንቻሢ ጋዓንቴ ዬያ ዛሎ ዒንጎ ባኮ ዴንቃኔ።

ኔኤኮ ሼምፓሢ ሜቶይዳ ጌሌያታቴያ

ኔኤኒ ቶሊ ኬስካንዳጉዲ ኔና ማኣዳያኬ።

ጉሙርቂንቱዋያ ማዒሢ ባይሲንታይዳ ጌልዛኔ።

ማሊ ጶቂሥሢ ፓጬ ዓሳ ጋዓንቴ ዔኤቢ ዔሩዋያ ማዒፆ ፔጋሲ ዔርዛኔ።

ጉሙርቂንታያ ማዔ ኪኢታ ዓሲ ኮሹሞ ዴንቂሳኔ።

ጎሪ ዞሮ ዞሮ ዔካ ዓሲ ጋዓንቴ ቦንቺንታኔ።

ማሊ ጶቂሥሢ ፓጬ ዓሳ ጋዓንቴ ፑርታ ባኣዚፓ ሃካኒ ኮዑዋሴ።

ማሊ ጶቂሥሢ ፓጬ ዓሲና ላጋታ ዓሲ ጋዓንቴ ሜሜታዻኔ።

ኮዦ ዓሳ ጋዓንቴ ፔኤኮ ኮዦ ማዾ ዛሎሮ ዒንጎ ባኮ ዔካኔ።

ጎሞ ዓሶ ቆሎ ጋዓንቴ ፒዜ ዓሳ ዻካላኔ።

ካፃኒ ዳንዳዓንዳያ ናንዳኔ፤

ጋዓንቴ ፒዜ ዎጌ ባይቄያ ማዓዛ ዬይ ባካ ዔውቲ ባባይቃኔ።

ናዖ ፔኤኮ ናሽካሢ ጋዓንቴ ጳርቂ ዲቻኔ።

ጎሞ ዓሳ ጋዓንቴ ቢያ ዎዴ ናናይዺንታኔ።