37
1 «ዢኢፖ ዒሮ ዎልቆና ዒና ታኣኮ ዲቃቴኔ፤
ዒጊቹሞናኣ ጎጋይቄኔ።
2 ዒዛኮ ዻንጋፓ ኬስካ ዑኡዞ ዋይዙዋቴ፤
ጉጉንፆጉዲ ጉጉንሣ ቃኣሎ ዒዛሲ ዋይዙዋቴ።
3 ዜኤሊንፆ ጫሪንጮ ዴሞ ቢያ ዳካኔ፤
ሳዖኮ ጋፖ ሄላንዳኣና ዳኪ ሄሊሳኔ።
4 ዬካፓ ፔኤኮ ዎልቆ ዑኡዞ ዒ ጉኡሚሳኔ፤
ዒጊቻ ዑኡዞዋ ጉጉንሢጉዲ ማሂ ዋይዚሳኔ፤
ዜኤሊንፃ ዒዛኮ ላሚ ላሚ ዜኤሊንሣኔ።
ዲቃሣያ ማዔ ዑኡዞና ዒ ጉጉንሣኔ፤
ዑኡዞ ዒ ዋይዚሳ ዎዶና ዜኤሊንፆ ዒዚ ላኣጉዋሴ።
5 ፆኦሲ ዲቃሢ ሄርሺሳያ ማዔ ዑኡዞና ጉጉንሣኔ፤
ኑ ዔራኒ ዳንዳዑዋ ዼኤፒ ዼኤፒ ባኣዚ ዒ ማዻኔ።
6 ሻቺ ሳዖይዳ ዒ ኬይሳኔ፤
ዼኤፒ ዒርዚያኣ ዋርቃንዳጉዲ ዓይሣኔ።
7 ዒ ማዤ ዓሳ ዒዛ ማዾ ዔራንዳጉዲ
ዓሲ ቢያ ፔ ማዾ ሃሻንዳጉዲ ዒ ማሃኔ።
8 ዒማና ካዮ ቦዓ
ዓኣሺንቲ ፔኤኮ ዓኣሺንቶ ቤዞ ጌላኔ፤
ዔያታ ፔኤኮ ዔታኣ ዔታ ዓኣሺንታኔ።
9 ዼኤፒ ዢባሬ ዾኦሎ ዛላፓ ዔቃኔ፤
ሺሜ ዢባሬያ ኬዶ ዛላፓ ሙካኔ።
10 ፆኦሲ ዑኡዛ ዋኣፆ ሺሚሻኔ፤
ሻቺ ማሂያኣ ላኣማኔ።
11 ሻኣራ ዋኣሢ ዓርቃንዳጉዲ ዒ ማሃኔ፤
ዬያ ባኣካ ዜኤሊንሢያ ዜኤሊንሢሳኔ።
12 ናንጊና ናንጋ ጎዳ ዓይሤም ሻኣራ ዓጮ ቢያ ሺራኔ፤
ዒ ዓይሣ ባኮዋ ማዺ ኩንሣኒ ዔያታ ሃንታኔ።
13 ፆኦሲ ዒርዚ ዋርቂሻሢ፦
ሳዖ ሎጪሳኒ
ዓሶ ሜታሳኒ
ሃንጎ ፔ ናሹሞ ቤኤዛኒኬ።»
14 «ዔዞ ዒዮቤ! ሂንዳ ሊኢጊ ዋይዜ፤
ፆኦሲ ማዻ ዲቃሢ ሄርሺሳ ማዾ
ዒና ዔኪ ጶቂሤ።
15 ፆኦሲ ሻኣሮ ዎማይዲ ፓይዲ ዛጋቴያ
ዜኤሊንፆዋ ዎማይዲ ዜኤሊንሢሳቴያ ኔ ዔራ?
16 ሻኣሮ ሌካ ዢባሮ ዑፃ ዒ ማሃሢና
ቢያ ባኮ ዔራ ፆኦሲኮ ዲቃሢ ሄርሺሳ ማዾ ኔ ዔራ?
17 ጫሪንጫ ሞኦና ዓንጊጉዲ ዶዴ ዎዶና
ኔኤኒ ዓሲ ናንጉዋ ዳውሎ ዢባሮ ዖይዾና ዓልቃንዳኔ።
18 ፆኦሲ ጫሪንጮ ዓልቄ ሌማሌኤሼጉዲ ቡሊ ዼጊዲ ሂኢሤቴ
ኔ ዒዛኮ ኮራ ማዒ ማኣዳኒ ዳንዳዓ?
19 ኑኡኮ ዒና ዹሚ ማዔም
ኑኡኮ ሜቶ ኑ ሺኢሻኒ ዳንዳዑዋኣሢሮ
ፆኦሲም ዓይጎ ኑ ኬኤዛኒ ኮይሳቴያ ኔ ኑም ኬኤዜ፤
20 ፆኦሲም ኬኤዛንዳኔ ጌዒ ዖኦጪሢና
ዒ ታና ባይዛንዳጉዲ ዓይጋ ታ ዒዛ ዔቂሳይ?»
21 «ዢባራ ሻኣሮ ጫሪንጫፓ ዳኪ ፖዒሴ ዎዶና
ዖኦኒያ ዓቦ ጊዥ ጌይ ዛጋኒ ዳንዳዑዋኣሴ።
22 ኬዶ ዛላፓ ዎርቄጉዲ ጌኤሺ ፖዔ ሙካንዳኔ፤
ፆኦሲያ ዲቃሢ ሄርሺሳ ዼኤፑሞና ፔጋዺ ጴዻንዳኔ።
23 ፆኦሲ ዛጊንታኒ ዳንዳዓያቱዋሴ፤
ቢታንታ ዒዛኮ ዼኤፒኬ፤
ዒዚ ፒዜ ዎጋያኬ፥ ዒዚ ዖናኣ ሄርቂ ዎይሡዋኣሴ።
24 ፔ ማሊፆና ‹ኑ ዔራኬ› ጋዓዞንሢ ዒ ቦሃሢሮ
ዓሲ ቢያ ዒዛ ዒጊጫኔ።»