ዔሊሁ ጎዖሢ ጌስቴ ጌኤዞ
32
(32፡1—37፡24)
1 ዒዮቤ፦ «ታኣኒ ፂሎ ዓሲኬ» ጌዒ ፔ ማሊፆና ዶዴሢሮ ሃይሦ ዓሶንሢ ጌኤዞ ሃሼኔ። 2 ዒዮቤ ፔና ፂሎ ማሂ፥ ፆኦሲ ዻቢንቴያ ማሂ ፓይዴሢሮ ራሜ ዜርፃፓ ማዔ ቡዛ ዓሲ ማዔ ባርኬሌ ናኣዚ፥ ዔሊሁ ሚርጌና ዻጋዼኔ። 3 ዒዮቤኮ ላጎንሢ ዒዮቤ ዔያቶ ዖኦጫሢኮ ኮይሳሢጉዲ ማሂ ኬኤዚ ዒዛ ላሣኒ ዳንዳዒባኣዖ ዒዮቤ ዻቢንቴያ ሌሊ ማሂ ፓይዴሢሮ ዔሊሁ ሃሣ ሚርጌና ዻጋዼኔ። 4 ዔሊሁ ሃንጎዋቶይዳፓ ናኣቶ ማዔሢሮ ቢያሢ ዒዮቤም ኬኤዚ ጋፒሳንዳያ ሄላንዳኣና ዒ ጌስታንዳ ዎዶ ጊቢ ዚቲ ጌይ ካፔኔ። 5 ሃይሦ ዓሳ ዒዮቤ ዖኦጬሢኮ ኮይሳሢጉዴያ ማሂ ኬኤዛኒ ዳንዳዒባኣሢ ዒ ዛጋዖ ሚርጌና ዻጋዼኔ።
6 ዬካፓ ዔሊሁ፦
«ታኣኒ ዒንሢዳፓ ጌኤዛታያኬ፤
ዒንሢ ጋዓንቴ ጋርቺኬ፤
ዬያሮ ታ ማሊፆ ታ ዒንሢም ኬኤዛኒ ዒጊጬኔ።
7 ‹ጋርቻ ቤርታዺ ጌስቶንጎ፤
ዔያታ ናንጌ ዖዶዞ ሌዖይዳ ዴንቄ ዔራቶ
ዒዛ ዔርዞንጎ› ታ ጌዔኔ።
8 ጋዓንቴ ዓሲ ጋርካ ማዒ ዔራቶ ዒንጋሢ
ዼኤፖ ፆኦዛሢኮ ሼምፖ ዒንጋ ዑኡዞኬ።
9 ዓሲ ዔራ ማሃሢ ጋርቻቶቱዋሴ፤
ፒዜ ባኣዚ ማሊ ጶቂሣኒያ ማኣዳሢ
ሚርጌ ሌዔ ናንጊሢቱዋሴ።»
10 «ዬያሮ ታኣኒያ ታ ማሊፆ ዒንሢም ኬኤዞም፤
ዒንሢያ ዒናፓ ዋይዙዋቴ።
11 ዒንሢ ጌስታ ዎዶና
ታ ጊቢ ዒንሢሲ ዚቲ ጌይ ዋይዜኔ፤
ዔራቲ ጌስቶ ጎይፆ ዒንሢ ኮዓኣናኣ
ታ ዒንሢሲ ዋይዜኔ።
12 ዒናፓ ታ ዒንሢሲ ዋይዜኔ፤
ጋዓንቴ ዖኦኒያ ዒዮቤ ጌስቲ ማሃኒ ዳንዳዔይ ባኣሴ፤
ዒንሢዳፓ ዒ ጌስቴ ጌኤዞም ጊዳያ ማሂ
ዒዛም ኬኤዜ ዓሲ ባኣሴ።
13 ዒዮቤም ጊዳያ ማሂ ኬኤዛኒ ዳንዳዓይ
ፆኦሲዳፓዓቴም ዓሲቱዋሢሮ
ዒንሢ ‹ዔራቶ ኑ ዴንቄኔ› ጌይ ጉሪ ሄርሺንቲፖቴ።
14 ዒዮቤ ማርሜሢ ዒንሢና ማዓንዳፓዓቴም ታኣናቱዋሴ፤
ታኣኒ ዒንሢ ጌስቴ ጎይፆ ዒዛም ማሂ ኬኤዛዓኬ።»
15 «ዬያ ዒ ጌዔሢሮ ዔያታ ዲቃቲ
ጎዖንዶ ጎይሢ ባይዜሢሮ
ፔቴታዖ ዔኤቢ ጋዓኒ ዔያታ ዳንዳዒባኣሴ።
16 ማይ ሃይሾ ዔያታ ጎዖንዶ ባኣዚ ባይዚ ዚቲ ጌይ ዔቄኔ፤
ዓካሪ ዔያታ ዚቲ ጌዔቴ
ታኣኒያ ጊቢ ዚቲ ጌይ ካፓንዳያ ኮይሳ?
17 ያዺቱዋሴ! ታ ዛሎና ማሂ ታ ዒዛም ኬኤዛንዳኔ፤
ታኣኮ ዓኣ ማሊፆዋ ታ ዒዛም ፔጋሲ ኬኤዛንዳኔ።
18 ሚርጌ ታ ኬኤዛ ባኣዚ ዓኣሢሮ
ማይ ታኣኒ ዚቲ ጋዓኒ ዳንዳዑዋሴ።
19 ጎጳ ታኣኮ ዹኡቃኒ ዑኬ
ሺሜ ዎይኖ ዑዦ ዋሆና ሱርባጉዲ ጋኣቤኔ።
20 ታ ጌስቴም ዬይ ጋፖንጎ፤
ታ ዻንጎና ማሂ ታ ዒዛም ኬኤዛንዳያ ኮይሳኔ።
21 ሃያ ጌኤዞና ዖ ዛላ ማዒያኣ ታ ጌስታዓ፤
ሃሣ ዖናኣ ታ ጋዳይሳዓኬ።
22 ታኣም ዓሲ ጋዳይሲሢ ማዑዋሴ፤
ዬያ ታ ማዻያታቴ
ታና ማዤሢ ዑኬና ባባይዛንዳኔ።»